ISAIAH 45
45
Mapao nou Sairas ye Dolouyu
1 Mapao nou theadzü napei
khaitouyu Sairas veoye sü panou tyahrütao jünou reih veiloure donou,
ae vemaitao vei reih basei, khouko khesü panou souhare donou,
ae robomü khesü panou houpeire donou Puhnou hona hisü haibüa paoe,
2“Enou ne jünou rai-a tapeilai,
ae deichi khesü souchi peilai.
Enou baosahu nou soukhai touyu robomü khesü souphepho peilai,
ae hu nou tyakhai touyu khesü soucha peilai.
3Enou azhi buh hinou ae sümo ngaomoyu buh hinou pokukhai touyu kini khesü neye peilai,
sübüa neye panou E hai neye zhih nou kulouyu Israel maivei Ramai Mapao nasüe touyu panou süloulai.
4Enou neye dopa louyu sü neye panou avei kilaiwo Israel maitaoye soukhare donou-e.
Nenou Eye sümo-a buyuma Enou neye sü souduso peikhaitoue.
5“Enou Mapao sü baie, E baimoa nou ramai kukhe ali-a hae.
Nenou Eye sümoyuma Enou neye soukhou peie.
6Sübüa Enou souyu hai teinghi palonou teinghi loulova koute hrüa buyu maikhe maiye panou E baimoa Ramai kukhe aliro hae touyu süloure donou-e.
7Enou ava ae azhi ahai kheinou soupeie,
Enou aveih ae ashi-a soupeie.
Mapao, Enou hai teitei sü soupeie.
8Oh raki, acheche sü panou ratei vanou rükou peikhaio;
deiphao sü panou houpa peikhaio,
sübüa khailu peiyu sü panou paopa loukhaio,
ae acheche sü panou lapalou khaio;
Mapao, Enou hai khesü soupeie.”
Soupeiyu ae Hrümaiko vei Mapao
9Mai ali nou puhye soupeipuye züveiyu mai sü daizhou koute rakoshi laisa,
süsü nailee ali nou nailee souyu mai naye züyu büa bailai!
Konai nou naili souyu naye “Ne daisouwe?”
Moyuma “Nenou souyu sü veimoe” tea paolou süvu?
10Mai taralia pfüpuo hi “Ne daisounou Eye napeiwe?”
tea paoyu maisü daizhou koute rako shilaisa!
11Hali-hala sou-apeio, Israel maivei sheeyu Ramai Mapao nou haibüa paoe,
“Neletao nou avei nahmai donou chi noure zü ali-a ha-e,
moyuma Enou souyu vahtao hi kharochi peilou hoe!
12Enou deiphao sü soupeie,
ae haihi hrüa buyu maikhe maiye sü soupeie.
Abah vuzünou raki sü paitopa peie alia khouh teinghi ae teivu khesü Enou kharochi peie.
13Enou Sairas ye sü panou avei leli vah soure donou soushu peie.
Puhnou avei nuhdu Jerusalem nasü soushupu peilai,
ae soureih souyu hinou nüpoa tayu hukha maitaoye sü vupa peilai.
Haisü mai linoua muhma moyuma seihla pei-a puhnou soumoe,” tea Khoukhoulai Mapao nou paoe.
14 Mapao nou Israel mai hi paoe,
“Ejipt hi buyu nangitao ae Sudan hinou huhasoua buyu na khesü neletao vei soulai,
ae duso shoa buyu Seba maikhesü neletao vei qila soulai;
puletao sü hurai khipoa neletao thaifü talai.
Puletao sü neletao phi hi nakou khurüa haibüa mah paopalai,
Ramai sü neletaoye koa salai peiwe,
puh baimoa nou ramai kukhe ha-e.
15Israel maivei Ramai, puhvei maitaoye khailu apeio,
puh hai tutsüa buyu Ramai ali-e.
16Bashara souyu mai khesü hrao soupeilai,
ae puletao mai hrülai nou hraongu ngaolai.
17Ana Israel mai louzü Mapao nou khailu peilai,
ae teisa veilouyu sü ngaolai, alia puletao hai hraongu sü daokhai toulai moe.”
18 Mapao nou raki ae deiphao sü soupeie!
Puhnou haisü southou haokao-a khaipei moe,
ana maiye panou hrüloure donou soupei khaitoue.
Puhnou haibüa paoe, “Esü Mapao-e,
E baimoa ra kukhe ali-a ha-e.
19Enou kheikhei soua paomoe,
teimai teizhi hinou paomoe;
Enou Israel mai hisü bürarou-a buyu hinou Eye phoulo tea paopei moe.
Mapao, Enou acheche nasü paopeiwe,
Enou kaozü nasü süngao peiwe.”
Deiphao Maivei Mapao ae Babilon hi Basharatao
20 Mapao nou paoe,
“Shokhaitoua buyu tyahrü hrülai tave jülo chikulai!
Süü chuh nou soukhai touyu bashara poa laiyu puletao hai halia sümoe,
ae puletaoye khailupa peilou hoyu ra ali hinou puletao hai veachi paowe.
21Neletao vei chi sü popa kukhaio,
ae puletaoye sü panou koa kabülai touyu sü phaku zholou khaio!
Thaonou vepare khesü rai-a paosü peie?
Haisü Mapao Enou movu?
E likhei baimoa nou checheyu Ramai ae khailupa peiyu Mapao kukhe alia-a ha-e.
22“Deiphao hi hrüa buyu mai hrülai,
Ahi dakhai velo ae khailulo!
Daiolouzü E likhei Ramai sü baie.
23Enou lah chaachou souwure,
amü hinou acheche nasü paopawure.
Achipao khesü hasou kilia datalai moe;
Mai hrülai nou aphi hinou nakou khurülai,
la hrülai nou ahinou chaachou soulai.”
24“Puletao nou haibüa Eye paolai,
Mapao hi likhei acheche ae khouko sü bubaie;
ana puhye ngaorayu mai hrülai sü veahoyu ae hraongu ngaolai.
25 Mapao vei zhih hinou Israel maivei
tyaosholea hrülai sü veilouyu ae kathe sü ngaoloulai.
Currently Selected:
ISAIAH 45: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
