ISAIAH 32
32
Kaozü Süyu Vemai Ali
1Zhukhaio, veo mai ali nou acheche hinou ae peikho maitao nou kaozü hinou nuh teidei sü khosa-a hrüpeilai. 2Puletao mai alili hai teikhai hinou bailoure buh ali ae teikhai teirü ashi veyu phaki tutsü louyu buh ali bülai, alia puletao sü radeiki hinou reidzü küyu büa ae halia hayu teidei hisünou chuhdu ali nou teihao soupeiyu bülai. 3Puletao vei nghithou ae noubi sü maikhe maiye donou hepeilai ae kei peilai. 4Puletao hai lesoua vah souhaha khailai moe, ana kaozü hinou vah soua bailai alia macha hi sünou sheesha-a chi sü paopeilai. 5Vo-a chaoyu maiye sü mai linou aduso mai-e tea paopu peilai moe, moa mai ashi maiye sü tsükhoupu laimoe. 6Daiolouzü vomai sünou voyu chipao pao-a baie, ae puletao vei tsüle hisü ashi tsü choa ae ashi vah soulai tea bubaiwe. Puletao nou chi paoyu ae vah souyu teitei sü Mapao ye paoshilai tea soua baiwe, alia puletao hai houzüa lai maiye pouphou reikha soupei moe. 7Mai ashimai sü ashi nasü baie ae ashi vah soua baiwe. Puletao nou do ashi sünou souloua dahrührüa touha-sohalai maiye soushi peie, alia veahoyu mai vei kaozü hai-a poreilai peia baiwe. 8Ana mai aveih mai hai vah aveih soupeie alia puletao hai kaozü hinou lachüa baiwe.
Tudei Peiyu ae Khaipeiyu
9Leveayu halia ha-a vaphi-a buyu naotu maitaore, Enou paoyu avei chi sü keilo. 10Chuo neletao hai sava-a buyuma, po ali thaisü neletao hai veaho talai, daiolouzü darkha dzü süyu sü ngaolai more, alia darkha shithou sü haipu khailai more. 11Vaphia-a buyu alia leveayu ha-a hrüyu naotu maitaore, chuo levea-a ngaopilo! Neletao vei sabanü khesü laolaiwo, alia neletao khya sü ngulousah nou kholo. 12Neletao vei ki-lu ae kipei aveih teitei sü soushi khaiwure, südonou neletao khao khoukhaio, 13alia avei maitao teidei sü raishu nou paopa phouloure, ae sava sho-a hrüa buyu nuhdu hi ki aveih teitei sü soushiwure. 14Veo vei fühao koute-a thaowulai ae mai alao hrüa buyu nuhdu hai-a thaowua bailai, alia kitao ae reihkhaobu sü teisa panou rekhaona nou hrüyu buh alia rheihsüh ae zhaotu khenou pou toua sühaoyu buh souwulai.
15Ana Ramai nou Etao hi puhvei rako sü seive peilai, süthaisü soushi khaitouyu teidei taosü shinamara veishoyu teidei soutalai, alia chamou veisho-a chachi loulai. 16Süthaisü nuh teidei teitei hisü acheche ae kaozü soua hrülai. 17Daiolouzü mai hrülai nou kaozü nasü souwulai, alia sühisü kaonayu ae kaozhou veia teisa nou bulai. 18Ramai vei maitao sü veahoyu ha-a kaona nou ae vasho-a nou hrülai. 19(Ana vaobvü hisü reithou koulai, ae nuhdu sü soushi khaiwulai.) 20Reipe hinou shiramara thoulouyu mai ae kikhaorü khesü panou pou toua laiyu maisü daizhou koute sava laisa.
Currently Selected:
ISAIAH 32: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
