EBRIAMAI 7
7
Napao Melkizedek
1Melkizedek hainasü Salem teideihi Veo süe ea puhsü Aku Kulai Ramai vei napao nasüe. Abraham nou vemai adaiye southeawua reihbuh hinou khaiveyu phaki Melkizedek nou puhye daoloua hapeie, 2alia Abraham nou reihbuh hinou ngaolouyu na teitei hinou zha kiruo hinou alisü puh hi peie (Melkizedek touyu vei ko araina louzü, “Acheche vei veo” toue; alia puh hai Salem teidei hi veoyu donou puh zhih ko hai “Kaonayu vei Veo” tea pao-a paowe.) 3Puhsü pfü-puo moa paipao; puhye nayu moa thaiyu vei vanou rüthoukhai touyu ali-a hae, ana Ramainah Poutu kua thaokhaimoa teisanou napao soua bue.
4Südonou, puhsü daizhozhou dusa chokhaio! Zhih tashoyu Eh puopao Abraham nou puh hisü puhnou reihbuh hinou ngaolouyu zha kiruo hinou alisü posheelae. 5Alia napaomai soua buyu Levi tao-nah maitaoa razhai thaifüa Israel maitao hinou süolouzü puletao-a Abraham tao-nahmaikhaia, lah puletao thaihou jürai maitao hinou zha kiruo vei ali poloure chikha peikhai toue. 6Melkizedekwo Levi taonah hinou vemoe, ana puhnou Abraham hinou zha kiruo hinou ali poloua Ramai vei apaopei khaitouyu ngaolouyu puhye sü hapeie. 7Alia hapeiyu puhnou ha ngaolouyu puh jünou dukouhie touyu hisü halia motoure hae. 8Napaomaitao veiwo louzü zha kiruo vei ali nasü thaire maitao nou khaloue; ana Melkizedek donou louzü zha kiruo vei ali nasü sheeyu larübvü hinou paoyu kua hria buyu puhnou khaloue. 9Alia maitalinou haikua paolou veie, süolouzü zha kiruo hinou ali ngaoyu Levi puh-a Abraham vanou zhakiruo hinou alisü posheelae, 10daiolouzü Melkizedek nou Abraham ye daoyu kisü Levi sü puh puopao Abraham vasou hi buhie.
11Chuo Levi khü vei napaobuh hilonou licheyu nasü ngaolousüe toulouzü (daiolouzü matsü soua süna vanou razhai nasü Israel maitao hi peie), Aaron vei napao zhai süna thaifü mo-a Melkizedek vei napao zhai hinou kukhe napaoli panou veyu dai matsü bue? 12Daiolouzü napaobuh datayu kisü, razhai-a data vuzülai. 13Daiolouzü puh vanou chi haitao paopeikhai touyu Eletao Mapao puhsü khü kukhe hinou ve, alia puh khü hinou maitalia napaosoua sheelabuh hinou vahsou khai mohie. 14Daiolouzü Eletao Mapao hai Judah khü hinou ve-e touyu sü maikhe mainou sükhaiwe, alia Moses nou napaomaitao vanou chi paoyu kisü khü haina vanou halia paomoe.
Melkizhedek kuyu Napao Kukheli
15Alia Melkizedek kuyu napao kukhe ali payu kisü, Eletao nou paoyu sünasü sheetou pukhaire. 16Puhye sü pfüphao vei zhai thaifüa chikha peiyu hinou moanou akhai hayu ahri sünavei khouko süna thaifüa napao soupeire. 17Daiolouzü sheeyu larübvü nou puh vanou haikua paoe, “Newo Melkizedek vei napao zhai süna thaifüa teisanou napao soulai.” 18Südonou chikha arai nasü lelou hoyu ea matsü hayu donou thaore. 19Daiolouzü Moses vei razhainou hataliye southou liche peilou hoe. Alia chuwo vei kouyu areih ali pove peikhaitoua süna vanou Eletaonou Ramai hi tave ngheiloue.
20Alia süpeinou, sühisü Ramai vei chachouna-a bue. Kukhemaiye panou napao soulouyu kisü sükuyu cha-chou nasü hae. 21Ana Jisuwo Ramai nou puh hi haikua paopeia cha-chou ali hinou napao souloue,
“Mapaowo nou chaachou souwure alia puhle dakhai laimoe:
‘Newo teisanou napao soulai.’ ”
22Chaachou haina vanou Jisu sü veikouyu vo sünavei lapeiyuna souloure.
23Alia takuyu kukhe alinou, napao araitaosü alao soua bue, daiolouzü puletaoye vahbuh hinou thaokhaimoa bure hinou athai nanou nuwure. 24Ana Jisuwo teisa nou hria buyu donou puhvei napaobuh sü puh hi teisa nou bulai. 25Südonou puh vanou Ramai hi tave louyu puletao hrülaiye sü puhnou teisanou khaipei lousüe, daiolouzü puhwo Ramai hinou puletao sühsoua khopeire donou teisanou hriwe.
26Daiolouzü sükuyu sheeyu, chaa hayu, mahlia hayu, mahmaitao hinou dokupa khaitoua buyu ea rateitao jünou pokukhe khaiyu Eletao vei napao peichana buyu sü züdoushoe. 27Puhwo napao peicha kukhemai kumoe; puhwo lah puh mah donou raia ea süthai maikhemai mah donou teisanou sheelayu natao pothoyu matsü hae. Puhnou lah puhye popeiyu hinou puletao mah donou lühli kheinou teisavei donou popeire. 28Achechewo louzü, Moses vei razhai nanou liche moyu maitaoye panou napao peichatao soure donou dothoupeie; ana razhai jünou na-a veyu chaachou noupu koa souyu Ramai vei apaopei khaitouyu sünanou teisanou sou liche peiwuyu Nah Poutu naye doloure.
Currently Selected:
EBRIAMAI 7: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
