EBRIAMAI 5
5
1Daiolouzü Napao Peicha taliye sü maikhemai hrohinou dopaloue ea maikhemai sühsoua Ramai kuvah soure donou, sapeina popeiyu ea mah donou posheela peiloure donou buh thoupei khaitoue. 2Puh lah-a lelou hoyu donou, tsübo sümoyu ea mahmo tayu maitaoye-a puhnou koa natai-a bulou süwe. 3Alia sübüa lah puh-a lelouho donou, maikhemai mah donou likhei baimoa lah puhvei mahtao donoua posheela peiyu sü souvu zülai. 4Maitalinoua tsükhouyu Napao Peicha buh hainasü lahnou khaloumoe, ana Aaron kua puhye sü Ramai nou kuloue.
5Sübütoua, Khrista-a lah puhnou Napao Peichana souloure donou tsükhouyu buh nasü khaloumoe. Ana Ramai nou puh hi paoe,
“Ne sü Anah Poutue;
Zhou Esü Nepuo souloure.”
6Buh akuli hinou haikua puhnou paokhaie,
“Newo Melkizedek vei napao zhai süna thaifüa teisanou napao soulai.”
7Jisu puhnou deiphao hi hrübu kisü, athai hinou puhye khailupa peilou süyu Ramai puh hi paikua nghidzü koua ea veachi paoa khowe, alia puhnou natai-a Ramaiye pi-a hrüyu vanou puh khosü noupeie. 8Puhsü Ramainah Poutu khaia puhvei veahoyu hinou paochi züyu sü puhnou douloue. 9Alia puhye souliche peiyu kisü puhsü puhnou paoyu züyu maikhemai hrülai donou teisa khailu louyu peiloure dzünghou soutare, 10alia Melkizedek vei napao zhai süna thaifüa puh hai Napao Peicha nasüe tea Ramai nou dua paopa peire.
Lü Thaota more Tukha Peiyu
11Ehnou haina vanou paore alaosoua bue, ana süsü neletao hi paoshee peiyu tatei shoe, daiolouzü neletao sü thala-a sülou bae. 12Daiolouzü chuwo neletao hai dou-apei mai soua buyu phare, sütoukhaia chu koute-a neletao hai kamaiye panou neletao hi Ramai vei chipao araikhatao doupei molouzü shilaiyu buloure. Neletaowo chu koute-a tokaa toumoa naodzünou külai, 13daiolouzü naodzünou kü-a hriyu puhsü taishoyu nahmai ali baiyu donou puhsü acheche chipaona vanou avei ashi sükumohie. 14Ana tokaana louzü soukho pfükho lou-a avei-ashi sükulou süyu tsümaitao donoue.
Currently Selected:
EBRIAMAI 5: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
