EBRIAMAI 3
3
Jisu hai Moses jünou Dukou Hie
1Südonou raki hilonou kulouyu hi koa louzha ngaozho louyu, sheeyu thaihou jürai khemai, Eletao nou füa laiyu lü haina vei sei-atana ea Napao Peichana Jisu ye lichokhaio. 2Moses nou Ramai ki hinou cheche-a vah souyu sübütoua, puh-a puhye vah haina soure donou dopeiyu Ramai hisü cheche-a tapeie. 3Ki souyu mai aliye ki süna jünou tsükhou kouyu sübüa Jisu ye hai Moses jünou koushoa tsükhou peizüe. 4Daiolouzü ki veishisü maikamai linou soue, ana ha teitei soupeiyu puhwo louzü Ramai baie. 5Moses hai kilai alikua Ramai ki hinou cheche-a hrüe, alia Ramai nou thaikhai hi paore sütao vanou puhnou zhopaoh peia chipaoe. 6Ana Khristawo Nah Poutu alikua cheche-a Ramai vei kisü khoe. Eletao nou rei-a buyu hisü khuveia ea louche touloua bulouzü Eletao sü puh kie.
Ramai Nahtao donou Soyu
7Südonou Rako Mashi nou paoyukua,
“Neletao nou zhou Ramai pai chouloure toulouzü
8daoraichoki neletao puo-pao maitao nou rekounou Ramaiye zhai zhua puh pei hi motouyu sükibüa,
neletao lesü khoushoyu souwuso.
9Sühinou puletao nou Avei vahsü po raidaipha ngaoloukhaia,
puletao nou Eye la-a Azhai zhue.
10Südonou Enou maikha süna pei hisü raroua paoe,
‘Puletao sü teisanou paoyu zübae;
alia puletao nou Aludu sü sülou moe.’
11Enou rarouloua haibüa cha-chou soue;
‘Puletao nou Asobuh hisü, hakia velou laimoe!’ ”
12Südonou thaihou jürai khemai, leikeilo, molouzü neletao hrohinou maitalinou ashi ea louche moyu le nasü pfüloua neletaoye hriyu Ramai hinou sataloua panou kaoduta bailai. 13Ana neletao maitaliye-a panou mah vei do ashi nanou laloua le khoutalou more donou sheeyu larübvü hi “Zhou” touyu chipao nasü Eletaoye donou bubu kinou teithetsü nou neletao alinou liye soukha peia buvuzülo. 14Daiolouzü Eletao nou shurai hinou louche-a buyu sü akhai koute potouloua buloure toulouzü Eletao hrülai sü Khristaye koa vah souyu maitaoe.
15Haisü sheeyu larübvü hinou paokhaitoue:
“Neletao zhou Ramai pai chouloure toulouzü,
neletao puo-paomai taonou rekounou
Ramai pei hi motouyu süki kua
neletao lesü khoushoyu souwuso.”
16Ramai pai chouloua puh pei hi motouyu maitaosü thaoh maitaoe? Sümaitao sü Moses nou Ejipt teidei hinou sapoa tapayu puletao hrülai mowu? 17Alia Ramai nou thaoh pei hi po raidai rarouwe? Süsü rekounou puletao pfüphaosü kaodua thaitayu mah souyu maikhe maitaoye mowu? 18Alia paoyu zübayu maitao hi moa nou thaohmaiye panou puhvei soyu buh hi hakia loulaimoe tea Ramai nou cha-chou souwe? 19Südonou louche moyu vanou puletao sü sobuh sühi loulou hore touyu sü Eletao nou ngaowe.
Currently Selected:
EBRIAMAI 3: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
