EBRIAMAI 10
10
1Jihudimai razhai hai vere acheche natao vei chekhouyu ea poloua vei zhai vuzümoe, daiolouzü haihai vere na avei taovei khu likhei baie. Sükuyu donou thaokhaimoa popatsü nou kheihaobüa sheela-a nou pothokhai khaiyu sünanou hakia Ramai hi taveyu ratho maitaoye souliche peilou hoe. 2Ramaiye thoyu maitao hai cheche nou puletao vei mah hinou soushee peiwure toulouzü, puhtao sü puletao mah donou hakia letsüpu khailai moe, alia sheelayu teiteisü thaowu bailai. 3Ana popatsü sheelayu haitao nou maikhe maiye panou puletao vei mahtaosü lilouwe. 4Daiolouzü chode ea nghitu zhenou hakia mahtaosü pota peilou hoe.
5Haikuyu vanou Khrista nou deiphao hi vere kisü puhnou Ramai hi haibüa paoe:
“Sheelayu ea pothoyu sü nenou züpa moe,
ana nenou Eye donou pfüphao ali souda peiwure.
6Meinou deia pothoyu ea mah donou sheelayu sü nenou lesa moe.
7Süthaisü Enou paoe,
‘Zhukhaio, A vanou razhai larübvü hi rüthou khaiyu büa,
Oh Ramai, ne leli nasü soure donou Esü veloure.’ ”
8Raikai-a puhnou paoe, “Newo posheelayu, sa-a popeiyu, pfüphou nou pothou posheelabuh hinou meideia popeiyu ea mah donou posheelayu sütaosü hakia züpa moe moa lesayu hae.” Posheelayu sütaosü razhai thaifüa popeikhai-a puhnou haisü paoe. 9Süthai-a puhnou paokhaie, “Zhukhaio, Oh Ramai, neleli nasü soure donou Esü veloure.” Südonou Ramai nou posheelayu ahai chenasü soushupa loure donou arai nasü souhare. 10Daiolouzü Jisu Khrista nou Ramai nou puhye panou sounüyu nasü soulouyu donou Eletao hrülaiye sü lah puhnou puh pfüphaosü lühli hinou teisa vei soure thoupeiyu vanou soushee peire.
11Alia napao maitao hrülainou teithe tsünou naanou soua kheihao baiyu posheelayu sütaonou popei khaikhai baiwe; ana posheelayu sütao nou hakia mah pota louhoe. 12Ana Khrista nou mah donou posheelayu ali teisa vei donou popeiwua, puhnou Ramai bahkha zhoulovanou kou buloure. 13Sühinou puhnou chuwo Ramai nou puhvei ngaoba maitaoye puh phi hi pove phihea soupeimo koute khoa bue. 14Daiolouzü ali kheithe popeiyu sünanou puhnou mah hinou soushee louyu puletaoye sü teisavei donou southou liche peiwure.
15Alia Rako Mashinou-a süna vanou puhvei zhopaohsü Eletao hi peie. Raikai-a puhnou paoe,
16“Teithe sütaothai Enou puletaoye koa soulaiyu vo nasü hainare tea Mapao nou paoe;
Enou Avei razhai taosü puletao lethou pei hi pothou khaipeilai,
alia sütaosü puletao tsü lekhe hi rüthou khaipeilai.”
17Süthaisü puhnou paoe, “Enou puletao vei mahtao ea ashi vahtao sü lichopu khailai moe.” 18Südonou haitaoye khaipeiyu hisü, mah pota peire donou popeiyu sü matsü khaimore.
Eletao Ramai hi Tave Ngheilou Laikhe
19Südonou, thaihou jürai khemai, Jisu vei zhe vanou chuo Eletao hi Mashi Shilai Buh hi talou loure mado nasü bure. 20Puhnou Eletaoye donou sah haokhai touyu süolouzü lah puhvei pfüphao vanou ashu ea hriyu ludu ali houpeire. 21Alia Ramai kikha pei hi khoyu, Eletao vei dushoyu napaomai ali buyu donou, 22Eletao nou vuzüyu lünou phoua buyu cheche le sünanou lekhetsü ashina hinou soushee peiyu Eletao le ea sheeyu dzünou khüsheeyu Eletao vei pfüphaoye koa Ramai hi takou ngheilou laikhe. 23Eletao nou füa laiyu areih sünasü Eletao nou letsüyu soukhaimoa soutao soua polou laikhe, daiolouzü apaopeiyu puhye sü louchelou veie; 24alia Eletao nou alinou liye panou leshi loure ea alinou lihi vah avei soupei-a panou alinou liye soukha peiloure kakua süthou peilaisa touyu vanou tsücho laikhe. 25Mai kamainou lüloumaime vedzüa buyu hi vekhai bayu büa Eletaowo soulai mokhe. Ana neletao nou Mapao vei teithesü ve ngheipu shoyu sü ngaoyu donou Eletao nou ali nou liye khoupua süthoupei laikhe.
26Daiolouzü Eletao nou acheche vei tsü nasü ngaolouyu thainou sütoua mah soulouzü sühisü mah pota loure posheelayu ali-a hare, 27ana vere chikuyu sünaye ngaopishoa ea Ramaiye ngaobamai taoye souhare chihshoyu meikei sünaye khoa buyu likhei baire. 28Moses vei razhainou paoyu zübayu maitaliye mai ahai moa asü vei chilapeiyu hinou zhuvea peiyu ali-a soukhaimoa southeawu baiwe. 29Sükuyu thaisü, kazhou koute shiyu tudeisü Ramainah Poutuye ngaorayu, alia puhye mah hinou soushee peiyu vo navei zhe sünaye souzhaiwuyu, alia zhuvea vei Rakoye sou ahrao peiyu mai sünanou ngaozüe tea nenou chowe? 30Daiolouzü haibüa, “Khüh phoure sü Aveie, Enou pao rüpeilai,” alia süthaia, “Mapaowo nou puhmaitaoye sü chikulai,” tea paoyu puhye sü Ehnou süwe. 31Hriyu Ramai bah hi kaolouyu hai ngaopi pilai nasüe!
32Raiki teiletao hi kakusa touyu sü lichokhaio. Teithe sütao hi Ramai avanou neletao pei hi vapeiyu thai neletao nou veahoyu alao vedaoyuma sütaosü neletao nou shamea loue. 33Chacha kisü neletaoye sü dua sou ahraopei ea souveapeie, alia chacha kisü sükua souvea peiwuyu maitaoye koa zha ngaozho loure donou nelenou soudawe. 34Neletao nou hukhahi bumaitao veahoyu sü koa zha ngaozho peie, alia neletao vei kina teitei saolouyu kisü, neletao vei hakayu hisü sasa-a shamea peie, daiolouzü chu koutea neletao vei veikou shoyu ea teisa vei souloure kinisü bue touyu sü neletao nou süwe. 35Südonou neletao nou louche-a buyu nasü polaiwuso, daiolouzü sünanou dushoyu buusü pove peiwe. 36Daiolouzü Ramai vei lichoyu souloure ea puhnou apaopei khaitouyu hai ngaoloure donou neletao nou shamea loure matsü bue. 37Daiolouzü sheeyu larübvü nou haibüa paoe:
“Phajü chaokholoua,
velaiyu puhsü velai;
puhsü chao-a bulaimoe.
38Ana Avei achecheo sünanou lü vanou hriloulai,
alia puhnou thaikhai tare toulouzü
Enou puh lüsü valaimoe.”
39Ana Eletaowo thaikhai tayu ea hakayu mai sütao moe. Ana Eletaowo lü buyu ea khailu louyu mai sütaoe.
Currently Selected:
EBRIAMAI 10: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
