EBRIAMAI 1
1
Nah Poutu vanou Ramai Chipao Velouyu
1Raiki teilehi Ramai nou Eh pou-pao maitao hi rachipaola maitao vanou bo akuku hilonou vuh taoli chipao peie, 2ana akhai teithe haitao hisü puhnou Eletao hi puhnah Poutu vanou chi paopeire. Puh vanou Ramai nou teideiphao sü souloue ea puhye süna teitei vei kaalo nasü panou akhaiki thaoloure donou Ramai nou doloure. 3Puhnou Ramai vei khouko ava nasü phungaopeie ea puhvei chipao khouko nou teideiphaoye moupeia puhnou Ramai vei zhaihrü acheche nasü pfüa bue. Puhnou emai mah khüshee peiyu vei vah soucheyu thaisü; puhsü Raki hi buyu Aku Kulai Ramai bah zhoulo vahinou kou buloure.
Nah Poutu nou Rakivamai jünou Dukouyu
4Nahpoutu nou zhih ngaolouyu sünanou rakivamai vei jünou dukou shoyu kua; puhnou puletao jünou dukousho loure. 5Daiolouzü Ramai nou puhvei rakiva maitao talihia haikua paokhai mohie,
“Ne sü Anah Poutue;
Zhou Esü Nepuo souloure.”
Moa Ramai nou rakivamai tali vanou haikua paokhai moe,
“Esü puh Puo soulai,
alia puhsü Anah Poutu soulai.”
6Ana Ramai nou puhnah Poutu narai naye deiphao hi seikoureki haibüa paoe,
“Ramai vei rakivamai hrülai nou puhye sü khurü vuzükhaio.”
7Ana rakivamaitao vanou Ramai nou paoe,
“Ramai nou puhvei rakiva mai taoye sü teikhai kua alia puhvei kilaitaoye sü meikei kua soupeie.”
8Ana Nah Poutu vanou Ramai nou haibüa paoe:
“Nevei vedeiwo, Oh Ramai, khainou khaikoute bulai!
Nenou nemaitaoye sü acheche sünou tukha-a hrüwe.
9Newo acheche naye sü leshiwe ea kao-zümoyu naye sü ngaorawe.
Sükuyu donou Ramai,
ne Ramai nou neye doloure alia ne hisü ne samaitao hi peikhai touyu jünou dukou shoyu,
mainou tsükhouyu vei asah nasü peikhaitoue.”
10Alia puhnou haibüa paokhaie,
“Mapao, nenou soushurainou deiphao soupeie,
alia lah ne bahnou ratei taosü soupeie.
11Rateitao sü hata bailai, ana newo teisanou bulai;
sütaosü sahba kua pahü-hüta bailai.
12Nenou sütaoye sü zaodu alikua pokhei khaiwu bailai,
alia sütaosü sahbali kua databailai.
Ana newo teisanou khei haobaie,
alia ne hrümaiwo hakia akhai hae.”
13Ramai nou hakia puhvei rakivamai talihia haibüa paomoe:
“Enou ne ngaobamaitaoye sü ne phitai soupeimo koute sü
Abah zhoulo vanou kou buwo.”
14Sükuyu thaisü, rakivamaitao sü daisouyu maie? Puletao sü Ramai kuvah souyu ea khailu peiyu ngaoloure maitaoye soukha peiloure donou puhnou seive peiyu rakotao baie.
Currently Selected:
EBRIAMAI 1: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
