SHURAI 37
37
Josef ae Puh Jürai Maitao
1Puh puo nou shetumai ali soua hrüyu Kanaan teidei hisü Jakob nou hrüa bue, 2alia Jakob vei kikhamai kosü haikue.
Josef nou po kianai payu phaki puh jürai maitao süolouzü puh puo khapfü Bilhah ae Zilpah nahpoutu maitao koa nghitu-zhaotu khotae. Jürai mainou vah kaomoa souyu teitei hai puhnou puo hi ve paopeiwe.
3Puhnou chülouyu thainou nalouyu thaifüa Jakob nou Josef ye nahpoutu kukhetao jünou leshipu hie, alia puhnou hüvei shoyu zaocha ali puhye peie. 4Jürai maitao nou puhye puo nou leshi kouhie touyu süloua jürai maitao nou puhye ngaobare ae chila veia phabare.
5Zhou kheili Josef nou meli mue, alia sünasü puhnou jürai maitao hi paopei khaie, puh jürai maitao nou puhye sü ngaobapu loure. 6Puhnou jürai maitao hisü paoe, “Enou meli muyu nasü kei peikhaio. 7Etao chenamai dou hinou southoube khuh khua bue. Enou khua buyu khuh nasü shulatsü loure alia neletao nou khua buyu khuhtao sü takou avei khuh nahisü sühaoloua nakouh avei khuh nasü khurüwe.”
8Puh jürai maitao nou paoe, “Cheche vuzünou nenou Etao pei veo soua hrülai touwu? Chekhao nou Etaoye nenou tukha-a hrülai touwu?” Puh vei chipao ae puh me vanou puh jürai maitao nou puhye ngaobapu loure.
9Puhnou meli mupua sünasü puh jürai maitao hisü haikua paoe, “Enou meli mupu khaihie, süsü kabüwe toulouzü khouh, teinghi ae teivuh kiali taonou nakouh Eye thoa bue.” 10Me hai nasü puh puo hia paopei khaie, puh puo nou puhye züa paoe, “Ne mesü dai metya-e? Cheche vuzünou E, nepfü ae ne jürai maitao hrülai nou deiphi nakouh neye tholaiwu?” 11Puh jürai maitao louzü puhye ngaoraia bubaie, ana puh puowo louzü süsü kabü laisa tea tsüchoa bue.
Josef ye Zoyu ae Ejipt hi Potayu
12Teitheli Josef jürai maitao hai Shekem hinou ho puh puo vei zhaotu khotare. 13Jakob nou Josef hi paoe, “Ne jürai maitao sü Shekem hinou taho zhaotu khotare. Ne-a puletao hisü tahowo.”
Ae Josef nou ae tea chila peie.
14Puh puo nou puh hi paoe, “Ne jürai maitao ae zhaotutao sü vei-a buhomosa taho zhukhaio alia khaive ahi kabüa bue touyu paopeio.” Südonou puhnou Hebron deikho hinou puhye sü Shekem hi seitare.
Puhnou Shekem hi veloua, 15tasühao-a buyu sü maili nou ngaoloua puh hi noue “Ne daili phou-a tawe?”
16“E ajürai maitao phoua lai, zhuvea ahi paopeio, puletao daikinou zhaotu khoa buwe?” tea Josef nou chila peie.
17Mai nanou paoe, “Puletao haihi nou tare, daiolouzü puletao nou ‘Dothan hi hota laikhe’ tea chipha-a buyu Enou choue.” Südonou Josef nou jürai maitao thai tsüho Dothan hinou ngaoloue.
18Josef nou nghiki koute loumo jünou jürai maitao nou zhingao loua puhye southalai tea phaloure. 19Puletao sü linou lihisü haibüa paoe, “Hona me muyu mai nasü laire. 20She, puhye khoutha loua kaobvü hi laithou bailai. Süthaisü puhye soukhaona nou southare tea pao bailai. Sükua puhvei me muyu nasü dai palaisa touyu zhulai.”
21Ana Reuben nou süsü süloukhaie, puhnou Josef ye vupa loure donou paoe, “Etao puhye southa laimo khe. 22Zhe soupa moa nou raobvü haihi laithou khai bailai she.” Puhnou haibüa tsücholoua paoyu hai Josef ye vupa loua panou puo hi dakhaive loure donou paoe. 23Josef nou puh jürai maitao hi takouyu phaki, puletao nou puhvei zaocha nasü laopa loure, 24alia puhye sü kaobvü hi laithoure. Kaobvü sünasü dzü hae.
25Puletao nou hatoua buyu phaki, Ishmael mai taoli Gilead hinou Ejipt hi holai tea ta-a buyu zhingaore. Puletao vei rachophao hisü ha meare dzü, va narai pou ae kaivei pou pfülai. 26Süthaisü Judah nou china maitao hi paoe, “Etao thaihou touye southa-a poku khaiyu sü dai koyu bue? 27Ishmael maitao hi zholoua bailai khe, puhsü Etao zhe zhoyu thaihou baiyu thaifüa souyuwo southa laimokhe.” Sünasü chinamaitao hrülai nou ae-ao toure. 28Sükua Mediamai husoumai taonou takouyu kisü puletao nou Josef ye sü raobvü hinou vakou paipaloua shahu kai nou Ishmael mai hi zhothou peire alia puletao nou Josef ye sü Ejipt hi saho tare.
29Reuben nou dakhai ve raobvü hisü zhuyu phaki Josef sü ngaomore, südonou puhvei sabanü sü paiphare, 30alia puh chinamaitao hisü dakhai kou paoe, “Nahpoutu nasü hare, E chuo dai soulai?”
31Süthaisü puletao nou nghitu ali dathaloua Josef vei zaocha nasü souzhe naloure. 32Puletao nou zaocha nasü poloua pove puo hi ngao-a paoe, “Etao nou zao haina ngaoloue, haina hai ne nahpoutu vei zao homosa?” 33Puhnou zaocha nasü shiloua paore, “Ovai, haina hai anah poutu vei zaocha nasüre! Puhye sü soukhaona nou avei mosoua daode sasawua nütoulou laire.” 34Süthaisü Jakob nou levea-a puhvei sabanü sü paiphare alia louhsa baloua teile soli puh nahpoutu donou dopfüe. 35Puh nah naotu poutu hrülai nou ve puhye jüsouva-e, ana puhnou lesa paba-a “Ewo dopfüa athaimai kikouh anah poutu hi hota bailai” tea paore. Sükua puo nou Josef vanou dopfüa krae.
36Süpha teile hisü Media mainou Josef ye sü Ejipt hi Pharaoh veo vei reihmai peikhowo Potiphar bah hi zhothou peire.
Currently Selected:
SHURAI 37: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
