EZEKIEL 32
32
Ejipt hi Veoye Dzü hinou buyu Keipaoduye Paonadayu
1Etaoye vakou nüpoa tayu po kiahai khouh kiahai vei khoukha arai zhou hai Mapao nou ahi haibüa paoe, 2“Thai bailaiyu pu, Ejipt hi Pharaoh veoye donou dopfüa kouliliyu ali soupeio ae puh hi avei chipao haina hai paopeio: Ne lah ne hai tyahrütao hinou chipeikhaodu nasüe tea tsüchowe, ana ne hai dzü hinou buyu keipaodu nasü baie. Ne phi nou rei dzü taikü peiwe ae reitao hai soushipeiwe. 3Tyahrütao nou tave jülouyu phaki, Enou neye sü khahbesah nou beloulai, ae puletaoye panou neye sü reipe hi daopa khaiwulai. 4Enou neye sü deiphi hi khilaikhai peilai ae deiphao hi buyu raohou ae hrikhaona khesü save panou neye toulai. 5Enou nevei thaiphaotao hai deichitao hi ae deikhotao hisü poa raopeilai. 6Enou ne vei zhe hai deichitao pei hi lazü peilai ae reitao hisü panou kü phoupeilai. 7Enou neye souhayu phaki, Enou ratei sü howulai ae teivu khesü panou maita-a bailai. Enou teinghei sü panou teihao nou holoulai ae khouh nou puhvei ava sü peimoa bailai. 8Enou rakiva ava buyu teitei sü souhalai, ae nevei deiphao sü panou zhitei-a bailai. Haisü Ramai Mapao nou paowe.
9“Enou neye nüpoa nenou sükhai moyu teidei, tyahrütao hrohinou satayu phaki Enou mai taoli vei tsüle hai souvea peilai. 10Enou ne hi soupeiyu khesü ngaoloua tyahrü taoli hai khupa soulai. Enou avei khoche poa zhapeiyu phaki, vemai taoli hai ngaopi sholai. Ne kaodutayu teithe hi puletao mai hrülai nou lah puletao vei hümai donou ngaopi-a ngulai.”
11Ramai Mapao nou Ejipt vei veo hi haibüa paoe, “Babilon hi veo vei khoche sü ne pei hi velai. 12Enou tyahrütao vei zhaipou shishoa buyu reihmaitao vei khoche sü panou paipa loulai ae nevei mai hrülaiye sü panou southakhai toulai. Nevei mai hrülai ae nenou khaophu soua buyu na veishi hai panou souhakhai toulai. 13Dzü veisho-a buyu hinou hrüyu nevei kikhaorü khesü Enou southalai. Sühisü panou mai moyuma kikhaorütaoye panou dzü sü souküpu khailai moe. 14Enou nevei dzü khesü panou leirei-a nou bubailai ae rei khesü panou kaonaphi tea nou küa bailai. Haisü Ramai Mapao Enou paoe. 15Enou Ejipt teidei hai soushi-a khaipeiyu thai, ae sühinou hrüa buyu maitaoye souhayu thai, puletao nou E hai Mapao-e touyu sü süloulai. 16Paopi peiyu chipao haitao nou koulilia puletao thaiyu vei lou soulai. Tyahrütao vei naotumai nou hai nasü dopfüa nou Ejipt ae sühi hrüa buyu maitao donou soulai. Haisü Ramai Mapao Enou paoe.”
Athai Maivei Deiphao
17Etaoye vakou nüpoa tayu po kiahai, khouh ali vei#32.17 Larübvü ali hi khouh ali vei; Hebrew hi larücha haina hae. khoukha kiangou zhou Mapao nou ahi haibüa paoe, 18“Thai-a bailaiyu mainare, Ejipt hi maitao donou dopfü peikhaio. Puletaoye sü khouko bushoyu tyahrütaoye koa nou thaimei vei deiphao hisü seikou peikhaio. 19Puletao hisü haibüa paopeio:
‘Ne hai mai kukhe jünou hüveipu hie tea tsüchovu?
Ne hai thaimai vei deiphao hisü hotalaire,
ae Ramai sümoyu maiye koa dazü talaire.’
20“Ejipt maitao hai soureih hinou thaitayu maitaoye koa kaodu talai. Puletao mai hrülaiye southare donou khoche soudawure.#32.20 Haibüyu nanou kaoyu phae Puletao...khoche soudawure; Hebrew hi sheesha timoe. 21Khouko veishoyu aduso maitao ae Ejipt maiye donou soureih soupeiyu maitao nou Ejipt maiye thaimai vei deiphao hinou kho-a nou bulai. Puletao nou haibüa shalai: ‘Sheemoyu maitao, soureih hinou thaiyu maitao hai buh hai hi koure ae hai hinou puletao sü dazüwe!’
22“Assaria nou puhvei reihmaitao khüh nou sühaopoa nou bue. Puletao mai hrülai hai soureih souyu hinou thai-e, 23ae puletao vei khüh hai athai maivei deiphao akhai khailai hinou bue. Puhvei reihmai hrülai hai reihbu hinou thaikhai toure ae puletao vei khüh sünou puhvei khüh hai sühaopoa nou bue. Teile ali hi puletao nou ahri maivei teidei hai soupi peie.
24“Elam-a sühinou puhvei reihmaitao vei khüh nou sühaopoa nou bue. Puletao mai hrülai hai soureih souyu hinou thaikhai tou-e ae puletao hai heebi moa thaimai vei deiphao hisü koutare. Hri-a buyu teile hi puletao nou maiye soupi peie, ana chuo puletao hai hraongu pfüa thaitare. 25Soureih hinou thaiyu maitaoye koa Elam hai dazü tare, ae puhvei reihmaitao khüh nou puhvei khüh hai sühaopoa nou bue. Puletao mai hrülai hai heebi moe, mai hrülai hai soureih souyu hinou southakhai-a baie. Hri buki puletao nou maiye soupi-e ana chuo puletao hai thaitare ae hraongu ngaore ae soureih hinou southayu maitao bütoua puh-a thaitare.
26“Meshek ae Tubal-a sühinou bue, ae puhvei reihmaitao vei khüh sünou sühao poa nou bue. Puletao mai hrülai nou heebi moe, soureih souyu hinou southakhai-a baie. Teile ali hi puletao nou hri-a buyu maiye soupi peie. 27Puletaoye raichoki aduso maiye tsükhou sho-a poa daovuh peiyu büa daovuh peimoe, puletao hai reihna tutaopfüa puletao vei khoche hai puletao vei pei khai-a ae puletao nou rütao#32.27 Haina nou kaoyu phae rü; Hebrew mahmotao. hai puletao vei püphao hi pfüa athai maivei deiphao hi hotawe. Mai haitao hai teile ali hi ahri maiye soupi peie.
28“Chou Ejipt maiye sü heebi moa soureih hinou southakhai touyu maitaoye koa panou züzhi laire.
29“Edom-a sühinou puhvei vemaitao ae peikho maitaoye koa bure. Puletao hai khouko veishoyu soureih maitao-e, ana chuo puletao hai athai maivei deiphao hinou heebi moa soureih hinou thaiyu maitaoye koa nou dazüa bure.
30“Reilova nou buyu veo maivei nahpoutu mai hrülai sü sühinou bue, ae Sidon mai-a sühinou koa nou bure. Puletao vei khouko hai vuli hi maikhe mainou ngaopi shoe, ana chuo puletao hai hraongu pfüa soureih hinou thaiyu maitao ae heebi moyu maitaoye koa nou bure. Athai maivei deiphao hi hraongu pfüa hotayu maitao raibüa puletao-a hotare.
31“Soureih hinou thaiyu mai hrülai ngaolouyu phaki Ejipt hi veo ae puhvei reihmaitao hai asalai,” tea Ramai Mapao nou paoe.
32“Enou Ejipt hi veoye panou hriyu maitaoye soupi peie, ana puh ae puhvei soureihmai hrülai hai southakhai toulai ae heebi moa soureih souyu hinou thaiyu maitaoye koa nou dazü talai.” Haisü Ramai Mapao nou paoe.
Currently Selected:
EZEKIEL 32: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
