EZEKIEL 29
29
Ejipt donou Rachipaoyu
1Etaoye vakou nüpoa tayu po kirou, khouh kirou vei khoukha kirou zhou hai Mapao nou ahi haibüa paoe, 2“Thai-a bailaiyu mainare, Ejipt hi veo pei hi aetou moe tea rachipaola peio. Puh hi paopeio, süolouzü puhye ae Ejipt teidei veishi nou tudee laire. 3Ramai Mapao nou Ejipt hi veoye haibüa paoa nou bure tea paopeio: Rei dzü hinou dazüa buyu keipaodu, Enou neye ngaobayu mai nasü souta laire. Nenou Nail Rei hai nevei baie ae nenou souloua baie tea nou pao-a bure. 4Enou nevei khou hinou khasüshu nou thou vaoloua neye koa Nail rei hinou buyu khatao hai vakou paipa khaiwulai. 5Enou neye sü kha sütao noupu koa radeiki hi laikhaiwulai. Nevei pfüphao hai deiphi hi laikhai-a bailai ae daovu peimoa khaiwulai. Nevei pfüphao hai rehou ae rekhaonatao nou touso soua nou toulai. 6Süthaisü Ejipt mai hrülai nou E hai Mapao-e touyu hai süloulai.” Mapao nou paoe, “Israel mainou Ejipt maiye puletaoye soukha peishulai tea vuzhi-a nou bue, ana ne hai shiyu süüpo ali jünou veipu moe. 7Puletao nou ne hi veyu phaki, ne sü chatare, puletao vei bah sü khüpeire ae khya sü daiwure. 8Südonou chuo Ramai Mapao Enou ne hi paowe süolouzü neye khoche poloua dure maiye sü Enou seive peilai, ae puletao nou nevei maitao ae kikhaorü khesü southakhai toulai 9Ejipt teidei hai soushi khaiwua panou sakhai-a bua bailai. Süthaisü nenou E hai Mapao-e touyu süloulai.
“Daiolouzü nenou Nail Rei hai nevei baie ae nenou soupei baie tea paoyu donou, 10Enou neye ae Nail rei ye hraiyu mai souta laire. Enou Ejipt veishi hai panou sakhai-a bua bailai, reilova buyu Migdol nuhdu hinou poa khelova buyu Aswan nuhdu koute ae Sudan maivei deirai hi koute hai soushi khaiwulai. 11Mai moyuma hrikhaona ali-a panou sühisü hrülaimoe. Po raidai koute hai panou halia hrüa bulai moe. 12Enou Ejipt hai deiphao hi panou shikayu tyadei ali soulai. Po raidai koute hai Ejipt maivei nuhdu khesü soushi khaiwulai, Nuhdu kukhe aliro sübüa soushi khaimo hie. Enou tyahrütao hrohi Ejipt maiye sü sou rarou laiwulai ae puletaoye tyadei hrülai hi hupho rarou khaiwulai.”
13Ramai Mapao nou paoe, “Po raidai thaisü Enou Ejipt maiye soupho rarou khaitouyu tyahrütao hinou puletaoye sa-a dakhaive peilai, 14ae puletao vei teidei, Ejipt khelova hinou panou hrüa bulai. Puletao hai lülou hoyu tyahrü ali soua bulai, 15ae vedeitao hrohinou puletao hai tainou kayu vedei ali soua bailai ae puletao nou tyahrü kukhe aliye tukha-a nou hrüpulai moe. Enou puletaoye sü komoyu ae taishoyu tyahrü ali soupeilai, sübüa puletao nou jüpayu vah ali-a tyahrü kukhe hi souloulai moe. 16Israel mainou puletao vei soukha nasü vuzhipu khailai moe. Ejipt mai hi vepayu hai khesü Israel maiye panou puletao hi vuzhia buyu daizhou koute vosa touyu nasü licho loulai. Süthaisü Israel mainou E hai Ramai Mapao pue touyu süloulai.”
Veo Nebukhadnezzar nou Ejipt Mai jünou Reih Veilouyu
17Etaoye vakou nüpoa tayu po kainai, khouh arai vei khoukha ali zhou Mapao nou ahi haibüa paoe, 18“Thai-a bailaiyu mainare, Babilon hi veo Nebukhadnezzar nou Tair maipei hi soureih soure donou tuda-a nou bure. Puhnou puhvei reihmaitao hai panou kou sühsho-a pfüyu donou puletao vei pei sü kire ae phao sü neasasawure ana veo nou moa reihmaitao nou veasho-a soukhai touyu khesü Tair mai hinou halia ngaoloumore. 19Südonou chuo Ramai Mapao nou haibüa paoe: Enou Ejipt maivei teidei hai Veo Nebukhadnezzar hi peiwulai. Puhnou Ejipt maivei kini buyu veishi sü potawulai ae sütao hai puhvei soureih maitao vei shizho phasoua nou peilai. 20Puhnou avei kuvah soukhai touyu thaifüa puhvei zhohabo soua Enou puh hi Ejipt hai peilai. Haisü Ramai Mapao Enou paowe.
21“Haibüyu khesü vepare toulouzü Enou Israel maiye soukhoupu peilai, ae Ezekiel neye panou mai hrülai nou keilou süyu hinou raopa loulai, sükulouzü puletao nou E hai Mapao-e touyu hai süloulai.”
Currently Selected:
EZEKIEL 29: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
