EZEKIEL 27
27
Tair Maiye donou Dopfüa Kouliliyu Lou
1 Mapao nou ahi haibüa paoe, 2“Tair maiye donou dopfüa kouli liyu lou hainasü soupeio. 3Nuhdu süna hai zaidu pehao hinou bue ae süpe hinou buyu maitao hi puhnou huha hai soupeia nou bue. Ramai Mapao nou puh hi haibüa nou paopeio tea paoe:
‘Oh Tair, ne hai lichekho tea nou hüveiwe tea khaophu sü soure.
4Nevei ki hai zai hinou bue,
Neye soupeiyu maitao nou neye sü hüveiyu hai lichekho tea nou soupeie.
5Puletao nou Hermon Deichi vanou haosüübe sü poloua lukhao hai soupeie,
ae Lebanon hinou sedar süü nou poloua nevei dzüluki sü soupeie.
6Puletao nou Bashan hinou phüsüü sü poloua dzüluki shaoyu süü nasü soupeie;
Puletao nou Saipras hinou haosüübe sü poloua dzüluki khevai khuyu nasü soupeie,
ae süpei hisü praongi nou souhopeie.
7Teikhai panou hüpoa tare vei sah nasü Ejipt hinou sahcha daothou khaitouyu züzüyu sah nou soupeie,
ae hoshoa buyu hia neye sü shee loue;
Haosah khesü Elishah zaipe hinou poveyu sah aveih tya maomüa papayu sah nou haopei khaitoue.
8Nevei dzüsah shaoyu maitao hai Sidon ae Arvad nuhdu hinoue.
Nevei dzüluki pfüyu maitao hai Zemer hinou süveih shoa buyu maitao-e.
9Nevei dzüluki souyu maitao hai Biblos hinou dokai veishoyu maitaoe.
Zaidu hinou dzüluki pfüa laiyu mai hrülai nou tave ne hinou hupona khesü hüwe.
10“ ‘Persia, Lydia ae Libya hi reihmaitao nou nevei reihmaime soupeie, ae puletao nou nevei reihmai nou buyu buh hi rü ae hupeirü khesü pove peie. Mai sütao nou nevei kathe sü soupeie. 11Arvad hi soureih maitao nou nevei kivo khesü khopeie, ae Gamad hi maitao nou nevei kushoyu kipeitaoh khesü khopeie. Puletao nou puletao vei rü khesü nevei kivova hi pove hrakhai peie. Puletao nou neye southou hüveiyu hai lichekho toupeie.
12“ ‘Spain mainou neye koa huha hai souwe, ae puletao nou nevei na khesü shahu, hu, tin, ae mishin hu nou pove lealouwe. 13Nenou Grees, Tubal, ae Meshek hinou huha hai souwe, ae nevei huponatao nou poa qilamai ae baosahu khesü hüloue. 14Nenou nevei huzona khesü nou poa nou rhei, pfüa reih souyu rhei, ae rheisüh khesü Beth Togarmah hinou hrüloue. 15Rhodes#27.15 Larübvü ali hi Rhodes; Hebrew Dedan. mainou neye koa huha hai souwe; zaipe hinou hrüyu maitao nou puletao vei paongi ae muteiyu süü khesü pfüve nevei huzona khesü leawe. 16Sairia hi maitao nou nevei huponatao ae nevei teidei hinou payu na khesü hüloue. Puletao nou ne hi muteiyu emerald chuh, maomüyu sah, cha daothouyu sah, züzüyu sah aveih tya, ae rubi chuh mutei tya hai pove nevei hupona khesü leawe. 17Judah ae Israel mainou nevei hupona hai southou,#27.17 Hebrew hi larübvü hi larücha ahai loupu hie, ana daipaowe touyu sümoe. laivoudzü, oliv theadzü, ae poukai nüvei taonou pove hüwe. 18-19Damakas hi mainou nevei huponatao hai Helbon vei zhaoh ae Sahar#27.18-19 Hebrew hi larücha asü loupu hie, ana daipaowe touyu sheesha tea sülou more. vei soumaisah nou pove peia polouwe. Puletao nou hu ae poukai nüvei nou pove neletao vei hupona khesü hüwe. 20Dedan hi mainou neletao vei hupona khesü rhei pfüyu sah khenou pove leawe. 21Arab hi maitao ae Kedar teidei khoyu maitao nou neletao vei hupona khesü zhaotu, nghitu ae kikhaorü khenou pove peia nou polouwe. 22Nevei na khesü Sheba ae Raamah hi hupomaitao nou mutei chuh, sana ae veikayu poukai nüvei khenou pove leawe. 23Havan, Kanneh ae Eden nuhdutao, Sehbar hi huzomaitao, Asshur ae Khilmad nuhdutao hi maitao nou neye koa nou huha hai souzhowe. 24Puletao neye sabanü veikayu tya, maomüyu sah, chakuthou khaitouyu sah, veisho-a zhusa peikhaitouyu deikhusah, ae veisho-a soukhai touyu rai khesü pove peiwe. 25Nevei hupona khesü dushoyu dzüluki khenou pfütawe.
Ne hai zaidu hi dzüluki ali büwe,
Na khesü pothou phoutsü khailouyu büe.
26Nevei dzüluki pfüyu mainou neye zai hi pfülou tayu phaki
Teinghei palova vei teikhai sünou neye sü deithe hinou hrosho-a hüpo tare.
27Nevei nangi ae hupona veishi,
Nevei dzüluki pfüyu mai hrülai,
Nevei dzüluki souyu maitao ae huzomai teitei,
Dzüluki hinou laiyu reihmai hrülai,
Mai hrülai hai dzüluki pepo tayu phaki zaidu hinou hakhai toure.
28Dzüluki pfüyu maitao nou dzünou maotha laire tea rayu hai zaipe hi koute-a choupare.
29“ ‘Dzüluki veishi hai chuo thaokhaiwua tare,
Dzüluki pfüyu mai hrülai sü zaipe hi patare.
30Puletao mai hrülai nou neye donou dopfüa nou bure.
Puletao vei pei hisü nai bosho loure ae vonai hinou kou da-a nou bure.
31Neye donou puletao vei pei sü saiwure,
ae puletao hai soukousah nou banou-a bure.
Puletao nou levea sho-a nou kra-a bure.’
32Puletao nou haibüa neye donou kouli lia nou bure:
‘Thaonou Tair ye sü paona dalai,
Chuo Tair hai zai hinou zei tea bure.
33Nevei huponatao nou zaidu nasü tachopa louyu phaki,
Tyahrü veishi vei jüpa nasü soupeie.
Nevei huzonatao nou Veo maitaoye sü soungi papeie.
34Chuo ne sü zaidu hinou pepo tare.
Ne sü chuo leikou zai tei hinou bure.
Nevei natao ae neye donou vah souyu maitao hai zaidu hinou hakhai tire.’
35“Ne hi vepayu hai süloua zai pe hinou hrüyu mai hrülai sü ngaopi shore. Vemaitao koute-a ngaopi shore ae puletao vei pah hai ngaopiyu nou phoutaore. 36Ne sü hatare, teisa donou hatare, ae deiphao veishi hi hupomai hrülai nou ngaopi shore, puletao hai-a ne büa hakata-a bailai moma tea ngaopisho-a nou bure.”
Currently Selected:
EZEKIEL 27: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
