EZEKIEL 2
2
1“Thai-a bailaiyu mainare, lashulo Enou neye cha nüwe.” 2Pai sünasü rao-a buyu teile hinou Ramai vei rako sü ahi louloure ae Eye polashu peiwure ae haibüa chi paopuyu sü Enou choue. 3“Thai-a bailaiyu mainare, Enou neye sü Israel maitao hi seitalai. Puletao hai Eye khaityare alia ahinou tavai tare ae chu koute Eye puletao vei puopaoh maitao büa nou du-a bure. 4Puletao hai rochi shore ae Eye tsükhou peimoe, südonou Khoukhoulai Mapao Enou haibüa paowe touyu nasü neye panou puletao hi pao peire donou Enou neye puletao hi seitalai. 5Khaityayu maitao nou nevei chipao sü keipei-a keipei moyuma puletao vei hrohisü rachipaola peiyu mai bue touyu sü puletaoye panou süloulai.
6“Ana thai-a bailaiyu mainare, ne puletaoye ngaopiso, moa puletao vei chipao khesü piso. Puletao nou neye paoshilai ae ngaoralai; puletaoye koa hrüyu hai tushi shoyu chuhlyakhaoye koa buyu bütoua bailai. 7Enou ne hi paopeiyu chipao khesü puletao nou keipei-a moa keipei moyuma puletao hisü paopeio, puletao hai rochi-a khaityayu maitao baie touyu hai licholo”
8“Thai bailaiyu maipure, Enou ne hi paoyu chipao khesü keilo, Enou neye peilaiyu nasü ne mü hepalou-a sünasü touthoulo” 9Enou bah ali hai ahilo thaikouyu sü zhingao-e ae bah sünasü larübvü ali poa nou bue. 10Puhnou larübvü nasü ahi houpa ngao-e ae sühisü levea krayu, dopfüyu ae leyu khesü rüthou khaitoue.
Currently Selected:
EZEKIEL 2: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
