TAPALOUYU 32

Sana nou Souyu Chode

(Chi 9.6-29)

1Moses nou deichi hinou koumoyu phashoyu koukhaie, Israel maisou nou tave jüloua Aaron hi paoe, “Etaoye Ejipt teidei hinou sapa peiyu Moses sü kabüa laidesa Etao sümore, südonou Etaoye sa-a tapeire ramai ali soupeio.”

2Aaron nou puletao hi paoe, “Neletao khapfü ae nahmaitao nou noua buyu sana noubo khesü phaloua ahi pove peio.” 3Südonou mai hrülai nou puletao sana noubo khesü phaloua Aaron hi pove peie. 4Puhnou sana noubo khesü poloure, alia sükhesü pothou meidei loua chode zhairai ali soupa loure.

Süthaisü maikhe mainou paoe, “Oh Israel maitaore, ramai hai nanou Etaoye Ejipt teidei hinou sapa peiyu nasüre.”

5Süthaisü Aaron nou sana chode pa hinou posheelabu ali soushu loure alia maikhe mai hi paoe, “Dosho Mapao ye tsükhou-a nüh nülai.” 6Thainesho shona sü puletao nou kikhaorü pove meidei-a posheela-e ae kaonayu posheela-a pove peie, alia maikhe maitao nou khonüh nüre donou kou buloure, alia touso zhiloua vah ashi tya-a soutare.

7 Mapao nou Moses hi paoe, “Thasho-a nou dakhai koutawo, daiolouzü nenou Ejipt teidei hinou sapakhai touyu nevei maitao sü mah soutare alia Eye malaiwure. 8Enou puletaoye haibüa talo tea kharochi peikhai touyu khesü tamore, puletao hai lah bah nou chode ali souloua sünaye sü tho-a posheela peia baire, alia haibüa paore, ‘Oh Israel maitaore, ramai hainanou Etaoye Ejipt teidei hinou sapapeie.’ ” 9Mapao nou Moses hi paoe, “Enou mai haitaoye ngaora-e, puletao hai maikho mairo lia zübae. 10Chuo puletaoye souhawure donou avei lekha rarou sü phoukha loure, Eye nuwuso. Ana Enou neye louzü dushoyu tyahrü ali panou soulai.”

11Ana Moses nou puhvei Ramai Mapao hisü haibüa zhuvea peio tea nou khowe, “Oh Mapaowo, daisounou khupasoua nevei khouko nou Ejipt teidei hinou sapapei khaitouyu nevei maitao pei hisü rarou showe? 12Daisounou Ejipt maiye panou haibüa paolai, ‘Puletaoye souhawure donou sata baie alia deiphao hinou souhawure donou sata baie.’ Nevei lekha rarou nasü khaipeia baio, ae nevei maitaoye souhawulai touyu nasü khaipeia baio. 13Nenou nevei kilai Abraham, Isaak ae Jakob hi haibüa chaachou soukhai touyu nasü licho peio, ‘Enou nevei tyaosholea khesü rakiva teivu zhoua panou tyakaa palai, ae Enou paokhai touyu teidei teitei sü nevei tyao sholeaye panou teisa vei soua hrülai.’ ” 14Süthaisü Mapao nou puh vei maitaoye souhalai tea tsücho khaitouyu nasü le datare.

15Moses nou deichi vanou chikhatao rüthoukhai touyu chuh ahai sü poloua takou tare, chuh süna ahai hisü pavai-a ae thaivai-a chikha khesü rüthou khaitoue. 16Chuh süna ahai sü Ramai nou souyu chuh-e alia Ramai bah nou chikha khesü rüthou peie.

17Maikhe maitao nou shusoua rayu paisü Joshua nou süloukhaie, puhnou Moses hi paoe, “Fühao hisü Enou reihvo souyu pai chowe.”

18Ana Moses nou puh hi paoe, “Süsü reih veiloua sa-vo souyu pai moe, moa reih veiloumoa dongai pfüyu shi-a moe, ana maikhe mainou sava-a lou souyu pai baie.”

19Moses nou puletao vei fühao hi nghikouyu phaki, puhnou maikhe maitao nou asah soua buyu ae bah nou chode ali soukhai touyu ngaoloua rarou shore, ae puhnou polaiyu chuh nasü deichi phi hinou deiphi laikou deikhowure. 20Puletao nou soukhai touyu sana chode nasü puhnou poloua meinou deithou nghizüzü loure alia sünasü puhnou dzü thouhrü loua panou puletaoye ke-e. 21Puhnou Aaron hi paoe, “Mai haitao nou ne hi dai vahli soupeia panou puletaoye haibüyu mah sü souge?”

22Aaron nou Moses hi paoe, “Apaopuwo, ahi rarou peiso, ne-a süwe, süolouzü mai haitao hai vah ashi soulai tea tsütei touloua baire. 23Puletao nou ahi haibüa paoe, ‘Etaoye sata peire donou ramai ali soupeio, daiolouzü Etaoye Ejipt teidei hinou sapa peiyu Moses sü daipha soutaresa Etao sümore.’ 24Südonou Enou puletao hisü paoe, ‘Maitaralia zhusana buyu maisü ahi pove peikhaio.’ Süthaisü puletao nou sana khesü ahi pove peie, ae Enou sana khesü mei hi thou deipei khaie chode hainasü paloure.”

25Maikhe maitaoye Aaron nou tukhalou moa panou lahdodo soua hrüyu ae ngaobamai jünü soua buyu sü Moses nou ngaoloure. 26Südonou Moses nou fühao vei robomü hinou laloua share, “Thaothao mainou Mapao hilova bulaige, sümaitao hailova koulo!” Puh hisü Levi mai hrülai nou kou jüloure. 27Süthaisü puhnou puletao hi paoe, “Israel maivei Ramai Mapao nou haibüa kharochi peiwe, süolouzü neletao mai hrülai nou khoche pokhai touloua neletao thaihou jürai maitao, khamai samaitao ae kinapa maitaoye fühao vei robomü hai hinou poa robomü holova koute southa khaiwo.” 28Levi nahpoutu maitao nou Moses nou kharochi peiyu büa souwe, ae süzhou teithe mai thesü phali thaire. 29Süthaisü Moses nou puletao hi paoe, “Zhou teithe neletao nou lah neletaoye soushee loua Mapao vei vah soure donou soukupa loure, daiolouzü neletao nou lah neletao nahmai, thaihou jürai maitaoye southawure. Südonou neletaoye sü zhou teithe Mapao nou hapeiwure.”

30Thainesho sü Moses nou maikhe mai hi paoe, “Neletao nou dushoyu mah sü souwure, ana Enou deichi hi taopa Mapao ye daopu laihie, ae neletao mah sü panou khaipeire donou kholai.” 31Moses nou dakhaipa Mapao hi paoe, “Maikhe mainou dushoyu mah sü souwure. Puletao nou lah sana nou ramai sü souloua tho tare. 32Ana zhuvea puletao mah sü khaipeio; nenou puletao mah sü khaipei laimoe toulouzü, nevei larübvü hinou azhih rüthou khai touyu nasü popha laipeio.”

33 Mapao nou puh hi chila peie, “Avei larübvü hisü mah souyu maitao zhih popha-a bailai. 34Chuo ne tawo, nevei maitaoye sü Enou paokhai touyu buh hisü sa-a tawo. Avei rakivamai ali nou neletao jünou rai-a sa-a tapeilai, ana Enou puletao mah vanou puletaoye sü tudee laiyu teile vere.”

35Süthaisü Mapao nou maikhe mai hisü rahta seive peie, daiolouzü puletao nou Aaron ye panou sana chode souyu donou.

Currently Selected:

TAPALOUYU 32: POUMBSI

Highlight

Copy