TAPALOUYU 30

Kai Ngivei Deire Posheelabu

(Tap 37.25-28)

1“Kai ngivei deire donou posheelabu ali akasia süü nou soulo. 2Hainasü sa-jha-a raibütoua soulo. Sa shoyu-a ae jha duyu-a sentimitar 45 nou soulo, alia kuyu nou sentimitar 90 kulo. Kainghou adai hi payu kaitao sü alikhei soua soupa khailo. 3Pei hi thouyu süütao, pehao hi kayu süütao ae kaitao teitei hisü sana nou souholo, alia sana nou pehao teitei sü zhahaolo. 4Posheelabu pehao hinou zhahao khaitouyu khelove hinou, sünaye kaopoa tare donou sana nou lürüa soukhai touyu ahai sü holo ali ae hailo ali tea khithoulo. 5Kaopoa tare süü nasü akasia süü nou soulo, alia süphao hisü sana nou souholo. 6Posheelabu sünasü vo sübvü pei hi buyu haosah pa hi ae vo sübvü khaiyu pei hi buyu zhuvea apei buh pa hinou khailo alia Enou buh sühinou neletaoye ve daolai. 7Aaron nou teisa ve shona meivabvü sousheeyu phaki, posheelabu sühisü kainüvei pou mei deilai. 8Puhnou koukhe ve meivabvü nasü mei taoyu phaki-a kainüvei nasü mei deilai. Hainasü haithai vere khaphao teitei hia soukou telai. 9Posheelabu haina hisü neletao nou sheemoyu kainüvei pou mei deilai moe, kikhaorü vei posheelayu-a mei dei laimoe, shinamara moa thoudzü posheela laimoe, moa zhaoh-a nghoukhai laimoe. 10Potei ali hi bakha ali Aaron nou posheelabu sousheeyu naanou nahai mah khailu peire donou posheelayu souzhe nou posheelabu pehao teitei hisü neapeilai. Hainasü haithai vere khaphao teitei hia poteisa sü soulai. Posheelabu hainasü Mapao donou shee kayu ali soua pothou peilai.”

Ratho Kipao donou Kikhah

11 Mapao nou Moses hi paoe, 12“Nenou Israel maipei choyu phaki, mai alili nou lah vei hrümai khailupa loure donou puh vei muh sü Mapao hi peilai, sükulouzü nenou puletao zhih rüveyu phaki puletao hisü rahta velai moe. 13Zhih rüthou louyu mai hrülai nou rathoki hi sühdouyuna thaifüa shekel (shekel ali hai gerah kai-e) dahli hai Mapao ye peilai. 14Maipei choyu hi zhih rüthou louyu mai hrülai, po kai nou süpei payu mainou Mapao ye posheela pove peilai. 15Toungi mai-a panou peipu laimoe, moa touha mai-a panou peikhai laimoe, daiolouzü hainasü lah puletao hrümai khailupa loure donou Mapao hi pei-a baie. 16Israel mai hinou khailupa peire donou kikhah khalouyu pousha taosü poa Enou buyu Ratho kipao hi vah soulai. Kikhah hainasü puletao hrirai khailupa peire vei muh nasüe, ae Enou puletaoye vupa peire sü ngaikhai toulai moe.”

Baosahu vei Raikhao

17 Mapao nou Moses hi paoe, 18“Phibah khüre donou phi pfüyu raikhao ali baosahu nou soulo, ae sünasü Enou buyu Ratho kipao ae posheelabu kohi dzü thouloua khailo. 19Aaron ae puh nahpoutu maitao nou sühi nou phibah khülai. 20Puletao nou Ratho kipao hi veyu phaki moyuma Mapao hi meidei-a posheelayu vah soure phaki, puletao thaimore donou phibah dzü khülai. 21Puletao nou puletao phibah dzü khülai, sübüa khümore toulouzü puletao hai thai-a bailai. Haibüa souyu hainasü puletao nou teisa soure zhai ali soua talai, ae haithai vere bonakha-a soukou telai.”

Poa Neare Theadzü

22Süthaisü Mapao nou Moses hi paoe, 23“Vusa veikayu tya — kaingi veiyu myrrh poudzü kilo arou, kainüvei agor süü kilo asü, alia kainüvei shibadzü kilo asü, 24alia kaivei changhou kilo arou polo (haitao teitei sü maisou nou ta-a buyu sühdouyu hinou doulo). Süpei nou oliv theadzü litar adai thoulo. 25Haitao teitei thouhrü loua kaivei shoyu ae sheeyu poa neare theadzü soulo. 26Neare theadzü haina sü poa Ratho kipao, Vo Sübvü, 27taibel, paikhao, meivabvü khaibu ae sühi buyu natao, kaivei deiyu posheelabu, 28meidei-a posheelabu, ae sühi buyu natao veishi, alia phibah khüre raikhao khesü poa theadzü neapeio. 29Haibüa soushee loua popeio, süthaisü haitao hai sheesha tea bailai. Süthaisü mai tarali noua moa hatarali nou kou hainaye deilouzü sünasü sheeyu vei khouko buyu vanou deiyu naye sü soushi-a bailai. 30Süthaisü Aaron ae puh nahpoutu maitaoye neapei-a pothou soushee loua panou napao mai ali soua avah soutalai. 31Israel mai hi haibüa paopeio: ‘Haina hai neletao vei khaphao teitei hi avei sheeyu poa neare theadzü ali soulai. 32Poa neare theadzü haina sü mai tarava hisü noulai moe, ae haibüa thouhrüloua poa vah soulai moe. Haina sü sheeyu theadzüe, ae haina sü neletao vei sheeyu theadzü soulai. 33Mai tarali noua hai raibüa thouhrü loua poa vah soulouzü moa hakinou tarasoua maiva nealouzü sükhe maiye sü avei mai-e tea popeilai moe.’”

Meideiyu Pou Kainüvei

34 Mapao nou Moses hi paoe, “Kainü veiyu pou haitao sü zhotou toua polo: kainü veiyu stacte pou, onycha, galbanum, ae frankincense pou kaivei. 35Kainüvei pou souyu mainou souyu büa haitao sü thouhrüloua meideire pou soulo. Sünasü panou vei-a ae sheesha tea buloure donou tai thouhrülo. 36Enou neletaoye ve daore Ratho kipao hi Vo Sübvü khaiyu buh pa hisü daotu deisasa loua khailo. Hainasü neletaoye donou sheekayu nasü soulai. 37Kainüvei pou taralia neletao lahye donou haibüa soulai moe. Hainasü Mapao hi peithouyu mashee ali-e tea polo. 38Mai tarali noua kainüvei pou haina büa soulouzü puhye sü amai moe tea malaiwulai.”

Currently Selected:

TAPALOUYU 30: POUMBSI

Highlight

Copy