TAPALOUYU 18

Jethro nou Moses hi Veyu

1 Mapao nou Israel maiye kabüa Ejipt hinou sapapeie, ae Ramai nou Moses alia Israel maiye donou vah soupeiyu teitei sü Moses paoh, Midia hi napao Jethro nou chouloure. 2Südonou Moses nou thaowua tayu puh chapfü Zipporah ye sü puh paoh Jethro nou saloure, 3alia honapai nahpoutu ahai noupu Moses hi save peie. Nahpoutu ali zhih nou Gershom touwe, (daiolouzü puhnou paoe, “Enou vakou maivei teidei hinou shetumai ali soue”), 4alia kukhena zhih sünou Eliezer tea sapeie, (daiolouzü puhnou paoe, “Apuo Ramai nou Eye soukha peie, alia Eye Pharaoh bah hinou vupa peie.”) 5Moses paoh Jethro nou Moses chapfü ae nahpoutu ahaiye sa-a puhnou radeiki hinou fühao soua buyu Ramai vei deichi hisü ve-e. 6Puhnou mai ali seiho Moses hi paoe, “Ne paoh Jethro, Enou nevei chapfü ae nahpoutu ahai sü salaire.” 7Moses nou puh paoh ye sü daolai tea tapare, ae puhnou takou puh paoh ye sü nakou khurüe alia mü mupeie. Puhai nou aliliye vei-a buho moe tea chakuloue, süthaisü Moses nou puhvei sahpao hisü sa-a louloure. 8Moses nou puh paoh hi Mapao nou Israel maiye donou Pharaoh veo hi ae Ejipt mai hi soupeiyu vah teitei, puletao nou lududo hi ta-a buki Mapao nou puletaoye kabüa khailupa peie touyu khesü paongao peie. 9Jethro nou Israel mai hi Mapao nou vah aveih soupeiyu teitei ae puhnou Israel maiye Ejipt mai bah hinou khailupa peiyu vanou asa shore. 10Jethro nou paoe, “Mapao ye paosholo, neletaoye Ejipt mai vei qila soua buyu hinou ae Pharaoh veo bah hinou khailupa apeio, Mapao ye sü paosholo. 11Chuo Enou Mapao hai ramai kukhe hrülai jünou dupu hie touyu süloure, daiolouzü Puhnou Israel maiye Ejipt mainou souvea buyu hinou khailupa peiwure.” 12Süthaisü Moses paoh Jethro nou Ramai hi mei dei-a posheela peie, ae Aaron nou Israel maiye süthai-apei mai hrülaiye saloua Ramai nghoujü nou puhye koa tovai vaizhoe.

Chiku-apei Maitaoye Dolouyu

13Thainesho shona sü Moses nou maikhe maivei chi sü kua bue, ae maikhe mainou puh pe hinou shona nou poa koukhe koute la-a bue. 14Moses paoh Jethro nou haibüa Moses nou maikhe maiye donou zhoha-a vah souyu sü ngaoloua puhnou Moses hi paoe, “Ne nou haibüa zhoha-a maikhe maiye donou vah souyu haisü daitouwe? Ne lah likhei bukhai, ae maikhe maiye panou ne pe hinou shona nou poa koukhe koute la-a buyu sü dai vanoue?”

15Moses nou chila peie, “Maikhe mainou ahisü tave Ramai vei leli sü daitouwe tea noue. 16Alia maikhe mainou züveiyu phaki, puletao nou ahi vewe, ae Enou mahzü sü kupeiwe alia Ramai vei chikha khesü puletao hi paopeiwe.”

17Süthaisü puh paoh Jethro nou puh hi paoe, “Nenou soua buyu vah haisü kaomoe. 18Haibüa nenou vah soukou louzü, ne lah vea-a baie alia maikhe mai-a choro-a bailai, daiolouzü vah haitao hai ne lah soua bailouzü neye donou kou süle-e. 19Enou neye vah kabüa soulai touyu sü paodou peilai, ae Ramai panou neye salai peilo! Nenou kamai-a dopaloua maikhe mai thaosou Ramai nghoujü seiveyu sü mahmoe, ae puletao nou soupfüyu vahtao sü nenou Ramai hi povelo, 20ae nenou puletao hi Ramai vei chikha khesü haibüa hrülai, talai ae soulai touyu sü doupeio. 21Maisou hrohinou soulousü mai, Ramai ye piyu mai, louchelou veiyu mai, ae seihla toulai moyu maiye dopaloua panou mai theli, kaih, raingou, ae kirou pei hi khoyu mai tea khailo. 22Puletaoye panou maikhe maivei chiku-apei mai soua bulo. Tateiyu vah khesü puletaoye panou ne hi pove-o, ana talayu vah khesü puletaoye panou lah soulo, sübüa soulouzü neye donou vah thapua baie ae nevei koupo nasü koa puletao nou pfükha peilai. 23Nenou haibüa soulouzü, ae Ramai nou sübüa kharochi peilouzü, nenou veamoa vah khesü soulou süe, ae maikhe mai-a puletao rukhayu sü ngaoloua ki hi dakhai velou süe.”

24Südonou Moses nou puh paoh Jethro nou paodou peiyu büa souloue. 25Puhnou Israel mai hrohinou soulousü maiye dopaloua puletaoye panou mai theli, kaihli, raingou ae kirou pei hi khoyu mai tea khailoure. 26Puletao nou maikhe maivei chilou sü kupeie, chi tateiyu khesü puletao nou Moses hi povewe, ana chi talayu khesü lah puletao nou kuloua baire.

27Süthaisü Moses nou puh paoh Jethroye sü sa-a paota peiwure, ae Jethro nou lah puh ki hi dakhai tare.

Currently Selected:

TAPALOUYU 18: POUMBSI

Highlight

Copy