KOPAODOUWO 3
3
Hahrülai donou Teile Alili Bue
1Hali hala donou pha teile ali bue, alia teikhenou buyu na lily donou teile ali bue;
2Nah nare teile ae thaiyu teile;
shore teile ae shokhaitou nasü paipare teile;
3Southare teile ae souveih peire teile;
souphe-souphoure teile ae soushu palai teile;
4Krayu teile ae nühre teile;
Dopfüre teile ae savare teile;
5Chuh khilaire teile ae chuh pove jüre teile;
khore teile ae kho bare teile;
6Phoure teile ae hawure teile;
pokhaire teile ae khilaire teile;
7Paiphyare teile ae rümure teile;
pai hazhi tea bure teile ae chipaore teile;
8Leshire teile ae ngaorayu teile;
reih soure teile ae kaonayu teile.
9Vah soumai nanou puhvei terouyu hinou patouyu dai bue? 10Ramai nou maiye pa zoha-a bure donou peiyu vah nasü Enou ngaowure. 11Lahkuku vei teile hisü puhnou panou thao shore donou soupeiwure; alia puhnou maivei tsü hisü teile khaiha peiwure, ana arainou akhai koute Ramai nou daie soue tiyu hai puhye pa phoupalou hore hai soukhaiwure. 12Enou süwe süolouzü, puhtao donou hrüa busasü lesa-a ae va-a buyu jünou veipuyu halia hae. 13Alia mai lilinou puhvei teroua souyu hinou touso-a va-a bure hai Ramai vei sapeina alie.
14Enou süwe, süolouzü hatalia Ramai nou souyu nahai teisa nou bua bailai; halia sühi thoupulou hoe ae sühinou poa popa louhoe; Ramai nou maiye pa puhye pia bure donou sübüa souwure. 15Hataralia payu ae palaiyu hai rai-a nou soudawure. Ramai nou süsü panou papu khaikhaire donou soubaie.
Kaozü moyu Deiphao
16Süthai-a Enou teinghi khenou kaozü buhisü, ashi-a bua ngaowe, alia acheche buhisü, mai-ashi-a bue. 17Enou lah ale khenou paoe, Ramai nou acheche alia ashisü chikulai, daiolouzü puhnou hali hala donou alia vah alili donou paohkhai tiyu teile alili bue. 18Deiphao maiye donou Enou lah ale khenou paoe, süolouzü puletao hai khaona baie tiyu ngaopeire donou Ramai nou puletaoye süh zhuhyu souwe. 19Daiolouzü maili vei pfüpousao alia khaona li vei pfüpousao hai ali baie, ali nanou thaiyu büa alina-a thaiwe. Puletao nou ssü haiyu hai raibüa baie, mainou khaona jünou veipuyu hae; daiolouzü hai teitei nou hamako baie. 20Hateitei nou buh alihi ve baiwe; na teitei nou nai hinou ve-e, ae sü teitei hai naihi dakhai tabaiwe. 21Thaonou süwe mai rako hai teipei pawe ae khaona rako hai deikhe louwe tiyu? 22Südonou Enou ngaoyu mai aliye donou lah puhvei vah hinou savayu jünou veipuyu halia hae, daiolouzü süsü lah puhvei zha-e; thaonou puhye save puh thailo dai palai tiyu ngaopei lousüe?
Currently Selected:
KOPAODOUWO 3: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
