PAODAKHAIYU CHIKHA 34
34
Moses Thaiyu
1Süthaisü Moses nou Moab deikho hinou Jeriko nuhdu alilo vatha buyu Nebo deichi, Pisgah deichi mataoh hisü taopaloue. Mapao nou puh hi teidei teitei sü buh sühinou ngaoe: Gilead hinou Dan maivei teidei koute, 2Naphtali teidei teitei, Ephraim ae Manasseh, Judah maitao vei teidei teitei nou poa teinghi loulo zai hi koute, 3Negeb ae deikhotao, süolouzü Jeriko vei deikhotao, habe nuhdu hinou poa Zoar hi koute hai ngaopeie. 4Süthaisü Mapao nou puh hi paoe, “Enou teidei haitao sü puletao vei tyaonah maitao hi peilai tea Abraham, Isaak ae Jakob hi chaachou soukhaitoue. Enou teidei haitao sü ne nghithou vuzünou pa zhingaowure, ana newo louzü teidei sühi panou loukhailai more.”
5Südonou Mapao nou paoyu thaifüa Mapao vei kilai Moses hai Moab maivei teidei hinou thaitare. 6Puhye sü Bethpeor alilovada buyu Moab maivei deikho hinou daovu peie, ana puhye daovuyu khüh sü zhou koute mai ali koute-a sümoe. 7Moses hai po kaihlia kai hinou thai-e. Puh thaiyu phaki puh hai pfüphao-a veisho hie ae nghithou-a ramo hie. 8Israel mainou teithe shirou hai puh thaiyu donou Moab deikho hinou levea-a dopfüe.
9Nun nahpoutu Joshua hisü ratsü süyu rako nou phoutao-a buloure, daiolouzü Moses nou puhye sü puh thao dothoupeie alia puh pei hi bah lakhai peie, südonou Israel mainou puh chi sü züe, ae Mapao nou Moses hi chikha peikhai touyu khesü souwe.
10Israel mai hrohi Moses büa rachipaola apeimai ali-a pamo hie; Mapao nou puhye sü zhu haohao nou vedao-a chakupeie. 11Mai ali koute-a Mapao nou Moses ye panou khupayu vahtao, puhnou Ejipt mai veo hi, puhvei peikho maitao hi alia tyadei teitei hi souyu büa soumo hie. 12Alia mai aliro Moses nou Israel maitao hi khupayu vah ae ngaopi shoyu tyatyali soupeiyu büa soulou moe.
Currently Selected:
PAODAKHAIYU CHIKHA 34: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
