PAODAKHAIYU CHIKHA 32
32
1“Oh raki, Enou paolai keipei khaio;
Deiphao sü panou avei chipaotao noupei khaio.
2Enou doupeiyu sü panou teirüpo büa kousho peio,
avei chipao sü pa vidzü büa koucha peio;
kaonaphi teanou pounghouva paisüsüa rükouyu teirü büa rükou shopeio,
ae sünghou daiva-a buyu hi teirü koupeiyu büa avei chipaotao sü panou koupeio.
3Daiolouzü Enou Mapao zhih sü paosholai,
alia Etao Ramai vei adusho sü paolai.
4“Mapao hai neletaoye vupeiyu Chuhdu nasüe,
puhvei ludu teitei sü kaokhai toubaie.
Neletao Ramai hai louchelou veiyu Ramai-e,
Puh hi kaomoyu ali-a hae, kaozü süyu ae acheche sü puh-e.
5Ana neletao hai chilee moyu tyahrü ali soutare,
Puhvei maitao tea polou shire,#32.5 Larübvü ali hi haibüa bue Neletao nou neletao vei Ramai Mapao vei kharochi zülouzü; Hebrew hio haina hai sheesha timoe.
neletao hai mahmo souyu ae louchelou shiyu tyahrü ali soutare.
6Oh voyu alia tsü hayu maitaore,
haibüa neletao hai Mapao vei paoh sü khapei laivu Puh hai neletao puo-e,
neletaoye sou-apeio nasüe,
puhnou neletaoye tyahrü ali soupeie.
7“Tala tayu teithe taosü lichokhaio,
neletao puo maitao hi noukhaio, puletao nou neletao hisü süngao peilai,
tsümaitao hi noukhaio, puletao nou neletao hisü paopeilai.
8Kukulai hi abuwo nou tyahrütaoye teidei dezhi peiyu phaki,
Puhnou deiphao maitaoye sü panou daiki bulai tea zhipeiyu phaki,
maikhe maivei deirai sü puhnou depeiwe,
ae puletao vei rah pouyu ae chiyu thaifüa depeiwe.
9Ana Jakob vei tyaomai nahmaitao hai puhvei mai panou soure donou doloue.
10“Puhnou puletaoye sü radeiki hinou ngaoloue,
ae haka laire tea buyu vaohro hinou ngaoloue.
Lahye lülouyu büa Puhnou puletaoye sü saloue alia kikou peie.
11Tei hi lühche nou toutuye zhaodou peiyu büa,
ae toutu nou zhaolou hoa dekou laire tea buyu phaki puh shouh nou kou vupa louyu büa Mapao nou Israel maiye sü phaola papeie.
12Vakou maivei rah kukhe soukha aliro loumoa Mapao likhei nou puhvei maitaoye sü süthaisa-a tapeie.
13“Puhnou puletaoye sü panou dei mataoh khesü kholoue,
ae dou hinou payu shinamara khesü puletaoye panou toue.
Chuhlya hinou buyu laivoudzü sü puletao hi peie,
chuh-rao buyu dei hisü nou pa oliv süübe sü paopa peie.
14Puletao vei choke ae nghitu khenou chonaodzü alao sou puletaoye peie;
puletao hisü veikayu nghike ae kikhaorü khesü peie,
puletaoye pa veikayu southou sünou touwe,
ae veikayu darkhadzü sü panou ke-e.
15“Mapao vei maitao hai toungi pare, anou paochi züba tare;
puletao hai toutouloua hübo veipa loukhaie sashi tare.
Puletaoye Sou-apeio Ramai ye sü malaiwure,
alia puletaoye khailu-apeio Chuhdu nasü konü tare.
16Puletao nou bashara khesü thotayu donou Mapao vei lekha sü soupa peiwe;
Vah ashi soutayu donou Puhvei rarou sü deipa peiwe.
17Puletao nou rah cheche moyu Rah ashi khesü posheela peiwe,
puletao paipao mainou sükhai moyu ra ashutya,
Israel mainou tho moyu ramaitao hisü posheelawe.
18Puletaoye sou-apeio ae khailu papeiyu Ramai ye sü puletao nou ngaiwure.
19“Mapao nou haitao hai ngaoloukhaie puh sü rarou loure,
alia puhvei nahmaitaoye sü malaiwure.
20‘Enou puletaoye sü soukhapu khailai more’ tea puhnou paoe,
‘Süthaisü rochiyu ae chilee moyu puletao hisü dai-e vepa laisa touyu E-a zhulai.
21Puletao nou cheche moyu rahye thoyu donou,
ae bashara kheye thoyu vanou alekha sü daipa peiwe.
Südonou Enou puletaoye panou tyahrü kukhe maiye ngaorai talai;
Enou voyu tyahrü aliye panou puletao lekha sü daipa peilai.
22Avei lekha sü mei büa panou taolai,
ae sünasü panou rabedushao#32.22 rabedushao: Haina hai thaimai nou buyu buh paowe. koute taokoulai,
Deiphao hi buyu na veishi sü deihawulai,
ae deichitao vei beikhei teitei-a panou deilai.
23“ ‘Enou puletao hisü veahoyu khaikho seive peilai,
ae avei vouloushu khesü puletao vahi pa kou loulai.
24Puletaoye panou houzüa thailai;
ae puletao hi veashoyu rahta rahvu sü seive peilai.
Rekhaona panou puletaoye sü nütou loulai,
alia nghouye panou puletaoye sü daopeilai.
25Kijü du hisü pa soureih mai bah hinou thailai;
kihikha sü pa ngaopiyu nou phoutao-a bulai.
Khelou payu maitao-a, nahmaitou-a ae peihpao payu tsümai koute-a thaikhai toulai.
26Enou puletaoye sü huporarou khaiwua deiphao maiye panou puletaoye lichopu khailai more tea E tsü choe.
27Ana ngaobamai nou paoshire nasü E-a ngaopi-e,
daiolouzü puletao ngaobamai nou sümahloua haibüa paoshulai,
Etao vei khouko vanou veiloua baie,
haisü Mapao nou souyu vah moe.’
28“Israel mai hai tsü hayu tyahrü ali soutare,
puletao hi avei ashi sükulou süyu tsü sü hatare.
29Puletao hai tsü veiwe toulouzü,
puletao hi dai-e vepawe touyu khesü süyu pha-e,
alia haithai daidai vepalai touyu hai-a süa buyu pha-e.
30Daidosoua mai ali nou mai theliye sü dulou laige,
alia mai ahai nou mai thekirou sü hulai khailou laige?
Süsü puletao Ramai Mapao nou puletaoye sü zholaiyu donoue,
ae puletao Mapao nou puletaoye thaotayu donou baie.
31Puletaoye ngaobayu maitao vei rah khesü Israel maivei Ramai büa khoumoe touyu sü puletao nou süwe.
32Puletaoye ngaobayu maitao hai Sodom ae Gomorrah hi mai ashi maitao raibüa baie,
alia puletao vei rashithou khesü maiye shuthayu rashithou baie,
ae puletao vei rashike khesü kha-e.
33Alia puletao hai nghou tudzü nou poa zhaoh soukhai touyu bütoua baie.
34“Puletaoye ngaoba maitao nou daivah souwe touyu sü Mapao nou süwe,
Puletaoye tudeere donou teile macha nasü kho-a bue.
35Khüphoure sü aveie,
Enou puletao vei paozho khesü kha peilai;
Puletao kaodu tare teile sü nghitei toure,
ae puletao hakatare sü thashoa laire.
36 Mapao nou puhvei maitaoye sü vupa peilai,
alia puhvei kilai maitaoye zhuvea peilai puletao nou veashoa buyu phaki.
37Süthaisü Mapao nou puhvei maitao hi noulai,
‘Neletao nou louche-a buyu rah khesü daiki vetare?
38Neletao nou touso aveihli nou poa sheela peiyu ae zhaoh nghou peiyu puletao sü daiki bue?
Puletaoye panou tave neletaoye soukha peio,
puletaoye panou neletaoye sü ve vupalo!
39“ ‘Chuo, sülo, E likhei Ramai baie,
E moa ramai kukhe ali-a hae;
Athai ae ahri sü abah hi bue,
Zheemü soupa peiyu ae souvei peiyu nasü Enou-e,
mai taralinoua Enou souyu vah nasü khulou hoe.
40Abah sü rakiva lapaloua Enou chaachou souwe,
süolouzü E hai teisa hria buyu Ramai donou,
41avei khoche hei souveih louyu thai,
alia chikure donou takou buh polouyu thaisü,
Eye ngaobayu maitao hisü Enou khüphou talai,
alia Eye ngaorayu maitao paozho sü khapeilai.
42Avei vouloushu khesü pa zhe kelai,
alia maitaralia Eye duyu maiye sü avei khoche nou daotha khailai.
Maitaralia Eye duyu mai sü phapeilai moe;
zheezhu khaitouyu mai-a ae hukha mai koute-a southalai.’
43“Tyahrütao, neletao hai Mapao vei maitaoye paosholo,
daiolouzü puhnou puhvei maitaoye southayu mai hisü khü phoupeiwe,
ae puhye ngaobayu mai hisü pao rüpeiwe,
alia puhvei maitao mah sü khaipeiwe.”
44Moses ae Nun nahpoutu Joshua nou lou hainasü Israel maisou choulou süyu hisü nou soungao peie.
Moses nou Akhai Chi Paoyu
45Moses nou chipao haitao hai Israel mai hrülai hi paopei cheyu thai, 46puhnou puletao hisü paoe, “Zhou teithe Enou neletao hi paopeiyu chikhatao hai soutaosoua zülo. Süna hai neletao nahmai hia doupu peio, sükulouzü puletao nou chikha teitei sü lichetoua züloulai. 47Doupeiyu chipao haitao hai hamako donou moe, ana neletao vei hrirai nasüe, ae hainasü neletao nou züa bulouzü, neletao nou Jordan rei tacholou poloua hrülaiyu teidei hi phasho-a hrüloulai.”
48Süzhou teithe hinou Mapao nou Moses hi paoe, 49“Jeriko nuhdu vei palova buyu Moab maivei teidei hi buyu Abarim Deichi vasü taopaloua Nebo Deichi peitao hisünou Enou Israel maiye peilai Kanaan teidei sü zhukhaio. 50Ne jürai Aaron nou Hor Deichi hinou thaiyu büa ne-a deichi haina hinou thai-a bailai. 51Daiolouzü nehai mai ahai kheinou Zin radeiki, Kadesh nuh pehao hi buyu Meribah dzüla hisü nou Eye sü Israel mai hrohinou louche more, alia Eye tsükhoupei more. 52Nenou teidei nasü zhizhuloua bailai, ana Enou Israel maiye peire teidei nahisü neye panou loukhailai more.”
Currently Selected:
PAODAKHAIYU CHIKHA 32: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
