PAODAKHAIYU CHIKHA 20
20
Soureih Souyu Zhai
1“Ngaobayu maiye reih soure donou tayuki alia neletao nou rhei, rheiluki ae reihmaitao hai neletao jünou pousho-a ngaoyuki, puletaoye ngaopiso. Daiolouzü neletaoye Ejipt hinou sapa peiyu neletao Ramai Mapao nou neletaoye kozho peilai. 2Neletao nou reihbu hi taloumo jünou napao nou tapalou-a reihmaitao hisü haibüa chi paongaolai, 3‘Oh Israel maitaore, haisü keilo! Zhou teithe neletao nou reihbu hisü talou laire, neletaoye ngaobayu reihmaitaoye ngaopiso, moa lekhaiso, moa puletao nghoujü nou pihi-a moa mahbvü poso. 4Daiolouzü neletaoye reih kolouyu peire donou neletao vei Ramai Mapao nou neletaoye koa takou neletao vei ngaoba maiye reih züpeilai.’
5“Reihmai peikho nou haibüa paolai: ‘Mai talinou ki ashu soukhaitou-a sathou loumoyu mai bumoma? Bulouzü puhye pa ta-o, more toulouzü puh hai reih buh hinou thai-a bailouzü puhvei ki ashu nasü kukhemai nou sathouloua bailai. 6Maitali darkhabe shokhai toua nou rashithou toulou moyu mai bumoma? Puhye pa ki hi dakhaita-o, more toulouzü puhnou reih hinou thaia bailouzü, kukhe mainou rashi sü toua bailai. 7Maitali nou shire donou chapfü nouto khaitoua salou monou bumoma? Puhye pa ki hi dakhaita-o, more toulouzü puhnou reihbuh hinou thailouzü, kukhe mainou naotupaiye sü naloua bailai.’
8“Süthai-a peichawo nou haibüa paopulai, ‘Maitalina ngaopi louzü moa lechüyu bumoma? Sübüyu mai bulouzü ki hi dakhaita-o, sükure tulouzü puh thaihou-jürai mai le soutai peilai moe.’ 9Peicha nanou reihmaitao hi chi paochere toulouzü, puletao nou meme vei reihmai peikhomai hai dopaloulai.
10“Neletao nou nuhdu ali hi reih soulai tea talouyu phaki, puletaoye kaona loure donou phakulo. 11Hakinou puletao nou aetou louzü alia puletao vei rokhubomü houpei louzü, puletao mai hrülaiye panou neletao vei qila soulo, ae taichü poa neletao vei kuvah sü panou soulo. 12Ana puletao nou kaona bare toulouzü alia puletao nou neletaoye reih soua bailai toulouzü, nuhdu sünasü sühaolo. 13Süthaisü, neletao Ramai Mapao nou neletao bah hi nuhdu süna hai peithouyuki, sühi hrüyu poutumai hrülaiye sü khoche nou daotha-o. 14Ana naotumai, nahmai, kikhaorü alia nuhdu hi buyu na veishi hai poloua bailai. Neletaoye ngaobayu maitao vei na khesü neletao nou khi-a bailai, daiolouzü süsü neletao vei Ramai Mapao nou neletao hi peiwure. 15Neletao nou ve füshore teidei hinou dousho-a buyu nuhdutao hisü hai zhaibüa reih sou-a vah soulai.
16“Ana, neletao vei Ramai Mapao nou neletaoye peilaiyu teideitao reih soua polouyu phaki, sühi hrüyu mai hrülaiye sü southakhai-o. 17Neletao vei Ramai Mapao nou kharochi peiyu büa Hit mai, Amor mai, Kanaan mai, Periz mai, Hiv mai alia Jebus mai hrülaiye sü souha laikhai-o. 18Sükumore toulouzü, puletao nou puletao vei rah thoyu hinou ngaora shoyu vah souyu khesü neletaoye panou thaifü tare donou doupei shulai alia neletao nou Ramai Mapao jüphei sou-a mah souta shulai.
19“Neletao nou nuhdu ali nüloure donou reih souloulai tea buyu phaki, neletao nou teile taoli loua buyuma sühi buyu rashibe khesü vilaiso. Rashithou sü neletao nou toulou vei-e, ana süübe hai vilaiso, daiolouzü süübe taonou neletaoye ngaoba moe. 20Neletao nou süübe kukhetao hai viloua bailai alia neletao nou reih kolou mosasü sütao hai poa vah soua bailai.
Currently Selected:
PAODAKHAIYU CHIKHA 20: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
