SEI-ATAMAI VAHTAO 26

Paul nou Agripa Nghoujü nou Puh Zü Paoyu

1Sükisü Agrippa nou Paul hi paoe, “Lah neye donou züpaore aetou peire.” Sühinou Paul nou puh bahsü khapaloua puh züsü paoshure:

2“He Veo Agrippa! Apei hi Jihudimai taonou mah paodukhai touyu teitei vanou zhou ne nghojü hi lah Azü paongaore hai Eye donou rakoveie tea Enou chowe, 3daiolouzü Jihudi maivei zhai teitei ea kao-zü saovayu chi teitei sü koukou laisoua nenou sütoua bue. Südonou leshia Achi hai kaona-a keipeire donou nehinou khowe.

4“Enou kabüa nahlebu kinou Avei nuhbuh hinou ea süthai Jerusalem hinou hrüpasa touyu Azhai-hrü teitei sü Jihudimai hrülainou sükhaiwe. 5Puletao nou zhopaoh peinüwe toulouzü E hai Ehvei rahrüzhai thaifüa soutaosoua reiyu me hinou Phariseemai alie touyu sü raikinou puletao nou süa bue. 6Alia chuo Eletao puo-paomai hi Ramai nou apaopei khaitouyu sünaye, rei-a buyu donou Esü zhou buh haihinou chikure donou lawe. 7Alia Eletao vei khü kiahai taonou apaopei khaitouyu süna veteyu ngaoloure donou puletao nou lenoushoa khei-hea Ramai kuvah soue. Alia He Veo! rei-a buyu haina vanou Eye Jihudimai taonou mah paoduka khaiwe. 8Buh haihinou buyu neletao daidonou Ramai nou thaimaiye souhri peiwe touyu sü louche peilou hoe?

9“E lah E-a Nazareth hi Jisu zhihye sü motoua ha tyali souzüe tea raiki chowe. 10Alia süthaifüa Jerusalem hinou Enou soua soue; alia Enou napao adumaitao hinou soure khouko ngaoloua sheeyumai taoliye niloua hukha hi thoupeie; ana puletaoye southeayu kisü E-a ae-ao tea bah lapeie. 11Alia tobai soumoa Enou puletaoye rathobuhtao hinou souvea souhopeie ea puletaoye panou Ramaiye paoshire te-e; alia puletao pei hi rarou lekha buyu vanou Enou puletaoye souvea-souhore donou vakou teidei hi koutea tahoe.

Paul vei Ledayu Ko

(Vah 9.1-19; 22.6-16)

12“Sübüa Enou napao adumaitao hinou soulousü zü ea kharochi sü ngaoloua Damaska hi ta-a buyu hinou, 13headei pha hinou, He Veo, teinghi jünou vaveiyu ava alinou raki vanou E ea Eye koa veihdu hinou laiyu maitao thaijühi kou varu louyu sü ludu hinou Enou ngaoe. 14Alia Eletao hrülai nou deiphi hi dukhuyu kisü Ebriamai la hinou pai alinou, ‘Saul, Saul! Ne daidonou Eye souveawe? Shuhi nephinou theyu hai neye donou tateie;’ tea Ahi paoyu sü Enou choue. 15Alia Enou ‘Mapao ne thaohwe?’ tea noue. Alia Mapao nou chila peie ‘Ehai nenou Souvea-a buyu Jisu-e.’ 16Ana ne kushu lalo, daiolouzü neye Akilai doloure donou Enou nehi ve ngaopeire. Nenou chuo taloua mai kukhemai hi zhou nenou Eye ngaolouyu vanou ea Enou nehi thaikhai ngaopeire sütao vanou zhopaoh soulai. 17Enou neye seiho laiyu lah nemai ea tahrüh kukhe maitao hinou neye, vupa peilai. 18Nenou puletao nghithou sü souhepa peilai, alia puletaoye teizhi hinou avahi ea Saitan vei khouko hinou panou Ramai hi dakhai velai, sübüa puletao nou Eye lülouyu vanou puletao mahsü khailu peiloulai ea Ramai nou dolouyu maitao hrohinou puletao buh sü ngaoloulai.

Paul nou puh vah vanou paoyu

19“Südonou He, Veo Agrippa, Enou raki hi vei zho naye sü zübayu soumoe, 20ana raikia Damaska hi buyu maitao hi, süthaisü Jerusalem hi ea Judea teidei teitei hi, alia tahrüh kukhemai hi puletao nou le davuzüloua Ramai hi dakhai vere ea puletao le daloure touyu zhopaoh soure donou vahnou soungaokhaio tea Enou paodoupeie. 21Haibüyu vanou Jihudimainou Eye Rathoki hinou nüloue ea puletao nou Eye southeare donou tewe. 22Ana zhou koutesü Ramai nou Eye soukhapeie alia südonou Enou buh haihinou la-a taidu hrülai hi raibüa Enou Avei zhopaoh peiwe. Enou paoyu sü rachi paola mainou ea Moses nou sübüa palai tea raia paoyu sünaye raibübaie! 23Süolouzü khailu peiyu vei avana hai Jihudimai hi ea tahrüh kukhemai hi paosü peire donou Khrista hai vea vuzülai ea thaimai hronou rairaikai-a hrishuyu na soulai.”

24Alia Paul nou haibüa lah puh zü pao-a buyu hinou, Festa nou pai kusholoua puh hi paoe, “Paul newo vopare! Nevei ha süshoyu sünanou neye souvore!”

25Ana Paul nou chila peie, “Adu sho soua buyu Festa Ewo vomoe! Ewo acheche chitouh nasü paobaiwe. 26Daiolouzü veonou chi haitao teitei sü sükhaiwe, alia Enou nehi sü khuveishoa paowe; süolouzü chi haitao teitei sü nenou choumoyu hae touyu sü Enou sütoua bue, daiolouzü vah haisü dei kainghou ali hinou kukhaitoua pabaimoe. 27Veo Agrippa, ne rachi paolamaiye louche chemoe? Nenou louchewe touyu sü Enou süwe!”

28Alia Agrippa nou Paul hi paoe, “Teile phajü haina hinou Eye panou Khristamai ali souloulai tea nenou chowu?”

29Paul nou chila peie, “Teile phajü bai-a phasho bai-a, Enou Ramai hinou veachi pao-a khoyuwo louzü hurainou phukhai touyu haina paomoa ne-a ea zhou Achi kei-a buyu maitao hrülai-a panou E büloure nasüe!”

30Süthaisü veo-a, teideikhowo-a, Barnis-a ea puletaoye koa buyu mai hrülai-a tashu loure; 31alia puletao nou buh süsü thaowu-a tayu kisü puletao alinou lihi haikua paoe, “Mai hainanou puh thaizüyu moa hukha hi thoulou veiyu mahlia soumoe.” 32Alia Agrippa nou Festa hi paoe, “Mai hainanou Kaisar hi chiku peire donou phoupu more toulouzü puhye sü phapeilou veie.”

Currently Selected:

SEI-ATAMAI VAHTAO 26: POUMBSI

Highlight

Copy