SEI-ATAMAI VAHTAO 23

1Alia Paul nou tsüme hisü zhuteiloua paoe, “Athaihou jürai khemai, Ramai nghojünou Enou zhou koutesü Alekhe tsühai sheesha-a hrüwe.” 2Sühinou napao peichawo Anania nou Paul ngheiki la-a buyu maitao hi puhmü hinou dapeire donou kharochi peire. 3Sükisü Paul nou puh hi paoe, “He kaa dzünou noukhai touyu bouvou! Ramai nou neye dapeilai. Newo haihinou razhai thaifüa Eye chikure donou bulukhu, razhai nasü pfütho-a Eye dare kharochi peiwu?”

4Sükisü Paul ngheiki hinou la-a buyu maitao nou puh hi paoe, “Newo Ramai vei Napao Peichawoye konü laiwu?”

5Paul nou chila peie, “Athaihou jürai khemai, puh hai Napao peichawo süe touyu Enou süloumoe; daiolouzü haibüa rükhaitoue, ‘Nenou nemai khemai peikhowo chi paoshi laimoe.’ ”

6Ana sühi vedzüa buyu kamainou Sadukimai ea kukhe mainou Pharisee maitaoe touyu hai Paul nou sülouyu kisü puhnou tsüme hi shusoua paoe, “Athaihou jürai khemai, E hai Phariseemai alie ea Phariseemai nahpoutue. Enou thaimai hrishulai touyu vei areih buyu vanou Eye buh haihinou chikuwe!”

7Puhnou chi haihai paoche chekhaie, Pharisee maitao ea Saduki maitao kole hinou züvapa loure, alia tsüme sü me ahai souloure, 8(Daiolouzü emai hai athai hinou hrishu laimoe, alia rakivamai-a ea rakotao-a hae tea Sadukimai taonou paoe; ana sütao asü bue tea Phariseemai taonou louche.) 9Sükisü sühisü pai-rao kusho loure alia Phariseemai mehinou razhai dou-apeimai kamainou tashu laloua chihshoa veivaloua paoe, “Ehnou mai haina hinou kao-zümoyu halia ngaoloumoe! Cheche vuzünou, rakonou moa rakivamainou puh hi paongao bukhaia thaohnou sülai!”

10Alia chi veivayu süsü chihsho louyu donou maikhe mainou Paulye soude-souhühüyu ngaopiloua reihmai peichananou reihmai taoyenou maimehi takouloua Paulye puletao hrohinou shaopove reihmai fühao hi khailoure donou kharochi peire.

11Thainaisho kheisü Mapao nou Paul ngheiki tave laloua paoe, “Khuveilo! Daiolouzü nenou Jerusalem hinou A zhopaoh peilouyu kua, Rom hi-a nenou Azhopaoh peivuzülai.”

Paulye Southeare Do

12Thainaisho shona hisü Jihudimai kamainou khei-kheisou tave dzüloua puletao nou Paulye southealou mosasü tou-a toulaimo sho-a sholaimoe tea lah puletao nou chaachou soukhaitoua bue. 13Do haina souzhoyu maitaosü mai raidai lahie. 14Alia puletao nou napao adumaitao ea tsümai taohi taveloua paoe, “Ehnou Paulye southealoumo koutesü halia toukhai laimoe tea chihshoyu chou souloua lah Ehye phukhaitoua bue. 15Südonou chuo neletao nou puhvei chihai soutaosou sheepua kulaiyu do hinou Paulye neletao hi sakou peiloure neletao nou tsümeye koa reihmai peichana hi chi seivekhaio. Ana puhnou buh haihi koute loumo jühinou Ehnou puhye southeare donou soudawulai.”

16Ana chuo Paul tupai nahpoutuwo nou puletao vei do nasü süloure; südonou puhnou reihmai fühao hi tave louloua Paul hi paongao peie. 17Sükisü Paul nou reihmai kaihpei chamai aliye kuloua puh hi paoe, “Ne khemaina hainaye reihmai peichana hi save peikhaio, daiolouzü nah hainanou puh hi ha chili paongaore bue.” 18Südonou kaihpeichawonou puhye sü salou-a reihmai peichana hi save peiwu-a paoe, “Hukha hi buyu Paul nou Eye kuloua khemaina hainaye nehi savepeio, daiolouzü puhnou nehi ha chili paore bue tea Ahinou khoe.”

19Sükisü reihmai peichananou puhye sü baohinou süthailoua buh kukhe lihi saho puh hinou kheikheisoua noue, “Nenou Ahi paongao nüyu chi sü daie?”

20Puhnou paoe, “Jihudimai taonou Paul vanou chi kukheli sheesha-a süpu nüyu do hinou Paulye dosho tsüme nghojü hi sakou thoupeio tea nehinou khore sü puletao nou phakou chere. 21Ana puletao chi sü popeiwuso; daiolouzü puletao hrohinou mai raidai layu me alinou puhye southeamo koutesü tou-a toulaimo, sho-a sholaimo tea chachouli soukhaitoua puhye dahpo-a ea khoa bure, alia chuo puletao nou souda chewu-a nenou chi lüpeiyu süna likhei khobaire.”

22Südonou reihmai peichananou khemaina süna hi, “Nenou chi haina hai Ahi paongaore tea mailihia paongao khaiso,” tea tukha peiwu-a panou tare.

Paulye Teideikhowo Felix hi Seiveyu

23Süthaisü puhnou kaihpeichamai ahaiye kuloua paoe, “Zhou khei teilecho akü hinou Kaisaria hi tare donou reihmai kaih-hai, rhei reihmai rainai ea heung reihmai kaih-hai soudalo. 24Alia Paulye panou pfüloure rheitao soudapeiwu-a puhye sü kaozhou veia Teideikhowo Felix hi save peikhaio.” 25Sükisü reihmai peichananou haibüa seiko ali rüpeie. 26“Klaudia Lusia nou Adu-asho soua buyu Teideikhowo Felix ye sasa-a khurüwe. 27Mai hainaye Jihudimai taonou niloua southeare hinou Enou puh hai Rommai alie touyu süloua Avei reihmai taoye koa Enou taveloua puhye khailu paloue. 28Puletao nou puh pei hi dai mah dukhaisa touyu sülounüa Enou puhye sü puletao vei tsüme hi sakoue. 29Puh pei hi mah dukhaiyu hai lah puletao razhai vei qo vanou baie, ana thaizüyu moa hukha hi thouzüyu mahlia puh pei hi dukhaimoe touyu sü Enou ngaoloure. 30Alia maikhe mainou mai hainaye southeare do phoua bue touyu sü Ahi süngao peiyu kisü Enou puhye sü nehi thala-a seivewu-a puh pei hi mah dukhaiyu maitaoye-a puletao nou puhye motouyu sü daie touyu hai ne nghojünou ve paongaowo tea Enou paopeire.”

31Südonou reihmai taonou puletao hi kharochi peiyu thaifüa Paulye saloua khei hinou puhye sü Antipatris hi save peire. 32Alia thainaisho sü rhei reihmaitaoye panou Paulye koa tare donou thaodaiwu-a puletao sü reihmai fühao hi khaivere. 33Rhei reihmaitao nou Kaisaria hi velou louyu kisü seiko nasü Teideikhowo bah hi thoupeiwu-a Paulye puh nghojü hi save khaipeire. 34Puhnou seiko nasü phouloua Paulye teidei kalovanou ve tea noue. Paul hai Kilikia hinou ve touyu puhnou sülouyu kisü, 35puhnou Paul hi, “Ne pei hi mah dukhaiyu maitao velou louzü Enou nechi keilai,” tea paoe. Alia puhnou Paulye sü Herod vei fühao hinou soutao sou khoa khailoure donou kharochi peire.

Currently Selected:

SEI-ATAMAI VAHTAO 23: POUMBSI

Highlight

Copy