2 SAMUEL 8
8
David nou Soureih soua Veilouyu
(1 Puo 18.1-17)
1Süthaisü teile somoa nou David veo nou Philistin mai pei hi reih hulou-a Philistin mai jünou reih veilou-a puletaoye tukhapü-a buyu Metheg Ammah sü David veo nou poloure.
2David nou Moab mai jünou-a reih veiloue. Puhnou Moab maiye panou deiphi hi kou dazülou-a mai asü hinou mai ahai ahaiye sü southawua panou mai alikhei hriloua baie. Sütea nou Moab mai panou puh khakhe hinou bua puhye kikha peie.
3Süthaisü Zobah hi veo Rehob nahpoutu Hadadezer nou Euphratis rei reilo vatha buyu teideitao sü poda khailoulai tea ta-a buyu hinou David nou puhye reih soua puh jünou reih veiloue. 4David nou puhvei rhei pfüyu reihmai thelia kaihnai ae phinou tayu reihmai thekai hai nüloure alia rheiluki kaihli pfülousüyu rheitao likhei khailou-a kukhe taosü phibao soushi khaiwure.
5Damaskas hinou hrüyu Sairia mainou Veo Hadadezer ye soukhare donou veyu phaki David nou puletaoye reih soua mai thekaihai ye southa peie. 6David nou puhvei reihmai me ali puletao vei vedei hi khailoure ae puletao hai puhvei khakhe hi bua puh hi kikha sü peie. David nou reih soutayu pfüphou hi Ramai nou puhye kozho peia panou reih veikhai touloue. 7Hadadezer vei reihmai peikhoyu maitao nou pfüyu sana vei rütao sü David nou pojülou-a Jerusalem hi pfüve khailoue. 8Süthemoa Hadadezer veo nou khasa-a buyu Betah ae Berothai, alia nuhdutao hinou baosahu alao poloue.
9David nou Veo Hadadezer jünou reih veiloure she touyu ko hai Hamath hi veo Toi nou süloure. 10Südonou puhnou puh nahpoutu Joram ye seive David hi reih veilouyu vei savayu chido hai panou pove peire donou seitae, daisounou touyuo süteile hi Hadadezer ae Toi sü reih züva-a bue. Joram nou sana, shahu ae baosahu nou soukhai touyu sapeina taoli hai David ye pfüve peie. 11Tyahrü tyatyalih jünou rei veilou-a polouyu sana, shahu alia baosahu nou souyu natao sü pove David nou Ramai bah hi thaothou peie. 12Süolouzü Edom mai, Moab mai, Ammon mai, Philistin mai, Amalek mai alia Zobah hi veo Rehob nahpoutu Hadadezer hinou polouyu natao sü pove peie.
13David nou Tai vei Deikho hinou reih zü-a Edom mai thekiacha sü southalou-a dakhai veyu phaki puhvei zhih hai tapu sholoure. 14David nou Edom maivei teidei hinou puhvei reihmai panou bure vei fühao taoli hai soukhai loure ae Edom maiye panou puhvei khakhe hinou hrüe. Ramai nou puhye buh tyatyalih hinou soureih hai panou veilouyu sü ngaoloue.
15David nou Israel mai teitei hi veo souloua mai hrülaiye raibütou tea checheyu hinou sa-a hrüpeie. 16Zeruiah pfüpai nahpoutu Joab nou reihmai peikhowo sü soue; Ahilud nahpoutu Jehoshaphat nou larü rü-apeio sü soue. 17Ahitub nahpoutu Zadok alia Abiathar nahpoutu Ahimelek nou napao soupeie; Seraiah nou vahbu hi rü-apeio hai soupeie. 18Jehoiada nahpoutu Benaiah nou David veoye khoyu hi peikhowo sü soue, alia David vei nahpoutu maitao hai napao soue.
Currently Selected:
2 SAMUEL 8: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
