2 SAMUEL 20
20
Sheba nou David Pei hi Khaityapayu
1Benjamin khü hinou Bikri nahpoutu Sheba hai zhaidou loumoyu mai ali bue. Gilgal hinou puhnou shabe houpalou-a haibüa paoe, “David veo hi Etao zha halia hae, Jesse vei nahpoutu ye Etao zhoyu hae! Oh, Israel maitaore, lahkuku ki hi vetarao!” tea shapa peire. 2Südonou Israel mai hrülai nou David hi bumoa Bikri nahpoutu Sheba thaifü tare, ana Judah maitao nou David veo hi bulou-a puhye paoh po-a Jordan hinou Jerusalem hi vepeie.
3David nou Jerusalem vei vebuh hi khaive louyu phaki, puhnou puh vei khapapfü kirou tao panou puhvei ki khore donou ki hi thaokhaiyu puletaoye ki alihi save khaiwu-a puletaoye khopeire mai khaipeie. Puletaoye donou tou-so soupeie, ana sazü-sabuyu soumoa mimeapfü bütou tea puletao thaimo koute sübüa panou hrüe.
4Süthaisü veo nou Amasa hi paoe, “Ne Judah mai hrülaiye kujüloua teithe asüzhou puletaoye koa ahi vewo.” 5Amasa nou Judah maiye kutayu teile sü veo nou paohpeiyu teile jünou loupure. Taizhou khaivelo touyu zhou khaivelou more. 6Südonou veo nou Abishai hi paoe, “Absalom nou Etao hi veahoyu peiyu jünoua Sheba nou Etao hi veayu hai pfüvepu peilou veie, avei mai taoli salou-a puh thai ngoutawo, sütou molouzü puhnou reihbuh khotou khaitea buyu nuhdu hi loulou-a Etao hinou tureipa loushulai.” 7Südonou Joab vei maitao, veo ye khoyu maitao alia reihmai hrülai Abishai ye koa Sheba ye phoutare donou Jerusalem hinou tapare. 8Puletao nou tapoa Gibeon hi buyu chuhdu hi veyu phaki, Amasa nou Joab ye daoe. Süphaki Joab sü reihna tutoupfüa laie, puhvei khyakho hi khoche ali thoupfüa nou laie. Amasa nou puhye daolai tea takouyu phaki, Joab nou khoche sü paizhou paloue. 9“Asana, ne-a vei-a laibai moge?” tea pao-a puh vei bah zhoulao nou Amasa vei mümai hinou pailou-a münou mülai tea soue. 10Joab bah hi khoche poyu Amasa nou ngaolou moe, südonou Joab nou puh vei pou hi khoche nou khüpei-a rai koute vakou küpare. Puh sü sübüa thaiha baire, südonou Joab nou khüpu more.
Süthaisü Joab ae Abishai nou Bikri nahpoutu Sheba ye phoutare. 11Joab vei mai alinou Amasa vei thaiphao pe hinou lalou-a “Joab alia David veo maie touyu maitao sü Joab thaifülo,” tea shapeie. 12Amasa vei thaiphao sü zhe khaitea ludu toutsü deihinou bue. Joab vei maitao takouyu hrülai sü thaiphao ngaolou-a chao-a zhuzhu-a baire. Südonou puhnou thaiphao sü süthaipo-a ludu pe heihro lihi laithouwu-a sah alinou hokhaiwure. 13Sübüa thaiphao sü sükuyu thainou mai hrülai nou Joab thaifü poa Sheba ye phoutae.
14Sheba nou Israel mainou hrüyu nuh veishi alia khü teitei tasühaowu-a dakhaive Abel Beth Maakah tea kuyu nuhdu nahi bue. Sühizü Bikri khü-zhaimai teitei-a nuhdu taina hinou ve koa jüa bue. 15Joab vei maitao nou Sheba tuve bue touyu süloure, südonou puletao nou tave nuhdu tainaye sühao loure. Nuhdu süna vei kivo khosühao khaitouyu thailo nou khoku-a nainou taosühao loure. Bouvo nasü soukhaore donou bouvo phi sü rao-a bue. 16Nuhdu taina hisü tsü veishoyu naotumai ali bue, puhnou eitya bouvo hinou shae, “Haihi Joab ye takou tea kupeio, E puhye koa chi phalai,” tea share. 17Joab nou sühi vere alia naotupai nou “Ne Joab chechevu?” tea noue.
“Oungai E-e,” tea puhnou chila peie.
“Ne apai keilo,” tea naotupai nou paoe.
“E kei-a bue,” tea Joab nou khüpeie.
18Naotupai nou paoe, “Dao daonou haikua nou paoyu ali bue, ‘Haibülai touyu akhai vei chila na jüpa louzü Abel nuh hinou ve noulo,’ sütea akhai vei chito nasü soulou she. 19Eh nuh hai Israel mai nuh hrohinou nuhdu alie, kaonayu nuh, ae paochi züveiyu nuh alie. Ne daisounou nuh hainaye souhawulai tea tewe? Ramai vei nuh ali sou-a buyu nahai nenou souhare jüpawu?”
20“Sütou khaimoe, Enou hakilia neletao vei nuhdu haina hai souha laimoe. 21Sübüa soulai tea Enou cho moe, ana mai ali Ephraim maivei deichi hinou veyu Bikri nahpoutu Sheba ye phou-a baie, puhnou David veo ye duyu vah souwe. Mai taina hai Etao bah hi thaothou peio, sütou louzü E avei maitaoye sa-a khaita-a bailai,” tea Joab nou chila peie.
“Etao nou puh vei pei delou-a kivo hinou laichopa ne hi peilai,” tea naotupai nou paoe. 22Süthaisü naotupai nou haibülai tea cholouyu nasü koa puh vei nuh maitao hi taho chi phatare alia puletao nou Sheba pei delou-a Joab hi laipa peiwure. Sütea Joab nou khaita baio tea panou lahkuku nuh hi khaitare alia Joab nou Jerusalem hi khaive veo hi bure.
David Khenou buyu Adumaitao
23Joab nou Israel mai teitei reihmaitao pei aduo soue; Jehoida nahpoutu Benaiah nou veo khoyu maitao peikhowo sü soue. 24Adoniram nou taitsü sa-a vah souyu maitao peikho-e; Alihud nahpoutu Jehoshaphat nou thai-dao donou larü rükhaina soue. 25Sheva nou chi-lou kuyu vei rü-apeio sü soue; 26ae Jair nuh hinou veyu Ira nou David veo vei napao maitao hrohinou napao ali soue.
Currently Selected:
2 SAMUEL 20: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
