2 VEMAITO 3
3
Israel alia Moab Mainou Soureih Souyu
1Judah hi Veo Jehoshaphat nou veo soulouyu po kiacha kousü, Ahab nahpoutu Joram nou Israel hi vekou loue, ae puhnou Samaria hinou po kiahai hai veo soua bue. 2Puhnou puh puo ae puh pfü Jezebel büa vah ashi khesü soumoe, ana puh-a Mapao vei nghingao hinou mah khesü soure; puh puo nou Baal rahye thoyu zhurai soukhai touyu khesü puhnou souhalai peie. 3Anou Nebat nahpoutu Veo Jeroboam büa puhnou Israel maiye mah hi süthaisa-a thoupeie, ae puletao nou thaokhai toumoa mah sü sou-e.
4Moab maivei Veo Mesha hai zhaotu kiyu mai ali-e; ae popatsü hai puhnou Israel maivei veo hisü zhaotu 100,000, ae zhaotu 100,000 vei mai hai kikha phasoua nou peie. 5Ana Veo Ahab thaiyu thai, Mesha nou Israel maiye dutare. 6Sükukhai-e Veo Joram nou Samaria thaokhaiwua puhvei reihmaitao hai save jüloure. 7Puhnou Judah hi veo Jehoshaphat hi haibüa chi sü paota-e, “Moab maivei veo nou Eye khaitya dupare; südonou ne Eye koa reih soupeilai homoe?”
Veo Jehoshaphat nou haibüa chila peie, “Enou neye koa soureih sü soupeilai. Ahai sü ali baie ae avei reihmaitao ae rheitao sü nevei baie. 8Puhye ludu kalova nou taho reih soulaige?”
“Etao nou Edom maivei vaohro hinou tayu ludu douyu na hinou talai,” tea Joram nou chila peie.
9Südonou veo Joram, Judah hi veo ae Edom maivei veo puletao koa tare. Puletao nou teithe anai tasühao poa tayu thai, puletaoye donou ae puletao nou sapoa tayu kikhaorütao donou kere dzü ali-a hazei toure. 10Veo Joram nou haibüa paoe, “Etao hai chuo daibülai! Mapao nou Etao mai asüye sü Moab maivei veo bah hi thoupeiyu phare!”
11Veo Jehoshaphat nou noue, “Mapao hinou daibülai tea noulou veiyu rachipaola peiyu mai lia hai hi buha-e?”
Veo Joram vei reihmai peikhoyu mai ali nou chila peie, “Shaphat nahpoutu Elisha hai buh hai hinou bue. Puh hai Elijahye soukha apeio nasüe.”
12“Puh hai checheyu rachipaola-apei mai ali-e,” tea veo Jehoshaphat nou paoe. Südonou veo mai asü taonou Elisha hisü tavere.
13Elisha nou Israel maivei veo hisü haibüa chila peie, “Enou neye daivanou soukha peilai? Ne pfüpuo nou phakuyu rachipaola peiyu maitao hinou taho nouloua baio.”
Joram nou chila peie, “Moe, Mapao nou veo mai Etao asüye Moab maivei veo bah hi thaothou peiyu phare.”
14Elisha nou chila peie, “Enou kuvah soua buyu hriyu Mapao zhih hinou chaachou soua nou paowe, süolouzü nenou koa salaiyu Judah hi veo Jehoshaphat ye tsükhouyu vanou moyu thaio, Enou neye halia soupeilai moe. 15Chuo Eye donou lou souyu mai aliye taho kupoa nou vewo.”
Lou souyu mai nanou lou souyu basei poa nou lou soupeiyu phaki, Mapao vei khouko hai Elisha hi velou loure, 16ae puhnou haibüa paoe, “Mapao nou haibüa paoe: Deikho veishi hinou dzükhao sü hekhailo. 17Neletao nou teikhai teirü ali-a ngaomoyuma dzükhao haitao hisü dzü nou phouloulai, ae neletao alia neletao vei kikhaorü khenou dzü sü alao bua nou ke loulai.” 18Ae Elisha nou haibüa paopue, “Mapao ye donou hai sü souyu hai talapa-a nou baie; puhnou neletaoye Moab mai jünou veilouyu hai-a peilai. 19Neletao nou puletao vei veisho-a soukhai touyu nuhdu teitei sü poloulai; neletao nou puletao vei rashibe khesü vikao peilai, puletao vei dzünghou khesü souka peilai, ae puletao vei veishoyu dou khesü neletao nou chuh nou laithou phoutao peilai.”
20Thainesho shona hai teithetsü nou shona vei posheela peiyu teile hinou, Edom hilo vanou dzü hai küve dei sü phoutao loure.
21Moab maitao nou veo mai asü nou tave puletaoye reih soulai tea nou bure touyu ko hai choulou khaie, reih basei polou süyu mai hrülai nou tave jüloua deirai hinou kho-a nou buloure. 22Puletao nou thainesho shona kushu dzü sü zhuyu phaki, teinghei nou dzü sü phupa zhe büa homara-a nou ngaoloure. 23“Haisü zhere!” tea puletao nou paore. “Puletaoye ngaobayu veo mai asütao hai alinou aliye southa vayu phare! Eletao taho puletao vei na khesü puletao vei fühao hinou polou laikhe!”
24Ana puletao nou fühao hisü veyu phaki, Israel mainou puletaoye sü reih soua hudakhai tare. Israel mainou puletaoye sü thaihu poa tare ae Moab maiye southawure, 25ae puletao vei nuhdu teitei hai soushiwure. Puletao nou veishoyu dou khesü tachoyu phaki, Israel mai hrülai nou chuh poloua laithou dou teitei hai phoutao peire; puletao nou dzünghoutao-a taika peiwure ae rashibe khesü vilaikhai toupeiwure. Akhai hikou puletao vei nuhdupao Kir Heres likhei hai shokhai toua bua baire,#3.25 Haibüyu phae Kir Heres nuhdupao likhei shokhai toua baire; Hebrew hio sheezhu moe. ae voulou poyu maitao nou nuhdupao nasü sühaoloua nou reih huloure.
26Moab maivei veo nou puh hai reih veilou hore touyu sü süloukhaie, puhnou khoche poyu mai kaihnai hai saloua ngaobayu maitao nou da-a buyu hinou tupaloua tuho Sairia mai vei veo#3.26 Larübvü ali hi Sairia; Hebrew hi Edom. hisü talai teanou te-e, ana süsü puhnou soulou hore. 27Südonou puhnou puh nahpoutu tsükana, puh thaosou pa veo soure naye sü nuhdu vei kivo vanou dathaloua Moab maivei rah hi posheela peie. Israel maitao nou süsü ngaoloua ngaopi loure,#3.27 Israel...ngaopi loure: daiolouzü Moab maivei rah Khemosh nou puletaoye soushire donou, moyuma Israel maivei Ramai Mapao nou puletaoye soushire donou. südonou puletao hai nuhdu süna hinou lahvei teidei hisü dakhai tare.
Currently Selected:
2 VEMAITO 3: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
