1 TIMOTHI 5
5
Lüloumaitao hi Soupeire Vah
1Tsümai taliye lekhanou züwuso, ana puhye sü nelah nepuo büa choloua kao-zü hilonou doupeikhaio. Nahle maitaoye lah ne thaihou maitao kua popeio, 2alia sheeyu teitei noupu naotumai tsümai taoye nepfü kua alia nahle-a buyu naotu maitaoye lah netumai kua popeilo.
3Chechenou lahnou hrüa buyu naotu meapfümai taoye tsükhou peikhaio. 4Ana meapfümai talivei tao-nahmaitao bue toulouzü puletaoye panou lah puletao kikhamai hilo rahrüzhai vei vah sovei taosü soupei loure raikai-a panou douloukhaio ea sübüa puletao pfüpuo ea pai-paomai taovei paosü khapeikhaio; daiolouzü sübüa souyu hai Ramai vei züpa nasüe. 5Alia chekhaoa meapfümai alisoua likhua bubaiyu puhwo louzü puhvei areih teitei hai Ramai hi thoupeire ea tobai soumoa veachi paoa khei-hea puh hinou puh soukhasü khoa bue. 6Ana lah pfüphao vare donou likhei hrübaiyu meapfümai puhwo louzü hria bulukhu thaire. 7Maitalinoua puletaoye paoshiwu more donou puletao hi chikha haitaosü peikhaio. 8Ana maitalinou puhvei ta-rai maitaoye ea matsüsoua lah puhvei kikha maitaoye ki-kotou peimo louzü puhnou lü naye sü baloure ea puhsü lüloumomai ali jünou shikoure.
9Po rairou pamoyu meapfümai tali zhih hai meapfümai zhihbvühi rüthouwuso. Süthemoa puh hai vuhlikhei nghibaiyu maipfüli vuzübailai; 10alia puh hai vahvei souyu hinou zhih tayu maipfüli soulai; süolouzü puh nahmaiye soutaosoua ki-ko peiyu, shevai-shesüye shetou peiyu, sheeyumai phidzü khüpeiyu, vea-laimaiye soukha peiyu, alia vahvei teitei hinou lenou shoyu maipfüli soulai.
11Ana nale-a buyu meapfümaitao zhih hai zhihbvühi rüthouwuso; daiolouzü puletao vei pfüphao züpa nanou panou puletaoye nghitanüyu kisü puletao nou Khrista hinou talata baiwe, 12alia sübüa puletao vei chou araina pfükhoyu vanou mahta baiwe. 13Sübaimoa, puletao nou ki ki hinou ta-a teile souhare dosü puletao nou doulouwe; alia hi-a buyu likhei baimoa puletao nou maichi-maila ku-a ea mai vahnou lahvah soua puletao nou paozü moyu chinou paota baiwe. 14Südonou nahleyu meapfümai taonou nghiyu, nahmai hrüyu, puletao vei kikha vahsü zhutou louyu, alia sübüa ngaobamaiye panou Eletaoye konüre zhou avei peimoresü Enou züpae. 15Daiolouzü puletao kamaisü Saitan thaifüa tare donou tarei tare. 16Ana lülouyu naotumai talivei kikhahi meapfümaitao bue toulouzü puhnou puletaoye zhulouyu sü souloukhaio ea vah süsü lülou maime pei hi lükhaiwuso, sükulouzü lüloumaime nou chekhao-a likhuyu meapfü maitaoye zhupei lousüe.
17Khotou pei-a buyu tsümaitao, matsüsoua ko paodouyu ea doupeiyu hinou te-a vah souyu puletaoye sü zha ahai koua tsükhou peizüe. 18Daiolouzü sheeyu larübvü nou paoe, “Thou taikouyu chodeye nenou mü phuwulai moe,” alia “Vah souyumai alinou puhvei zhosü ngaozüe.” 19Mai ahai, asüvei chi lapeiyu hinou moa nou tsümaili pei hi mah dukhaiyu sü keipeiwuso. 20Kukhe maitaoye-a panou piloure donou mah souyu tsümaitaoye sü maikhemai hrülai nghojünou dua tukha peikhaio.
21Maiye limayu moa zhai souku kuyu li-a soukhaimoa chikha haitaosü züloure donou Ramai, Khrista Jisu ea dopayu rakivamaitao nghojünou Enou neye tukha-a paowe. 22Maitali pei hi thala-a bah lakhaiwuso, moa mai kukhemai mah hi lou koa zha ngaozhowuso; nelah sheetoua bulo.
23Dzü likhei kewuso, ana nehai tobai soumoa lishi-a bubaiyu vanou ne pou donou darkha zhaoh daotu seikhaio.
24Mai kamaivei mahwo puletao jünou rai ta-a chikumo jühinou sheetoua ngaobaiwe; ana kamaivei mahwo thaikhai hinou likhei ngaolou baiwe. 25Sübüa vahvei taohai dua ngaolou baiwe, alia dua ngaomoyu tao-a kukhai louhoe.
Currently Selected:
1 TIMOTHI 5: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
