1 THESSALONIMAI 3
3
Timothiye Seiveyu
1Südonou Ehnou neleye daomoa buyu hisü shamea louho vuzüyu kisü Ahai lahnou Athens hi buyu nanou veibailai tea Eletao nou chokouloure, 2alia sübüa neletaoye lü hilonou soutsü peiloure ea neleye le soudu peiloure donou Ehye koa Khrista vei Ko Aveina paodoua laiyu Ramai kilai Eh thaihou jürai Timothiye Ahainou seivewe, 3süolouzü souveayu haitao vanou neletao maitalia thaikhaitawu laimoe. Daiolouzü sükua souveayu hai Eletaoye donou Ramai nou souda khaiyu alie touyu hai neletao lahnou süwe. 4Daiolouzü Ehnou neleye koa bubuki hinou Eletaoye souvea vuzülai tea raia Ehnou nelehi paopeire; alia neletao nou süa buyu sübütoua paloure. 5Moshilaiyu ko haina vanou Enou shamea louho vuzüa neletao vei lü nasü süloure donou Enou Timothiye seivewe, daiolouzü bo ali hilonou rashi nanou tave neletaoye thaoloua Eletao nou te-a vah soukhai touyu teiteisü raoha bailai moma touyu sü Enou ngaopiwe.
6Ana chuo Timothi hai khaivere ea neletao vei lü ea leshina vanou sashoyu ko nasü Eh hi pove peie. Puhnou Eh hi nelenou Ehye donou tobai soumoa leshishoa choa bue alia Ehnou neleye daonüshoa buyu kua nele-a Ehye dounüshoa bue touyu kosü Eh hi ve paongao peie. 7Südonou, thaihou jürai khemai, Ehvei kao-ashi ea vea-hoyu veishi hinou Ehye sü nele vanou neletao vei lü nanou le soudupeie; 8daiolouzü neletao nou soutaosoua Mapaowo hinou la-a buloure toulouzü, chuo Ehsü chechenou hria bure. 9Ehnou nele vanou Eletao Ramai nghojünou sashoyuna ngaolouyu sütao teitei vanou kalo kazhou koute Ramai hi peilou sülai. 10Ehye panou zhu kheihao-a tave neleye daoloure ea nele lühi chemoa buyu taosü peiloure donou Ehnou Ehle teiteinou khei-hea puh hinou khoa bue.
11Eletao Puo Ramai puhnou ea Eh Mapao Jisu nou Ehye panou nelehi veloure du nasü souda peiyu souloukhaio! 12Ehnou neleye leshishoyu süzhou Mapao nou neleye panou alinou liye leshiyu ea maikhemai hrülaiye leshi pulailaiyu souloukhaio. 13Haibüa puhnou neletaoye soutsü peilai, alia Eletao Mapao Jisu nou puhvei sheeyu maitao hrülaiye koa veyu kisü Eletao Puo Ramai nghojünou neletaosü liche loulai ea sheeloulai.
Currently Selected:
1 THESSALONIMAI 3: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
