1 SAMUEL 30
30
Amalek Maiye Soureih Souyu
1Teithe asü zhou sü David ae puhvei maitao hai Ziklag hisü velou loure. Puletao hathai nou Amalek mainou Negeb ae Ziklag hisü reih huloure. Puletao nou Ziklag nuh sü meidei hawure, 2ae puletao nou naotumai hrülaiye sü mailia southamoa puletao vei hukhamai soua nüpoa takhai toure. 3David ae puhvei maitao nou dakhai veyu phaki, puletao vei nuhdu nasü meidei hawure, ae puletao vei khapfü ae nahmai hrülai hai nüpoa takhai toure. 4Süthaisü David ae puhvei maitao hai shusoua krare, puletao nou shalou mokoute sübüa krare. 5David vei khapfü Ahinoam ae Abigail puhai-a nüpoa tare.
6David hai veashoa nou bure, daiolouzü puhvei maitao hai puletao vei nahmai ae chapfü hayu donou levea-a puhye chuh nou deithalai tea buloure. Ana puhvei Ramai Mapao nou puhye tsüle souduso peiwure. 7Südonou David nou Ahimelek nahpoutu Abiathar napao hisü paoe, “Mapao vei leli poa zhure ephod sü ahi pove peio,” ae Abiathar nou puh hi pokou peie. 8David nou Mapao hi noue, “Ngaoba maitao thaihu tayu veishi-e? Enou puletaoye thaingou lousü homoe?”
“Thaihu takhaio, nenou puletaoye thaingou lousü hie, ae nüpoa tayu maitao-a vupa lousüe,” tea Mapao nou chila peie.
9Südonou David nou puhvei mai kaihrou taosü saloua tare, ae puletao nou Besar Rei hi kouyu phaki, kamai-a talou hoa sühinou pa bure. 10David nou mai kaihdai saloua tapu tare, ana mai kaih hai louzü vealeyu donou talou hore, südonou puletaoye buh sühi khaiwure. 11David ye koa tayu mai ali nou Ejipt mai ali hai ludu hinou ngaoloua puhye sü David hi save-e. Puletao nou puhye sü touso peie, 12ae doushiki nou soukhai touyu raokhao, ae darkhashiki nou koa souyu raokhao phe ahai peie. Puhnou touso sütao tou louyu thaisü pfüchi ngaoloure; daiolouzü teithe asü hai puhnou halia touso more. 13David nou puh hi chi noue, “Nevei paopu sü thaowe, ae ne buh daikinou ve-e?”
“E hai Ejipt mai-e, ae Amalek mai ali vei qila souwe. E soulouyu donou apaopu nou Eye thaowua tayu teithe asü pare,” tea puhnou chila peie. 14“Etao nou Kerit maivei teidei Negeb hilo, ae Kaleb maivei teidei Negeb ae Ziklag nuhdu hisü reih hulou meideia tawe,” tea puhnou paopue.
15David nou puh hi noue, “Ne Etaoye puletao hi save peilai homoe?”
“Nenou ahi Eye southalai moe, ae avei paopu hi Eye peidakhai laimoe tea chaachou soupeiyu thaio, Enou sata peilai,” tea chila peie. 16Südonou puhnou David ye sü sa-a homaitao hi vepeie.
Homaitao hai dei kashoyu buh ali hinou raroupoa touso-a ae khonüh nüa bure, daiolouzü puletao nou Philistin maivei teidei hinou ae Judah maivei teidei hinou nangi khesü alaosou shaopove khaitoua nou bue. 17Thainesho tei thepayu phaki, David nou reih hulou puletaoye sü tei zhimo koute reih soue. David vei nahlemai kaihdai hai rachotao hinou nakhesü koupo souloua tapaloue, anou kukhe maitao hai mai ali koute-a hria nou turei palou more. 18David nou Amalek mainou potayu natao ae nüpoa tayu maitao, puhvei chapfü ahai-a loua nou vupakhai touloue. 19Puletao vei natao, ae chapfü nahmaitao hai mai ali koute-a hamoa ngaokhai touloue. David nou puhvei maitao vei chapfü nahmaitao ae Amalek mainou potayu natao hai lahkuku hi dakhai peie. 20Puletao vei kikhaorü teitei-a puhnou poda khailoue; ae puhvei maitao nou sütao hai puletao nghoujü nou huta-a nou haibüa paoe, “Haitao hai David vei baie.”
21Süthaisü David nou lülou hoa Besar reipe hinou thaokhai touyu mai kaih ahai hisü dakhai ve-e. Puletao nou David ae puhvei maitaoye süloure donou sashoa nou tapa-e, ae David nou puletaoye sasho poa nou takou daoloue. 22Ana David ye koa salaiyu maishiyu ae zhaidou sümoyu kamai-a nou haibüa paoe, “Etaoye koa tamoyu maitao hai puletao vei chapfü nahmaitao louzü podakhai loua bailai, ana Etao nou ngaolouyu natao louzü aliro peilai moe.”
23Ana David nou puletao hi paoe, “Athaihou jürai maitaore, Mapao nou Etao hi peikhai touyu nasü neletao nou sübüa soulou shi-e. Puhnou Etaoye sü panou kaozhou ashi daomoa veilouyu sü peie. 24Neletao nou paoyu nasü mai kukhe maitao-a ae-ao toupei laimoe. Südonou mai hrülai nou raibütoua bailai: soureih hi tamoa ki hinou navei kho-a buyu maitao-a soureih hi tayu maitaoye raibütoua zha sü ngaozho-a bailai.” 25David nou haibüa chikha sü souloure, ae Israel mai hai zhai haina nou haithai-a sübüa ta-e.
26David nou Ziklag hi dakhai velouyu phaki, puhnou ngaolouyu natao hai Judah hi buyu puhvei samaitao hi ae süthai-apei maitao hi “Na haitao hai Mapao ye ngaobayu maitao hinou polouyu sapeina-e,” tea pao-a nou seita peie. 27David nou sapeina khesü Bethel hi mai, Judah khelova buyu Ramah, ae Jattir nuhdutao hinou hrüyu maitao hi, 28Aroer, Siphmoth, Eshtemoa, 29ae Rakal maitao; alia Jerahmeel, Ken maitao hi, 30Hormah nuhdutao hinou buyu maitao, Borashan, Athach, 31ae Hebron maitao hisü seita peie. Puhnou sapeina khesü puhnou ae puhvei maitao nou tutsüa tasühaoyu nuh teidei teitei hisü seita peie.
Currently Selected:
1 SAMUEL 30: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
