1 SAMUEL 25
25
Samuel Thaiyu
1Chuo Samuel hai thaire, ae Israel mai hrülai hai tave jüloua puhye donou dopfü peie. Süthaisü puletao nou puhye sü Ramah hi puhvei ki hinou daovu peie.
David ae Abigail
Süthaisü David nou Paran maivei vaohro hi ho butare. 2-3Maon nuhdu hinou hrüyu Kaleb khü hinou mai ali Nabal tea nou bue, ae Karmel nuhdu pehao hinou puhvei teidei taoli bue. Puh hai hangi shoyu mai ali-e, zhaotu thesü ae nghitu theli bue. Puh chapfü zhih nou Abigail toue, ae honapai hai hüvei shoe, alia tsüdo hai-a veihshoe, ana puh louzü hasü moe, ae zhaipou-a shishoe.
4Nabal hai Karmel nuhdu hinou zhaotu mai sai-a bushe touyu ko hai David nou chouloure. 5Südonou puhnou nahlemai kirou hai taho Karmel hinou Nabalye phouloua puh hi avei asayu chido peio tea kharochi peia seitae. 6Puhnou Nabal hi haibüa paolo tea puletao hi paopeie, “Ne sa David nou ne hi, nevei kihikha maitao hi, ae ne hinou buyu mai hrülai hisü savayu ae kaonayu chido hai seivewe. 7Nenou zhaotu mai sai-a bue touyu hai puhnou chouwe, südonou nevei zhaokho maitao hai Etaoye koa bue ae Etao nou puletao hi hashi lia soumoe touyu hai ne-a panou sülou nüwe. Puletao nou Karmel hi bukisa sü puletao vei natao hai ali-a hamoe. 8Nenou puletao hi nou louzü, puletao nou ne hi paongao peishulai. Etao nou ne hi khonüh nüyu teile hinou vewe, ae David nou Etaoye zhuvea peio tea ne hi khowe. Nenou peinüyu hataralia nevei kilai Etao hi ae ne sa David ye zhuvea peio.”
9David vei maitao nou chipao haitao hai David vei zhih hinou Nabal hi paongao peia puletao nou sühinou kho-a bue. 10Süthaisü Nabal nou puletao hi haibüa chila peie, “David? Puh sü thaoge? E puh zhih choukhai toumo hie! Zhaodo hai paopu hinou tutayu kilai mai alao soua Etao teidei hi bua baire. 11Avei touso ae zhaotu mai saiyu maitaoye donou datha peikhai touyu kikhaorü khesü daiki nou vewe touyu sümoyu mai ali hi E daisounou peilaige?”
12David vei maitao nou dakhai ve Nabal nou paoyu chipao khesü puh hi paopeie. 13David nou puhvei maitao hi “Khoche pfükhai toulo,” tea kharochi peie, ae puletao nou paoyu thaifüa souloure. David-a puhvei khoche sü khipfüloua mai kaihdai hai saloua tare, ae puletao vei na khesü panou khore donou mai kaih ahai hai khaiwure.
14Nabal vei kilai mai ali nou Nabal chapfü Abigail hisü paoe, “Ne halia sühomoe? David nou puhvei kaonayu chido aveih sü puhvei maitaoye panou Etao paopu hi pove peie, ana Etao paopu nou puletaoye sü hrao soupeia panou dakhai tare. 15Ana puletao hai Etao hi mai veih shoa baiwe, ae puletao nou Etaoye daichoro khai toumoe, ae puletaoye koa vaohro hinou buyu phaki, Etao vei navei hai ali-a hamoe. 16Etao nou zhaotu kho-a buyu teile hi, puletao nou Etaoye hea khei sümoa vupeiwe. 17Südonou daisouyu-a veilai touyu haina hai nenou tsü choloua souloumo louzü, Etao paopu hi ae puhvei kihikha mai hrülai hi kaozhou ashi velou vei-e. Etao paopu hai zhaipou shiyu donou mainou paoyu chi ali-a polai moe.”
18Süthaisü Abigail nou thashoa nou raokhao pho kaih hai, zhaoh nou souhee lekhabvü ahai, zhaotu angou dathaloua mei roupfü, thoubu sühdou kianai salou, ae darkhashiki nou soukhai touyu raokhao pho kaihli alia doushiki nou koa soukhai touyu raokhao phe kaih ahai taosü koupo souloua rheisüh phao hi khailoure. 19Süthaisü honapai nou puhvei kilai maitao hi “Neletao rai-a takhaio, E-a neletao thaifü talai,” tea paoe. Ana honapai nou haisü puh khapu hi paongao moe.
20Honapai nou rheisüh sü pfüa deichao hi takouyu phaki, David ae puhvei maitao hai puh hilova takou puhye daoloure. 21David nou haibüa tsücho-a ta-e, “Enou mai haina vei na khesü daisou nou vupei khaisarou? Puhvei navei khesü panou ali-a hamoe, Enou puh hi haveih soupeiyu muh hai puhnou Eye haibüa paoh kha peiyu phare. 22Zhou khei tei thepa loumo jünou puhvei mai hrülaiye southakhai loumoyu thaio Ramai panou Eye southa theo.”
23Abigail nou David ye ngaolou khaie, honapai nou thalasoua rheisüh phao hinou deiphi taokouloua David nghoujü nou deiphi hi kaolou puhye khurü loure. 24Honapai nou David ye khurüloua paoe, “Apaopuwo, zhuvea nou achi keipeio! Kaomoa soukhai touyu mah khesü Enou pfülai. 25Nabal nou zhaipou shi-a paokhai touyu chi khesü popeiso! Apaopuwo, nevei kilai maitao nou veyu phaki, Esü sühi ha-a puletaoye daolou more!#25.25 Nabal: Hebrew maila hinou zhih haina vei ko hai “voyu” touwe. 26Mapao nou neye panou maiye southayu ae ne lah khüngu phouyu sü nuchao peiyu donou, chuo apaopuwo, Mapao zhih hinou E ne hi chaachou soua paowe, süolouzü neye ngaobayu mai, ae neye soushilai tea buyu mai hrülaiye sü panou Nabalye tudee peilaiyu büa tudee peitheo. 27Apaopuwo, zhuvea leshi hinou Enou pfüa laiyu avei sapeina khesü popeio, ae poloua nevei maitao hisü peio. 28Apaopuwo, Enou hataralia soumah khaitouyu bulouzü, zhuvea Eye khaipeio. Mapao nou neye panou ae nevei tyaosholea maitaoye panou veo sü souloulai, daiolouzü nenou puhvei soureih nasü souwe; ae ne hria bubusa sü hashi ali-a souso. 29Mai ali nou muhtei na ali hai khotou tea buyu büa mai tarali noua neye dua southalai touyu maitao hinou Mapao nou neye sü vupa peilai. Mai ali nou chuh poa shilaiyu büa Mapao nou neye ngaobayu maitao sü poa khilai bailai. 30Mapao nou apaopei khaitouyu haveih haitao hai ne hi veyu phaki, ae neye panou Israel mai pei hi veo koulouyu phaki, 31nenou kaomoa vah soukhai touyu donou moa ne lah chaochaosoua khüngu phoua maiye southa khaitouyu donou ne hai le vealai moe. Mapao nou neye shiha peia veilouyu teithe, ne kilaipai E-a ngaipeiso.”
32David nou honapai hi paoe, “Zhou teithe neye ahi seive peiyu Israel maivei Ramai Mapao ye sü paosholo. 33Nevei tsüdo aveih donou zhou teithe Enou maiye southare hinou ae Eye panou lah avei khüngu phoure hinou nuchao peiyu donou Ramai kalo paowe. 34Neye soushire hinou Mapao nou Eye nuchao peiwure. Ana hria buyu Israel maivei Ramai zhih hinou chaachou soua paowe, süolouzü zhou teithe nenou thashoa Eye ve daolou moyu thaio, dosho tei thepayu phaki, Nabal vei mai hrülai hai thaikhai toulaire.” 35Süthaisü honapai nou pfüa veyu sapeina khesü David nou poloua honapai hi paoe, “Kaonaphi teanou ne ki hi dakhai tawo, daiolouzü nenou jüpa-a khoyu nasü Enou ae-ao toupeiwure.”
36Abigail nou Nabal hi dakhai veyu phaki, puh hai ki hinou veo mai ali büa khonüh nüa savashoa nou bure. Puh hai touso zhi-a nou vashoa bure, südonou honapai nou puh hisü süzhou khei hai chi lia paongao more. 37Thainesho hai Nabal nou tsü palouyu thai, honapai nou puh hi ko khesü paongao peie, ae puh hai levea loua lülou hore, ae po thaitare. 38Teithe kirou thaisü Mapao nou Nabalye sü southawure.
39David nou Nabal hai thaire touyu ko choulouyu phaki, puhnou paoe, “Eye hraongu soupeiyu Nabalye akhüngu phou apeio, ae puhvei kilai Eye panou hashi soure hinou nuchao peiyu Mapao ye sü paosholo! Nabal nou hashi souyu donou Mapao nou puhye sü tudee peie.”
Süthaisü David nou Abigail ye puh ki ve-a baio tea noure donou maiye seita-e. 40Puhvei kilai maitao nou Karmel nuhdu hi ve honapai hi paoe, “David nou neye nare donou Etaoye seivewe.”
41Abigail nou deiphi nakou khurüloua paoe, “Esü puhvei kilai baie, ae puhvei kilai maitao phi dzükhü peire donou tuda-a bue.” 42Honapai nou thalasoua rheisüh sü pfüloure ae puhvei kilai naotumai angou saloua David vei kilai maitao thaifü tare, ae David vei chapfü soutare.
43David nou Jezreel hinou Ahinoam ye naloue, ae chuo Abigail-a napu loure. 44David chapfü Mikhal, Saul nah naotupai hai, chuo Saul nou Gallim nuhdu hinou hrüyu Laish nahpoutu Palti hisü peiwure.
Currently Selected:
1 SAMUEL 25: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
