1 SAMUEL 21
21
David nou Saul hinou Tutayu
1David nou Nob nuh hinou buyu napao Ahimelek hisü tuve-e. Ahimelek nou ngaopi shopoa tapa puhye süloua chi noue, “Ne daisounou mailia samoa hai hi vewe?”
2“Veo vei vah matsü shoyu ali soure donou E haihi vewe,” tea David nou chila peie. “Puhnou Eye seitayu vah haina sü panou mailia sülouso tea ahi paoe. Avei maitao hai Enou paokhai touyu buh ali hinou Eye ve daolai. 3Ne hi touso toulou veiyu daie bue? Eye raokhao moyuma toulou veiyu touso taralia bulouzü peio.”
4Napao nou David hi chila peie, “Ahi maisou nou toulou veiyu raokhao sü hare, posheela khaitouyu sheeyu raokhao likhei bua baire. Naotumai vasou deimoa naanou hinou shee-a bulouzü raokhaotao sü toua bailai.”
5David nou chila peie, “Etao hai naanou hinou shee-a baie. Avei maitao hai vah soulai tea tayu phaki naanou hinou soushee loua ta-a baiwe. Süpei nou zhouvu vah soupfüre haina sü matsü shoyu ali-e, südonou daisou nou soushee moa takhailai-e!”
6Südonou napao nou puhye sheeyu raokhao sünou peie, daiolouzü puh hi buyu hai Ramai hi posheela peiyu raokhaotao likhei bubaie. Raokhao sütao hai chuchu nou soukhai toua sheeyu buh hi pothou leada khaitouyu raokhao-e.
7(Süzhou teithe hai Saul vei zhaokhomai peikhowo sü naanou hilonou vah soumo louzü shilaiyu donou sühi bue. Puh zhih sü Edom puona Doeg touwe.)
8David nou Ahimelek hi noue, “Ne hi heung moyuma khoche ali-a buhage? Veo nou thashoa kharochi peiyu donou E hai avei basei poa laiyu teile ha-a thashoa tuta baire.”
9Ahimelek nou chila peie, “Nenou Elah Deikho hinou southa louyu Philistin puona Goliath vei khoche likhei bua baie. Sünasü Ramai vei leli poa zhuloure ephod thailo hinou sah nou zükhai toua bue. Nenou jüpa-a polai toulouzü polo.”
“Khoche tenasü Eye peio,” tea David nou chila peie. “Khoche süna jünou veipuyu ali-a ha-e.”
10Sübüa David hai Saul hinou tutare, ae Gath hi veo Akhish hisü veloure. 11Veo vei peikho maitao nou Akhish hisü paoe, “Mai haina hai lah puhvei teidei hi veo David mowu? Mai haina hai naotu maitao nou haibüa lou soushoyu nare, ‘Saul nou mai the-the southa loue, ana David nou mai thekirou thekirou southa loue.’ ”
12Maikhe mainou paoyu chipao khesü chouloua David vei le sü deiwure ae puhnou Veo Akhish ye sü ngaopi loure. 13Südonou David nou puletao nghoujü veyu phaki vomai dou souloure, ae vomai büa puhnou kivo vahi ae rokhubomü hisü larücha rüa lai-a baiwe, ae puhvei khoumai vasü panou tudzü zhaokou-a buloure. 14Südonou Akhish nou puhvei peikho maitao hi paoe, “Zhukhaio, mai hainasü vore! Neletao daisounou mai hainasü ahi povewe? 15Ahi voyu mai kukhe hare tea neletao nou mai hainasü anghoujü savewu? Mai hainaye save aki hinou haodou loumoyu vah sü panou ahi soungaolai tea neletao nou savewu?”
Currently Selected:
1 SAMUEL 21: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
