1 SAMUEL 13
13
Philistin Mai Pei hi Reih Souyu
1Saul nou veo koulouyu phaki puh hai po shirou pare, ae puh nou Israel mai hi po ahai hai veo soue.#13.1 Larübvü kamai hia phoure 1 nahai hae. 2Saul nou Israel mai hrohinou mai thesü hai dopa loure, puhnou mai thehai hai saloua Mikmash deichi vanou buyu Bethel nuhdu hinou koa buloure, alia mai theli hai puh nahpoutu Jonathan ye koa Benjamin khü vei teidei hi buyu Gibeah nuhdu hisü seitare. Mai kukhetao hai Saul nou lahkuku ki hi seidakhai tawure.
3Jonathan nou Philistin maivei reihmai peikhowo sü Geba hinou southawure, ae ko haina sü Philistin mai hrülai nou chouloure. Süthaisü Saul nou kopomaiye seiho Hebrew mai hrülai hi talou reih soukhaio tea shabe nghoua tyadei teitei hisü paosüta-e. 4Israel mai hrülai hisü Saul nou Philistin maivei reihmai peikhowo ye southawure, ae chuo Philistin mainou puhye ngaora loure tea ko hai paota peie. Südonou maikhe mainou Saul ye tave babou peilai tea Gilgal hinou tave jüloure.
5Philistin mainou Israel maiye reih soure donou puletao hi rheiluki theshirou, rhei pfüyu mai therou, ae reihmai hai reipe hi phouhao louhoa buyu venai zhoua tave jüloure. Puletao nou tave Bethaven vei teinghi palova buyu Mikmash hinou fühao soua buloure. 6Süthaisü puletao nou soutaosoua Israel maiye soureih soutare, sübüa Israel maiye sü panou zhou hazhi-a veashoa bure. Südonou Israel mai hai kamai-a nou lyaqulu kinou, ae kamai-a deibvü chayu kinou, kamai-a chuhlya kinou ae dzübvü kinou tutsü tare; 7ae mai taoli hai Jordan rei tachopa Gad ae Gilead maivei teidei hi tare.
Saul hai chukoute Gilgal hinou buhie, ae puhye koa buyu maitao hai ngaopi shoa ngua bure. 8Puhnou teithe anai koute hai Samuel nou paoyu thaifüa puhye kho-e, ana Samuel hai Gilgal hisü velou loumo hie. Maikhe mai hai Saul ye thaowua tavai tarei tare, 9südonou Saul nou puletao hisü paoe, “Meidei-a posheelare natao ae kaona-a hrüloure donou poukai nüvei dei-a posheelare natao sü ahi pokou peio.” Puhnou meidei-a posheelayu khesü posheela peiwure. 10Puhnou meidei-a posheelayu nasü souche loubü Samuel sü veloure. Saul nou tapa puhye süloure, 11ana Samuel nou paoe, “Ne daivah souwure?”
Saul nou chila peie, “Maikhe mai hai ahinou tarei tapoa tare, ae nenou velai tea paokhai touyu sü nenou velou more; süpei hinou Philistin mai hai Mikmash hinou tave jüa buloure. 12Südonou Enou haibüa tsücho loure, ‘Philistin mainou Eye reih hulou laire, ana E sü Mapao vei jüpa soulou mohie.’ Südonou meidei-a posheela peimo louzü shire tea Enou tsücho loua posheela peiwure.”
13Samuel nou Saul hi chila peie, “Ne dai vosoua vah sünasü soudesa, nevei Ramai Mapao nou soulo tea peikhai touyu chikha khesü nenou zülou more. Nenou chikha khesü zülouyu thaio, Mapao nou nevei tyaosholea panou teisa nou Israel maiye khasa-a hrülai. 14Ana chuo nenou veo soupulai more, daiolouzü nenou Mapao vei chi zülou more. Südonou chuo Mapao nou jüpayu mai aliye panou puhvei maitaoye khasa-a hrüre donou dolou laire.”
15Samuel nou kushuloua Gilgal hinou tapoa Benjamin maivei teidei Gibeah hi tare. Ae Saul nou puhye koa salaiyu maitaoye phouyu phaki, puletao hai mai kaihrou phali bue. 16Saul, puh nahpoutu Jonathan ae puhai ye koa salaiyu maitao hai Benjamin maivei teidei Geba hinou fühao soua chaore, ae Philistin mainou Mikmash hinou fühao soua bue. 17Philistin mainou puletao vei reihmaitao hai me asü soua dadeloua kheikhei soua reih huloure. Me ali nou Shuel maivei teidei Ophrah hilo tare, 18me ali nanou Beth Horon hilo, ae me ali nanou Zeboim deikho zhingao-a buyu vaohro hilo tare.
19Israel maivei teidei hi hai hu kuyu mai ali-a hare, daiolouzü Philistin mainou puletaoye panou khoche ae heung kulou shulai tea souha khaiwure. 20(Israel mai hai puletao nou poa tatayu phou, kho, marei ae kai khesü Philistin mai hinou poho kuwe. 21Philistin mainou marei ae cho-ha phou mü tapeiyu hai pousha ali polouwe, ae poa tatayu phou mü tapeiyu hai pousha ahai powe.)#13.21 Hebrew hi sheesha timoe. 22Südonou reih souyu phaki Saul ae puh nahpoutu Jonathan ye salaiyu reihmaitao mai ali koute-a reih basei po moe; Saul ae puh nahpoutu Jonathan likhei basei poa baie.
23Philistin mainou reihmai me ali hai Mikmash ludu panou khure donou seita-e.
Currently Selected:
1 SAMUEL 13: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
