1 SAMUEL 11
11
Saul nou Ammon Maiye Soukanghi Peiyu
1Khouh ali thaisü, Ammon maivei Veo Nahash nou puhvei reihmai me saloua Gilead maivei teidei hi buyu Jabesh nuhdu nasü reih hulou poloure. Süthaisü Jabesh mainou Veo Nahash hisü paoe, “Etaoye koa vo soupeio, sükulouzü Etao nou nevei khakhe hinou hrüa bailai.”
2Nahash nou haibüa chila peie, “Neletao nou Eye koa vo soulai toulouzü haibüyu zhai ali hinou soulai: süolouzü Enou neletao vei nghithou zhoulova hai reilapa khaitoulai, sübüa Israel mai hrülaiye hraongu soupeilai.”
3Jabesh hi süthai-apei maitao nou paoe, “Etaoye teithe anai peio, sükua Etao nou Israel maivei teidei teitei hi ko seita peilai. Süthaisü mai ali-a Etaoye tave soukha peimo louzü, Etao nou ne phi hi velai.”
4Kopomaitao nou tave Saul nou hrüyu Gibead nuhmai hisü ko paosü peikhaie, nuhmai hrülai sü shusoua kra-a bure. 5Saul nou dou hi holoua ki hi chode ahai sü hupoa dakhai veyu phaki, maikhe mai hai kra-a buyu ngaolou khaie, puhnou noue, “Daivanou mai hrülai hai kra-a bue?” Puletao nou puh hisü Jabesh hinou veyu kopomaitao nou paoyu ko khesü paongao peie. 6Saul nou ko sü choulou khaie, Ramai vei rako nou puh hisü koulou loure, ae puh hai rarou sholoure. 7Puhnou chode ahai sü dathaloua souvava nou daodesa touloua Israel mainou hrüyu teidei teitei hisü kopomaiye panou poloua haibüa ko paota peie: “Mai taralia Saul ae Samuel ye thaifü moyu maiye sü chode haina büa soupeilai.”
Süthaisü Israel mai hrülai hai Mapao nou haibüa sourai hai ngaopi loure, südonou puletao mai hrülai hai me ali souloua tave joloure. 8Saul nou puletaoye sü Bezek hinou save jüloure, ae puletaoye maipei phouyu phaki, Israel mai hai 300,000 ae Judah hinou mai 30,000 hai ve jüloue. 9Jabesh hinou veyu kopomaitao hisü puletao nou haibüa paoe, “Taho neletao vei nuhmai remai hisü dosho teithe hea pamo jünou neletaoye tave vupa peilai tea paopeio.” Jabesh mainou ko sü choulou khaie, puletao hai sayu nou paoshalou hore, 10ae puletao nou Nahash hi haibüa paoe, “Dosho Etao nou tave nevei khakhe hisü peithoulai, ae nenou Etao hi dai sounüyu nasü souloua bailai.”
11Süzhou khei hai Saul nou puhvei reihmaitao hai me asü soua dade loure, ae tei thepayu phaki puletaoye ngaobayu Ammon maivei fühao hisü reih hulou puletaoye sü hea payu koute hai southa peie, ae southalou moa tupa louyu maitao hai mai alili nou turarou poa tare.
12Süthaisü Israel maitao nou Samuel hisü tave “Saul ye panou Etao vei veo soulai moe tea paoyu maitao sü daiki bue, puletaoye Etao bah hi thoupeio, puletaoye sü southawulai” tea khore.
13Ana Saul nou puletao hi paoe, “Zhou teithe hai mai ali koute-a southa laimoe, daiolouzü zhou teithe hai Mapao nou Israel maiye vupa peiyu teithe-e.” 14Samuel nou maikhe mai hi paoe, “Etao mai hrülai nou Gilgal hi taho Saul ye panou Eletao vei veo soure donou bakha ali shapapu laikhe.” 15Südonou mai hrülai nou Gilgal hi taho sheeyu buh hinou Saul hai puletao vei veo soure tea shapapue. Puletao nou Mapao hi poukai nüvei meidei-a kaonayu posheela hai posheela peie, alia Saul ae Israel mai hrülai nou asashoa khonüh nüe.
Currently Selected:
1 SAMUEL 11: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
