1 PITAR 3
3
Chaa ea Chapfü Mainou Tare Zhaihrü
1Sübütoua chapfü maitao neletao-a neletao chaamai khehi hrülo, sübüa puletao hronou maitalinou Ramai chipaosü louche molouzü, neletao vei zhaihrü nou puletaoye panou louche loure koloulai. Neletaoye donou chilia paoyu matsü hae, 2daiolouzü neletao vei zhaihrü hai daizhozhou sheesa ea tsükhoulou veisa touyu sü puletao nou ngaoloulai. 3Neletao zhu panou veiloure vakouhi nakhe maitao süolouzü peishu khipfüyu, sana touh touyu moa sabanüh avei nou tuwuso. 4Süjünou neletao vei zhu veiyu hai neletao lekhehi buyu mai achechena süolouzü halou hoyu nataiyu vei sana touh alia kaonayu rako sünanou tulo, süsü Ramai nghojünou muh teikayu nasüe. 5Daiolouzü Ramaiye nou zhitei-a buyu raichoki sheeyu naotu maitao nou puletao chaamai khehi hrüa buyu sünanou lah puletaoye tuwe. 6Sarah-a sübüa soue; puhnou Abraham chi züa puhye nou paopu tea kue. Alia chuo neletao-a vah avei soua hataliye pikhaimoa bulouzü neletaosü puh nahmaitaoe.
7Sübüa chaakhemai neletao-a neletao chapfümaitao hai lelouho kouyu maitaoe touyu sü sütou peiwua koa hrülai. Puletaoye tsükhou peikhaio, daiolouzü puletao-a neletaoye koa Ramai vei teisa ahri vei sapeina nasü ngaozholai. Neletao vei veachi nasü hataliye panou khulou more donou haina hai soukhaio.
Acheche Vah Souyu donou Veahoyu
8Akhai hinou, neletao hrülainou tsü-le ali souyu, maiye zhuvea peiyu, thaihou jürai kua leshi zhoyu, le nataiyu ea nashayu hrüsü buloukhaio. 9Ashinaye donou ashinou moa chapeiyu naye donou chapeiyu nou pao rüwuso; süjüwo, hapeikhaio, daiolouzü neletaoye panou ha ngaoloure donou süsü souloure Ramai nou neletaoye kuloure. 10Daiolouzü sheeyu larübvü hinou haibüa paoe,
“Hrümaiye leshiyu ea avei teithe ngaonü-a buyu puhye panou ashi chi ea amada chi paore hinou khalou khaio.
11Puhye panou ashi hinou tareiloua avei nasü soulou khaio;
puhye panou puh le teiteinou kaonayu sü phoulou khaio.
12Daiolouzü Mapaowo nghithousü achechemai pei hi phe-a bue,
alia puhvei nousü puletao nou veachi paoyu sü kei-a bue.
Ana Mapao vei zhuwo ashi souyu maitaoye ba-a bue.”
13Chuwo neletao nou avei nasü sounüshoa bulouzü thaohnou neletaoye soushiwulai? 14Anou neletao nou achechena souyu donou veaho-a bukhai-a, neletaosü daizhozhou rako veisa! Maitaliye piwuso ea le chorowuso. 15Ana neletao le hinou Khristaye Mapaowo nasüe tea tsükhoulo. Neletao lekhehi buyu areihna vanou neletao hi chi nouyu puh hisü chila peire teisanou soudalo, 16anou süsü natai-a ea khuhao-a souloukhaio. Khrista thaifümai alisoua neletao nou tayu zhai avei naye sü paoshiyu süolouzü neletaoye chi ashinou ngheihyuki puletaoye panou ahrao ngaoloure donou neletao peikhao leikei-a bulo. 17Daiolouzü süsü Ramai vei lichoyubaie toulouzü ashi souyu vanou veahoyu jüwo avei souyu donou veahoyu sünanou veikouhie. 18Daiolouzü neletaoye Ramai nghojühi save peire donou, mahmaitao sühsoua avei mai ali, süolouzü Khrista nou mah donou vuhli hinou teisa vei soua thaipeire. Puhye sü pfüphao hilonou southeare, anou rako hilonou souhri peiwure, 19alia puhnou rako hilonou hriyu hinou hukhahi buyu rakotao hi taloua ko paodoue. 20Rako haitaosü daoraiki Noha nou dzüluki soubuki teithetao hi Ramai nou shamea-a khokhai khai-a puh chi zübayu maisütao vei rakotaoe. Dzüluki süna lekhe hi buyu mai daotu süolouzü puletao mai acha likhei dzü vanou khailulou baie, 21süsü chu neletaoye khailu peiyu dzükhao dayu sünavei nada alie. Sünasü vasou hi hai khükouyu süna moe, ana süsüwo peikhao leikei-a Ramai hi apaokhai touyu alie. Sünanou neletaoye Jisu Khrista hrishu louyu vanou khailupeie. 22Jisu Khrista hai raki hi khetare ea puhnou Ramai bahkha zhoulo vahinou bu-a rakivamai hrülai pei hi, alia kukhe raki vanou paopu souyu ea khouko buyu rakotao pei hi tukha-a buloure.
Currently Selected:
1 PITAR 3: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
