1 VEMAITO 9
9
Ramai nou Solomon hi Dakhaiveyu
(2 Puo 7.1-22)
1Veo Solomon nou Rathoki ae veo vei ki alia puhnou sounüa buyu taosü souche louyu phaki, 2Mapao nou ahai chena sou-a puhye raichoki Gibeon hinou daoyu büa tave daopeie. 3Mapao nou haibüa puh hi paoe, “Enou nevei veachi sü chouloure. Teisa nou Eye thore donou soushu khaitouyu Rathoki nasü Enou soushee peiwure, alia teisa Enou khopeilai ae vupeilai. 4Nenou nepuo David bütoua Eye tsüle sheesha teanou ae cheche-a avei kuvah soulouzü, alia avei chikha züa ae Enou kharochi peikhai touyu teitei hai soupfüa bulouzü, 5Enou nepuo David hi puhvei tyaosholea maitaoye panou teisa Israel mai hi veo soukoute peilai tea chaachou soukhai touyu nasü panou vete loulai. 6Ana ne moa nevei nahmaitao nou athaifü molouzü, ae Enou peikhai touyu chikhatao ae kharochi khesü zümore toulouzü, alia rah kukheye thota louzü, 7süthaisü Enou peikhai touyu teidei hinou avei Israel maiye sü souhawulai. Eye thore donou soushee khaitouyu Rathoki na-a Enou thaokhaiwua bailai. Deiphao mai hrülai nou Israel maiye sü konüa bailai, ae ngaophou moa bailai. 8Rathoki hai nasü hashi laikhaiyu buh souta-a bailai, alia takou takheyu mainou ngaoloua khupa-a lüdaiyu ali soua bailai ae haibüa noulai, ‘Daidonou Mapao nou haibüa teidei haina ae Rathoki hai nasü haibüa sousarou?’ 9Maikhe mainou haibüa chila peilai, ‘Puletao nou puletao vei Ramai Mapao, puletao puopaoh maitaoye Ejipt teidei hinou sapa peiyu naye thaoyu donou she. Puletao nou rah kukheye thotayu donou Mapao nou haibüa veahoyu sü puletao hi pove peiwe.’ ”
Solomon nou Hiram Veo ye koa Ae-ao Soulouyu
(2 Puo 8.1,2)
10Solomon nou Rathoki alia veo vei ki souyu hai po kai loue. 11Tair hi Veo Hiram nou haosüü, sedar, alia puhnou jüpa-a vah soulaiyu sana teitei hai soukha peie. Vah soulou cheyu thai, Solomon nou Galilee teidei hinou nuhdu kai hai veo Hiram hi peie. 12Hiram nou nuhdu sütao hai taho zhuta-e, anou puhnou sütao hai jüpa more. 13Südonou puhnou Solomon hi haibüa paoe, “Athaiwo, nenou Eye peiyu nuhdu sü haitaodou!” Süvanou teidei sütao hai Kabul (komoyu) tea zhou koute kuwe. 14Hiram nou Solomon hi sana sühcho 4,000 jünou la-a seive peie.
Solomon nou Vah Soulouyu Kukhetao
(2 Puo 8.3-18)
15Veo Solomon nou taichü poa vah souyu maiye sa-a nou Rathoki ae veo vei ki, nuhdu vei teinghei palova sa-a deithouyu, ae nuhdu vei kivo hai soue. Puhnou Hazor nuhdu, Megiddo ae Gezer nuhdutao-a soushu puloue. 16(Ejipt hi veo nou Gezer nuhdu sü reih hulou koloure, puhnou nuhdu sühi hrüyu maitaoye sü southawure, ae nuhdu sü mei nou deihawure. Puhnou puh nahnaotupai nou Solomon ki veyu phaki, nuhdu sünahai shanghi vei nako ali soua Solomon hi peie, 17alia Solomon nou nuhdu sünasü soushu puloue.) Taichü poa vah souyu maitaoye sa-a Solomon nou Beth Horon Khelova nuhdu hai-a soushu dakhailoue, 18Baalath, Judah vei vaohro hi buyu Tamar, 19puhvei nangi pokhaiyu nuhdu, rhei ae rheiluki khaiyu nuhdu, alia puhnou soulai tea jüpayu teitei sü Jerusalem hi, Lebanon hi alia puhnou kho-a buyu buh veishi hinou souloue. 20-21Solomon nou puhvei taichüsa-a vah souyu maitao hai Israel mainou talou teidei polouyu phaki southamoa khaitouyu Kanaan maitao nou sa-a soue. Mai sütao hai Amor mai, Hit mai, Periz mai, Hiv mai alia Jebus maitao nou sa-a soue, puletao vei tyaosholea maitao nou zhou koute hai Israel maivei qila sü soue. 22Solomon nou Israel maiye panou qila sü soumoe; puletaoye panou reihmai, peikhomai, rheiluki pfüyu mai, alia rhei pfüyu mai panou soue.
23Solomon nou ki tyatyali souyu hisü panou taichü poa vah souyu maitaoye khore donou peichamai 550 dokhai peie.
24Solomon nou puhvei kipfü, Ejipt hi veo nahnaotupai nou David Nuhdu hinou puhnou soupeiyu veo vei ki hinou tayu thai, nuhdu vei teinghei palova buyu dei nasü thoupeie.
25Po ali hi bakha asü hai Solomon nou Mapao ye donou soukhai touyu posheelabu hinou meideia posheelayu ae chavei lathao-a hrüloure vei posheela hai posheela peie. Puhnou poukai nüvei-a posheela peie. Haibüa puhnou Rathoki sü soucheloue.
26Veo Solomon nou dzüluki-a Ezion Geber hinou souloue, süsü Edom maivei teidei, Elath teidei nghitei-a bue. 27Veo Hiram nou puhvei kilai mai, dzü hinou vah soulou süyu mai sü Solomon vei kilai maitaoye koa panou vah soukhare donou seive peie. 28Puletao nou dzüluki pfüa Ophir teidei hilou tare, ae puletao nou Solomon hi sana sühcho 14,000 jünou la-a pfüve peie.
Currently Selected:
1 VEMAITO 9: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
