1 VEMAITO 21
21
Naboth Darkha Kipei
1Veo Ahab vei ki pehao hinou Jezreel puona Naboth touyu maina vei darkha kipei ali bue. 2Teitheli Ahab nou Naboth hi paoe, “Nevei darkha kipei sü Eye peia panou Eye vupou kipei soulo, daiolouzü sünasü avei ki nghitei-a bubaie. Enou neye veipuyu kipei kukhe ali hinou peilai, moyuma nenou jüpa louzü Enou neye deimuh sü veisho-a peilai.”
3Ana Naboth nou Ahab hi chila peie, “Haisü apuopaoh mai hinou kikaa thaolouyu füdei baie. Enou neye süna peiyu sü Mapao nou aetoulai moe.”
4Naboth nou puh hi soulou shi-e tea paoyu donou Ahab sü leva moa ae rarouloua ki hisü dakhai vere, ae puhnou kivo hilova reiloua züphao hinou dazü loure, ae hatou bare. 5Puh chapfü Jezebel nou puh hi kouloua noue, “Ne daisounou leveage? Daisounou ne hatou bawe?”
6Puhnou chila peie, “Daiolouzü Enou Naboth hi paoyu nasü puhnou ba-a baire. Puhvei darkha kipei nasü Eye zhopeio, moyuma puhnou jüpa louzü Enou puh hi darkha kipei kukhe ali nou peilai tea kho-e, ana puhnou soulou shi-e tea peibare.”
7Puh chapfü Jezebel nou chila peie, “Ne Israel maivei veo movu? Kushulo, ne lesalo ae hatoulo. Enou Naboth vei kipei sü ne hi peilai.”
8Süthaisü honapai nou Ahab vei zhih hinou seiko hai rüloure, ae puhvei sheesao nou saoloua Jezreel nuhdu hi hrüyu peikho maitao ae matsüyu maitao hisü seita peiwure. 9Honapai nou seiko hisü haibüa rüpeie, “Teithe ali lüa veachi paolai tea maisou ye kupove jülo, ae Naboth sü tsükhouyu buh hi panou bulo. 10Alia mai ashimai ahai asü hai puhye panou Ramai ae veo ye chaa peiwe tea paodu peikhaio. Süthaisü puhye nuhdu hinou vakou sapaloua chuh nou deithawo.”
11Jezebel nou kharochi peiyu thaifüa Jezreel hi peikho maitao ae süthai-apei maitao nou soupeie. 12Puletao nou teitheli hai hatou moa lüa bulai tea paosüpa peia maisou sü kupove jüloure, ae Naboth ye sü tsükhouyu buh hi khaipeire. 13Maishiyu mai ahai nou Naboth ye maisou nghoujü hinou Ramai ae veo ye chaa peiwe tea paodu peire, südonou puhye sü nuhdu vei vakou sapaloua chuh nou deithawure. 14Süthaisü Jezebel hi haibüa seiko hai paota peie, “Naboth ye sü chuh nou deithare.”
15Jezebel nou ko hai sülou khaie, honapai nou Ahab hi paoe, “Naboth sü thaire. Chuo puhnou ne hi zhopei bayu darkha kipei nasü taho polo.” 16Naboth sü thaire touyu ko hai Ahab nou choulouyu phaki, puhnou taho Naboth vei darkha kipei sü poloure.
17Süthaisü Mapao nou Tishbi puona rachipaolawo Elijah hi paoe, 18“Samaria hi buyu Israel maivei Veo Ahab ye taho daokhaio. Nenou puhye sü Naboth vei darkha kipei sü puhvei soua poloulai tea bua nou ngaolai. 19Puh hi Mapao Enou haibüa paowe tea paopeio, ‘Nenou maiye southayu thai-a puhvei füdei hai poloulai touwu?’ Mapao Enou haibüa puh hi paowe tea paopeio: ‘Seitao nou Naboth vei zhe laitoua buyu buh touh hisü nou nevei zhe-a panou laitoulai.’ ”
20Ahab nou Elijah ye ngaoloua puh hi haibüa paoe, “Nenou Eye ngaolourevu, Eye hraiyu mai nare?”
Elijah nou chila peie, “Enou neye ngaoloure, daiolouzü ne sü Mapao vei nghingao hinou vah ashi likhei soure donou nevei tsüle sü peiwure. 21Südonou Mapao nou ne hi haibüa paowe, ‘Ne pei hi hashi sü pove peilai, ae Enou nevei kihikhamai hrülai, taidu sümoa poutumai hrülaiye sü souhawulai. 22Nevei kikhamai hai Nebat nahpoutu Jeroboam kihikhamai, ae Abijah nahpoutu Baasha kihikhamai büa souha khaitou peilai, daiolouzü nenou Israel maiye sü süthaisa-a mah souyu donou avei lekha rarou sü soupa peiwure.’ 23Ae Jezebel donou Mapao nou haibüa paoe, ‘Jezebel vei thaiphao sü Jezreel nuhdu hinou sei nou toulai.’ 24Nevei kityarai mai taralia nuhdu khevai nou thai louzü puhye sü sei nou toulai, ae vakou nou thai louzü rehou khenou touloulai.”
25(Ahab büa maipfü nou süpeia Mapao vei nghingao hinou vah ashi souyu hai mailia hahie. 26Israel mainou talouyu phaki Mapao nou hulai peiyu Amor mai büa puhnou ngaora kayu bashara khesü souloua thotare.)
27Elijah nou chi paocheyu thaisü, Ahab nou puhvei sabanü sü paiphawure, ae soukousah nou banou loure, ae puhnou hatou bare, soukousah nou bazüa baire, ae levea nou bure.
28 Mapao nou Tishbi puona Elijah hi paoe, 29“Ahab nou daizhou koute anghoujü nou tainou souloua buyu sü ne ngaoho moe? Puhnou haibüa soulouyu donou, Enou hashi khesü puh hria buki hai seive peilai more; ana puhvei nahmai phao hinou veahoyu sü Ahab vei kihikhamai hisü vepeilai.”
Currently Selected:
1 VEMAITO 21: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
