1 VEMAITO 19
19
Elijah nou Sinai Deichiva hi Payu
1Elijah nou soupfüyu vah teitei, ae puhnou Baal vei rachipaolayu mai hrülaiye southayu ko khesü Ahab nou Jezebel hi paongaore. 2Süthaisü Jezebel nou kopomai aliye Elijah hi haibüa paove-e, “Dosho chu teile phahi Enou neye nenou rachipaolayu maitao hi soupeiyu bütoua soupei moyu thaio Ramai panou Eye southa theo.” 3Elijah nou ngaopi loure, ae puh sü tuchü tare; puhnou puhvei kilai naye saloua Judah vei teidei Beersheba hisü vetare.
Süthaisü puhnou puhvei kilaio sü buh sühi thaokhaiwua tare. 4Puhnou heamajü sü rekou nou ta-e. Puhnou süübe phi ali hi kou chobuloua thaiyu nou veipure tea haibüa veachi paoe, “Oh Mapaowo, taikhare, avei hrirai sü poloua baio; daiolouzü E-a avei puopaoh maitao jünou veipu moe!”
5Puhnou süübe phi hinou kou dazülou zhitare. Süteile bühinou rakivamai ali nou puhye kailoua paoe, “Tashu ha toulo.” 6Puhnou kaishu zhuyu phaki, puh pei hinou raokhao phe ali ae dzü bvü ali bua nou ngaoloue. Puhnou touso loua dakhaikou zütare. 7Mapao vei rakivamai nanou puhye dakhaive kaipuloua nou paoe, “Tashu hatoulo, sükumo louzü nevei veidu sü ne talouho shulai.” 8Elijah nou kushuloua hatou loure, ae touso toulouyu sünou puhye teithe raidai hai sheeyu deichi, Sinai hi velou süyu khouko sü peie. 9Puhnou lyaqulu ali hi velou süzhou khei chaore.
Süteile hinou Mapao nou puh hi paoe, “Elijah, ne hai hinou daie soua bue?”
10Elijah nou chila peie, “Hali-hala soulousüo Ramai Mapao, Enou nevei kuvah likhei soua baie. Ana Israel mai nou neye koa vo soukhai touyu sü pfüthore, nevei posheelabu sü soushire, ae nevei rachipaolayu mai hrülaiye sü southare. Eye likhei shokhai toua bua baire— ae puletao nou E-a southare donou phoua nou bue.”
11 Mapao nou puh hi paoe, “Vakou tapalo ae deichi peitaoh hikhe anghoujü nou la-a bulo.” Süthaisü Mapao nou takoure, ae puhnou chishoyu teikhei sü seive deichi khesü souphewure, ae chuhlya khesü souphosasa khaire, ana Mapao louzü teikhei hrohi bumoe. Teikhei hüyu sü baire, süthaisü nüsü vere, ana Mapao hai nüsüyu hisü bumoe. 12Nüsüyu thaisü, mei pare, ana Mapao sü mei hi bumoe; ae mei thaisü, paila veishoa nou chou-e.
13Elijah nou süsü choulou khaie, puh sah sünou puh pah holoua lyaqulu hi taloure bomü hinou tapa laloure. Pai ali nou haibüa puh hi paoe, “Elijah, ne hai hinou dai souwe?”
14Puhnou chila peie, “Hali-hala soulousüo Ramai Mapao, Enou nevei kuvah likhei soua baie. Ana Israel mai nou neye koa vo soukhai touyu sü pfüthore, nevei posheelabu sü soushire, ae nevei rachipaolayu mai hrülaiye sü southare. Eye likhei shokhai toua bua baire— ae puletao nou E-a southare donou phoua nou bue.”
15 Mapao nou puh hi paoe, “Ne Damaskas nghia buyu vaohro hi dakhai tawo, süthaisü nuhdu hi talou Hazael ye panou Sairia hi veo soure donou theadzü napeio; 16ae Nimshi nahpoutu Jehu ye panou Israel mai hi veo soure donou theadzü napeio; ae Abel Meholah hinou buyu Shaphat nahpoutu Elisha ye panou ne thaosou rachipaola-apeio soure donou theadzü napeio. 17Mai taralia Hazael nou southalo moa tarei palouyu maiye sü Jehu nou southalai; ae Jehu nou southalou moa turei palouyu maiye sü Elisha nou southalai. 18Ana Israel hi Baal ye nakou khurüa tho moyu, ae puh ye mümu mütei moyu mai thenai sü Enou shokhai touhie.”
Elisha ye Kulouyu
19Südonou Elijah nou buh sünasü thaowua tare, ae puhnou Elisha ye cho me taoli sa-a tata-a buyu hisü nou daoloue; puh jünou rai-a cho me kiali nou tata-a nou bue, ae chome nakhayu nasü puhnou sa-a tawe. Elijah nou puh vei naazao sü phaloua nou Elisha ye noupeiwure. 20Süthaisü Elisha nou puhvei chode khesü thaokhaiwua Elijah thaifü tare, ae puhnou paoe, “Eye panou apfü apuo ye dakhaive chakuloua akhai chi sü paolou raio, süthai sünou Enou ne thaifü talai.”
Elijah nou chila peie, “Tawo, E neye nuchao moe!”#19.20 Tawo, E neye nuchao moe; moa Ne ta-a bailai, ana ahi dakhaive molouzü shi-e, daiolouzü Enou ne hi soukhai touyu vah nasü matsü shoyu vah alie.
21Süthaisü Elisha nou dakhaive chode khesü datha loure, ae cho phaodao khenou meideiyu süü souloua sou sü kholoure. Süthaisü puhnou sou hai maikhe maiye panou touloure. Süthaisü puhnou Elijah thaifüho puhvei soukha-apeio nasü soutare.
Currently Selected:
1 VEMAITO 19: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
