MATHAIA 11

Baptistu Johana mi tirhte

(Lk. 7:18-35)

1Isuan zirtîr Sâwmpahnihte chu thu a pêk zawhin chuta ṭang chuan Galili ram khuaahte zirtîr tûr leh thu hril tûrin a kal ta a.

2Tin, tân ina awm Johana chuan, Krista#11:2 Mss ṭhenkhatah ‘Isua’ tih a tel. thiltihte chu a lo hriatin, #Mt. 4:3. 3“Lo kal tûra chu i ni nge mi dang kan lo nghâk ang?” tia zâwt tûrin a zirtîrte Isua hnênah a tîr a.

4Isuan anni chu a chhâng a, “Kal leh ta ula, in thil hmuh leh in thil hriatte hi Johana va hrilh rawh u. 5Mitdelte an mit a vâr a, kebaite keiin an kal a, phârte tihthianghlimin an awm a, bengngawngten an lo hre thei ta a, mitthite kaihthawh an ni a, pachhiate hnênah pawh Chanchin Ṭha hrilh a ni ta bawk. #Isa. 35:5,6; 61:1; Lk. 4:18,19. 6Tu pawh ka laka beidawng lo chu an nihlawh e,” a ti a.

7Chu mite chu an kal tâk veleh, Isuan mipuite hnênah Johana thu a sawi ta a, “Eng ennawm en tûrin nge thlalêrah in kal? Thli chhêm nghîn luang maw? 8A nih loh leh, eng vânga kal nge in nih? Puan nêm sina inchei en tûrin em ni? Ngai teh u, puan nêm sinte chu lal inahte asin an awm. 9Eng vânga kal nge in nih? Zâwlnei en tûrin maw? A nih ngei kha, ka hrilh a che u, ani chu zâwlnei ai pawha ropui zâwk a ni: he mi hi alâwm,

10‘Ngai teh, ka tirhkoh i hmaah ka tîr a,

Ani chuan i hmaah i kawng a buatsaih ang,’

tia a chanchin an ziaka kha. #Mal. 3:1. 11Thu dik ka hrilh a che u, hmeichhe hrin zîngah Baptistu Johana aia ropui zâwk an la chhuak ngai lo; amaherawhchu, vânrama mi tê ber pawh ani ai chuan an ropui zâwk a ni. 12Baptistu Johana lo awm aṭanga tûn thlengin vânram chu an bawh huai huai a, a bei vakte chu an lût ṭhîn. #Lk. 16:16. 13Johana lo awm thlenga Dân thu leh zâwlnei zawng zawngten an sawi lâwk kha, 14in pawm duh a nih chuan ani hi Elija, lo kal tûra chu a ni. #Mal. 4:5; Mt. 17:11-13; Mk. 9:11-13. 15Ngaihthlâkna beng nei chuan ngaithla ngun rawh se. #Mt. 13:9,43; Mk. 4:23; Thup. 2:7; 13:9.

16“Amaherawhchu, tûnlai mite hi eng nên nge ka tehkhin ang? Naupang, dâwrpui hmunahte ṭhu-a, an ṭhiante auva,

17‘Phênglâwng kan tumsak che u a, in lâm lo va,

Kan ṭap vak a, in ṭap chuang bawk si lo,’ tite ang hi an ni.

18“Johana chu a lo kal a, a eiin a in lo va, ‘Ramhuai a zâwl a nih hi,’ an ti a. 19Mihring Fapa hi a lo kal a, a eiin a in a, ‘En teh u, mi vir, uain heh mi, chhiahkhawntute leh mi sualte ṭhian saw,’ an ti leh si a. Pathian finzia chu a thiltihah a lang a ni,” a ti a.

Sim duh leh duh lo khuate

(Lk. 10:13-15)

20An sim loh avângin thil mak a tih tamna ber khuate chu a hau ta a. 21“Nang, Korazin, i chung a pik e; nang, Bethsaida, i chung a pik e; in zînga thil mak tihte kha Tura leh Sidona tih ni se, saiip sina vut inphulin an sim tih an tilang daih tawh ang. #Isa. 23:1-18; Ezek. 26:1—28:26; Joel. 3:4-8; Amos. 1:9,10; Zak. 9:2-4. 22Nimahsela, ka hrilh a che u, rorêl ni-ah chuan in tuar tûr aiin Tura leh Sidon tuar tûr chu a ziaawm zâwk ang. 23Nang pawh, Kapernaum, vân thlenga chawi sân i ni dâwn em ni? Mitthi khaw thlenga nam thlâk#11:23 Mss ṭhenkhatah ‘chhuk thla’ tih a ni. asin i nih dâwn? Nangmaha thil mak tihte kha Sodom khuaa tih ni sela chu tûn thlengin a la awm reng tûr. #Isa. 14:13-15; Gen. 19:24-28. 24Nimahsela, ka hrilh a che u; rorêl ni-ah chuan in tuar tûr ai chuan Sodom khaw tuar tûr chu a ziaawm zâwk ang,” a ti a. #Mt. 10:15; Lk. 10:12.

Lo kal ula, hah châwl rawh u

(Lk. 10:21,22)

25Chumi lai chuan Isuan heti hian a ti a: “Aw, ka Pa, lei leh vân Lalpa, nangin mi fing leh mi thiamte lakah hêng thu hi i thup a, mi mâwlte hnêna i puan avângin ka fak a che. #1 Kor. 1:26,29. 26A ni, ka Pa, chutiang chu ṭha i tih zâwng tak a ni. 27Ka pain engkim mi kawltîr tawh; Pa chauh lo chuan tu man Fapa hi an hre lo; Pa pawh chu Fapa leh an hnêna Fapain a puan duhnate chauh lo chuan tu man an hre lo. #Jn. 1:18; 3:35; 5:20; 7:29; 10:15.

28“Nangni thawk rim leh phurrit phur zawng zawngte u, ka hnênah lo kal ula, keiman ka lo chawlhtîr ang che u. 29Ka nghâwngkawl bât ula, ka hnênah zir rawh u; thuhnuairawlh tak leh rilru inngaitlâwm tak ka ni si a; tichuan, in thlarau tân chawlhna in hmu ang. #Jer. 6:16. 30Ka nghâwngkawl chu a nuam a, ka phur pawh a zâng a ni,” tiin.

Currently Selected:

MATHAIA 11: MIZCLBSI

Highlight

Copy