LEVITICUS 7
7
Bawhchhiat man thilhlan
1‘Hei hi Bawhchhiat man thilhlan tih dân tûr chu a ni: 2Hâlral thilhlan ran talhna hmunah ran chu talh tûr a ni a, a thisen chu maichâma theh tûr a ni. 3A mei thau te, a rîlbawh thau te, 4a kal te leh a bawhtu thau te, a thin hlâwm ṭha lai hleh te chu 5Puithiamin maichâmah a hâl ral tûr a ni, bawhchhiat man thilhlan a ni. 6Puithiam chi, mipa tawh phawt chuan a sa chu an ei thei ang, serh hran tlat a nih avângin hmun thianghlima ei tûr a ni.
7‘Sual thawina thilhlan leh bawhchhiat man thilhlan hi a hlan dân a inang reng tûr a ni; a hlântu puithiam hian a sa hi a nei tûr a ni. 8Hâlral thilhlana hman ran vun chu a hlântu puithiam neih tûr a ni. 9Buhbâl thilhlan thuka hem hmin te, chhang ur thlênga ur hmin te, thîrbêla kan te chu a hlântu puithiam neih tûr a ni. 10Buhbâl thilhlan la tihhmin loh, hriak telh pawh, telh loh pawh Arona thlah puithiamte ta tûr a ni: an insem zêl tûr a ni.
Remna thilhlan
11‘Lalpa hnêna remna thilhlan chu hetianga hlan tûr hi a ni. 12Remna thilhlan chu Pathian hnêna lâwmthu sawina atân miin a rawn hlan chuan, ran hlan rualin chhang, dawidim telh loh leh oliv hriak nêna hmeh emaw, chhang pan oliv hriaka tâl emaw, oliv hriaka kan emaw a rawn hlân tel tûr a ni. 13Chûng bâkah chuan dawidim telh chhang tlang ur hmin a pe tel tûr a ni. 14Chhang chi hrang hrang a hlan zînga pakhat zêl chu Lalpa tân a pe tûr a ni, maichâma ran thisen thehtu puithiam neih tûr a ni ang. 15A sa chu a hlan nia ei zawh vek tûr a ni; a tûk atân dah tûr a ni lo.
16‘Remna thilhlan chu thutiam hlawhtlinna avâng emaw, mahni duh thu-a thilhlan#7:16 “Min hlawhtlintîr chuan chutiang khatiang ka pe ang” tiin Pathian hnênah an dîl a, an hlawhtlina lâwmthu sawina thilhlan a ni. Mahni duh thu-a thilhlan nên hian a inang hle, an duh duh, an duh zât zât an hlân thei, thilphal deuhvin an hlân tam mai a ni. hrim hrim emaw a nih chuan, a sa chu a hlan niâ ei vek kher tûr a ni lo, a tûkah pawh ei theih a la ni ang. 17Ei sên loh, a ni thum ni pawha la awm ta cheu chu hâl ral tûr a ni. 18A ni thum nia an la ei chuan Pathianin a thilhlan chu a pawm lo vang, a hlântu thil tih ṭhatah chhiar ahnêkin bawlhhlawhnaa ngaih a ni ang a, a eitu chuan a mawh a phur ang. 19A sa-in thil bawlhhlawh a khawih chuan ei tûr a ni lo, hâl ral tûr a ni. Mi bawlhhlawh lai lo chuan a sa chu an ei thei ang. 20Mi bawlhhlawh laiin remna thilhlan sa hi a ei ve chuan ensan tûr a ni. 21Mihring emaw, ran aṭangin emaw thil bawlhhlawh chhuak khawihtu chuan he sa hi a ei ve chuan ensan tûr a ni,’ ” a ti a.
22 Lalpa chuan Mosia hnênah, 23“Israel fate chu hrilh rawh: Berâm te, bâwng te, kêl te, a eng thau mah an ei tûr a ni lo. 24Ran tlaw emaw, sa seh emaw thau chu ei tûr a ni lo; thil dangah erawh chuan hman theih a ni ang. 25Ei tûr thilhlan Lalpa hnêna a thau hlan tawh ei chu ensan tûr a ni. 26Israel fate chu khawiah pawh awm se ran thisen emaw, sava thisen emaw an ei tûr a ni lo.#Gen. 9:4; Lev. 17:10-14; 19:26; Deut. 12:16,23; 15:23. 27He dân hi bawhchhia apiang ensan tûr an ni,” a ti a.
28 Lalpa chuan Mosia hnênah, 29“Israel mite chu hrilh rawh. Remna thilhlan Lalpa hnêna hlântu chuan a ṭhen Lalpa hnêna thilpêkah an pe tûr a ni. 30Amah ngeiin ei tûr thilhlan chu a rawn hlân tur a ni. Ran thau leh a irno chu a thên ang a, Lalpa hnênah a rawn hlân tûr a ni. 31Puithiamin a thau chu maichâmah a hâl ang a, a irno erawh chu puithiam neih tûr a ni. 32Remna thilhlanah chuan a bawp ding lam chu puithiam pêk tûr a ni. 33Remna thilhlan thau leh thisen hlântu puithiam chuan a bawp ding lam chu a nei ang. 34Israel-ten Lalpa hnêna remna thilhlan an hlanin a irno an thên leh a bawp hi puithiamte kumkhaw chanpual tûr a ni,” a ti a.
35Hei hi ei tûr Lalpa hnêna pêk aṭanga Arona leh a fate, puithiama ruat ngheh hnua an chanpual atâna pêk tûr chu a ni. 36Chumi ni chuan a ni Lalpa chuan Israel mite hnênah he thên thilhlan hi an hnêna pe ṭhîn tûra thu a pêk ni. He dân hi Israel miten kumkhuain an zâwm tûr a ni.
37Tichuan, hâlral thilhlan te, buhbâl thilhlan te, sual thawina thilhlan te, bawhchhiat man thilhlan te, Puithiam nemngheh thilhlan te leh remna thilhlante chu chutianga hlan ṭhin tûr chu a ni.
38Thlalêra Sinai tlângah Israel-te thilhlan dân tûr a hrilh ṭuma Mosia hnêna Lalpa thupêkte chu chûng chu a ni.
Currently Selected:
LEVITICUS 7: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
