JOHANA 14
14
Isua, Pa hnêna kalkawng
1“In thinlung mangang suh se, Pathian ring#14:1 ‘Pathian in ring e,’ tih theih a ni. ula, kei pawh hi mi ring rawh u. 2Ka Pa inah awmna tam tak a awm a; chuti ni suh sela, in tân hmun siama ka kal tûr thu ka hrilh dâwn che u em ni? 3In tân hmun siama ka kal hnuah ka lo kîr leh ang a, ka hnênah ka hruai ang che u, ka awmnaah in awm ve theih nân. 4Ka kalna tûr kawng pawh in hria e,” a ti a.
5Thoman a hnênah, “Lalpa, i kalna tûr kan hre lo asin, engtin nge a kawng kan hriat theih ang?” a ti a.
6Isuan a chhâng a, “Keimah hi kawng leh thutak leh nunna chu ka ni; keimaha kal lo chu tu mah Pa hnên an thleng ngai lo. 7Kei mi hria ni ula, ka Pa pawh in hre tûr; tûnah zawng amah in hria e, in hmu tawh bawk,” a ti a. 8Filipan a hnênah, “Lalpa, Pa chu min hmuhtîr la, kan tân a tâwk ang,” a ti a.#Jn. 12:45.
9Isuan, “Filip, hei leh chen hi in hnênah ka awm a, mi la hre lo cheu maw? Kei mi hmu chu Pa hmu a ni. Engtiziaa Pa chu min hmuhtîr rawh ti nge i nih le? 10Kei Paah ka awm a, Pa keimahah a awm tih in ring lo vem ni? In hnêna thu ka sawite hi keima phuahchawpin ka sawi lo. Pa, keimaha awm reng chuan ama hna a thawk a ni zâwk. 11Kei Paah ka awm a, Pa keimahah a awm ka tih hi ring rawh u; a nih loh leh thiltih avâng tal hian mi ring rawh u. #Jn. 10:38. 12Thu dik tak ka hrilh a che u, tu pawh mi ring chuan thil ka tih ang hi a ti ve ang; hei aia ropui zâwk pawh hi a la ti ang, Pa hnêna ka kal dâwn avângin. 13Ka hminga eng pawh in dîl chuan ka ti zêl ang; Pa chu Fapa avânga chawimawi a nih theih nân. 14Ka hmingin eng pawh mi#14:14 Mss ṭhenkhatah ‘mi’ aiah ‘Pa’ tih a ni. Châng 14 pum hi Mss ṭhenkhatah a tel lo. dîl chuan ka ti zêl ang.
Thlarau Thianghlim tiam
15“Nangnin mi hmangaih chuan, ka thupêkte in zâwm ang.#14:15 Mss ṭhenkhatah ‘zâwm rawh u,’ tih a ni.#Jn. 15:10; 1 Jn. 5:3; 2 Jn. 6. 16Tin, keiin Pa ka dîl ang a, Awmpuitu#14:16 ‘Awmtu, thlamuantu, bultumtu, pa chan chang’ tih theih a ni. dang a pe ang che u, in hnêna awm kumkhua tûrin, 17Thlarau dik tak, khawvêlin a hmuh lohva a hriat hek loh avânga a chan theih loh chu. Nangmahniah a nun avângin nangni chuan amah in hria e, in hnênah a awm reng si a. 18Fahrahin ka kalsan lo vang che u, in hnênah ka lo kal leh ang. 19Rei lo tê a chinah khawvêlin mi hmu tawh lo vang, nangni erawh chuan mi hmu ang, kei ka nun avângin nangni pawh in nung ve ang. 20Chutih hunah chuan kei Paa ka awm te, nangni keimaha in awm te, kei nangmahnia ka awm te in la hria ang. 21Tu pawh ka thupêkte pawma zâwmtu chu mi hmangaihtu a ni; mi hmangaihtu chu ka Pain a hmangaih ang a, kei pawhin ka hmangaih ang a, a hnênah ka inlâr bawk ang,” a ti a.
22Juda, Iskariot ni lo zâwk chuan a hnênah, “Lalpa, kan hnênah i inlâr ang a, khawvêl hnênah i inlâr si lo tûr chu engtizia nge?” a ti a. #Tirh. 10:40,41.
23Isuan a chhâng a, “Miin mi hmangaih chuan ka thu a zâwm ang, ka Pain ani chu a hmangaih ang a, a hnênah kan lo kal ang a, a hnênah kan awm reng ang. 24Mi hmangaih lotu chuan ka thu a zâwm lo, thu in hriat hi keima thu a ni lo va, Pa mi tîrtu thu a ni zâwk e. 25In hnêna ka la awm chhûng hian hêng thu hi ka hrilh che u a ni; 26Awmpuitu, Thlarau Thianghlim, ka hminga Pain a rawn tirh tûr chuan engkim a zirtîr ang che u, in hnêna ka sawi zawng zawng pawh a hriat chhuahtîr leh ang che u. 27Thlamuanna ka hnutchhiah a che u, keima thlamuanna ka pe a che u; khawvêlin a pêk ang ni lovin ka pêk che u hi. In thinlung mangang suh se, hlauh pawh hlau suh se. #Jn. 16:33; Fil. 4:7; Kol. 3:5.
28“‘Ka kal bo dâwn a, in hnênah ka lo kîr leh ang,’ ka tih kha in hria e. Mi hmangaih chuan Pa hnêna ka kal tûr hi in lâwm ang: Pa chu kei aiin a ropui zâwk si a. 29Chu chu a lo thlen huna in rin theih nân, tûnah a lo thlen hmain ka hrilh che u a ni. 30In hnênah thu ka sawi tam tawh lo vang, he khawvêl lal hi a lo kal dâwn avângin. Ka chungah thu eng mah zawng a nei lo;#Jn. 12:31. 31amaherawhchu, keiin Pa ka hmangaih a, Pain thu mi pêk ang zêlin ka ti ṭhîn tih khawvêlin a hriatna tûr a ni. Tho rawh u, heta ta hi i chhuak ang u.
Currently Selected:
JOHANA 14: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.