EXODUS 29

Puithiam nemngheha tih dân tûr

(Lev. 8:1-36)

1“Ka rawng bâwla puithiam hna thawk tûr chu hetiang hian serh hran tûr a ni; bâwngtuai pakhat leh berâmchal pahnih, hmêlhem lo kai la, 2dawidim telh loh chhang te, hriaka hmeh chhangpêr te, hriaka tâl chhang pan te, chhangphut ṭha chiin siam ang che. 3Chûng chu fawngah dah la, bâwng leh berâm hlan hunah i hlân tel dâwn nia. 4Arona leh a fate chu Biakbûk kawngka bulah awm sela, dân angin tuiah insiltîr ang che.

5“Puithiam silhfên chu la la, kawrfual te, efod kawr te, efod hnuai kawrfual te, âwmbel te, kâwnghrên te chuan Arona chu inthuam rawh se. 6‘Lalpa pual’ tih belna diar chu khimtîr bawk ang che. 7Thih atân bîka siam oliv hriak chu la la, a lu-ah leihin thih ang che.

8“Arona fapate pawh lo kal sela, kawr hâktîr la, 9kâwnghrên hrêngin lukhumte chu khum sela, puithiamah chutiang chuan nemnghet la, puithiam an ni kumkhua tawh ang.

10“Bâwngtuai chu Biakbûk hmaah rawn kai ula, Arona leh a fate chuan bâwng lu-ah chuan an kut nghat sela. 11Biakbûk kawngka bul Lalpa hmaah talh ang che. 12Bâwng thisen chu la la, kutzungṭangin maichâm kil ki-ah chuan tât ang che; tah bâng chu maichâm bulah leihbua ang che. 13A rîlbawh thau te, a kal te leh a bawhtu thau te, a thin hlâwm ṭha laite la la, sual thawina atân maichâmah hâl ral rawh. 14A sa te, a vun te, a kawchhûng te erawh chu daipâwnah hâl ral ang che, sual thawina thilhlan a ni a, hâl ral vek tûr a ni.

15“Berâmchal pakhat chu kai la, Arona leh a fate chuan a lu-ah an kut nghat rawh se. 16Talh la, a thisen chuan maichâm chu theh kual ang che. 17A sa chu chan sawm la; a kawchhûng leh a kete chu sil fai la, a lu nên dah khâwm ang che. 18A zavai chuan maichâmah hâl la, Lalpa tâna hâlral thilhlan a ni, a rim chu Lalpa rimtui tih zâwng tak a ni.#Efe. 5:2; Fil. 4:18.

19“Berâm pakhat pawh chu kai la, Arona leh a fate chuan a lu-ah an kut nghat rawh se. 20Talh la, a thisen chu Arona leh a fate beng ding lam tengengah te, kut ding lam zungpui hmâwrah te, kezungpui ding lam hmâwrah te tât la, maichâmah pawh theh kual ang che. 21Maichâma thisen te, oliv hriak thih chi te chu a ṭhen la la, Arona chu a kawrah nên theh ang che; a fate pawh an kawrah nên theh ang che; tichuan, Arona leh a fate chu an thawmhnaw nên ka tâna serh hran an ni tawh ang.

22“Berâm mei thau#29:22 Berâm chi khat chu a mei a bâwk luau va, thau a inchhêk khat, mi ṭhenkhat chuan tui an tih zâwng tak a ni. tak chu hlep la, a rîlbawh thau te, a thin hlâwm ṭha lai leh a kal pahnih leh a thau bawhtu leh a bawp ding lam chu la la, 23chhang hlan, fawnga dah, chi khat zêl, dawidim telh loh chhang te, hriak nêna hmeh chhangpêr te, hriaka tâl chhang pan te pakhat ṭheuh la la, 24chûng chu Arona leh a fate chu pe la, Lalpa hmaah thêntîr rawh. 25I lâksak leh ang a, maichâma hâlral thilhlan chungah dah la, Lalpa tân hâl ral ang che; Lalpa rimtui tih zâwng tak a ni.

26“Berâm irno chu la la, Lalpa hmaah thênin#29:26 ‘Thên’ thilhlan hi sawi fo a ni, Pathian hnêna pêk tih entîr nân thil kan inpe ang hian an lek kâng emaw a ni âwm e. Chutianga tih tawh hnu chuan Pathian ta ni ta mah se, a hlântute chan ve tûr a ni. hlân ang che; chu chu i chanpual ve tûr a ni. 27Puithiam ruat nghehna berâm irno leh a bawp hi thênin ka hnênah hlân ula, puithiamte chanpual ve tûr a ni. 28Israel faten remna thilhlan an hlanin a irno leh a bawp chu puithiamho chan kumkhua atân ka ruat tlat a ni; hei hi mipui thilpêk ka dawn ve chu a ni. 29Arona puithiam thuam serh hi a faten an chhawm zêl tûr a ni, puithiam hna thawk tûra serh hrannaah an ha ve zêl tûr a ni. 30Arona fa, a aiawha puithiama ruat chuan rawngbâwl tûra Hmun Thianghlima a lo kal hunah ni sarih chhûng a ha tûr a ni.

31“Puithiam ruat nghehnaa berâmpa in hman sa chu Hmun Thianghlimah chhûm ang che, 32Arona leh a fate chuan Biakbûk kawngka bulah, fawnga chhang hlan nên a sa chu ei rawh se. 33Anmahni ruat nghehnaa sual thawina sa chu anmahni chauhvin an ei tûr a ni; thil thianghlim a ni a, puithiam chauh ei tûr a ni. 34A sa leh chhang chu ei sên loh a awm chuan zîngah hâl tûr a ni, sa serh a ni a, a ṭhing chu ei tûr a ni lo. 35Thu ka pêk che ang chuan Arona leh a fate chu ni sarih chhûng i tihrang tûr a ni. 36Ni tin, sual thawi nân bâwngchal hlân ang che; sual thawina chu hlânin maichâm chu i thian ang a, oliv hriak i hnawih ang a, i tithianghlim tûr a ni. 37Chutiang chuan ni sarih chhûng, ni tin ti ang che; tichuan, maichâm chu a lo thianghlim kim vek ang a, mi narânin an khawih chuan an tuar#29:37 Thil serh hrante hi a thianghlim êm avângin khawih loh tûr a ni, a khawih chu an ‘thianghlim’ ve a - chu chu ‘bawlhhlawh’ anga en nghâl tûr an ni, thih mai pawh hlauhawm a ni. ang.

Ni tin thilhlan

(Num. 28:1-8)

38“Maichâmah chuan ni tin berâm kum khat vêla upa i hlân ziah tûr a ni. 39Zîngah pakhat i hlân ang a, tlaiah pawh a dang pakhat i hlân dâwn nia. 40Berâm pakhat rual chuan chhangphut ṭha chi kg. khat leh oliv hriak thlit fîm litar khat i hlân tûr a ni; thilhlan ruala uain leihbuak tûr litar khat hlân tel bawk ang che. 41Tlai lama berâm pakhat hlan rual pawh chuan chhangphut ṭha chi te, oliv te, uain te hlân tel ang che. Hei hi ei tûr thilhlan, kei Lalpa hnêna hlan chu a ni, a hâl rim chu a tui a ni. 42Lalpa Biakbûk kawngkaa hâlral thilhlan chu in hlân kumkhua tûr a ni; chutah chuan ka mite ka rawn hmu ang a, thu ka hrilh ṭhîn ang. 43Chutah chuan Israel fate chu ka be ṭhîn ang a, ka ropuina chu a châm reng ang. 44Biakbûk leh maichâm chu ka tithianghlim ang a, ka rawngbâwltu atân Arona leh a fate chu ka tihrang ang. 45Israel mite zîngah chuan ka chêng ve ang a, an Pathian ka ni ang. 46An zînga ka tel ve ṭhin nân Aigupta ram ata ka hruai chhuak a, kha Pathian, Lalpa kha ka ni tih an hria ang; Lalpa, an Pathian ka nih hi.

Currently Selected:

EXODUS 29: MIZCLBSI

Highlight

Copy