1 KORINTH 5

Kohhrana inngaihna bawlhhlawh

1Jentail-te pawhin an duh loh inngaihna bawlhhlawh in zîngah a awm tih thu a thang nasa hle a ni, mi pakhatin a pa nupui a neih kha! #Deut. 22:30; 27:20. 2Pawi ti hle tûr in ni a, engati nge in la uan theih cheu? In zîng ata chutiang titu chu hnawh chhuah tûr a ni lâwm ni? 3Tisain in zîngah awm lo mah ila, thlarauvin ka awm a, chutiang titu chungchâng chu in zînga awm angin kan Lalpa Isua hmingin ka ngaihtuah fel tawh.#Kol. 2:5. 4In inkhâwmnaah kei thlarauva in zînga tel ve angin, Lalpa Isua thuneihna hmangin, 5Lalpa Ni-a a thlarau chhandama a awm theih nân, a tisa tiboral tûrin Setana pe rawh u.

6In uanna hi a ṭha lo ve. Dawidim tlêm têin chhang hlâwm a pumin a fan chhuak thei tih in hre lâwm ni? #Gal. 5:9. 7Dawidim tel lo chhang in lo niha, chhang hlâwm thar hlak in lo nih theih nân dawidim hlui chu thian fai rawh u. Kan Kalhlên kûtna tûr Krista ngei chu hlanin a awm tawh si a.#Exod. 12:5. 8Chutichuan, i kût ang u, dawidim hlui, nun chhia leh sual dawidim telh chhang nên ni lovin, thianghlimna leh dikna telh chhang nên i kût zâwk ang u. #Exod. 13:7; Deut. 16:3.

9Ka lehkhaah khân inngaih hmangte pâwl lo tûrin ka ti che u a. 10Khawvêl mi, inngaih hmang te, duhâm te, rûkru te leh milem biate kawmserh tûr ka tihna a ni lo; chuti ni se, khawvêl in chhuahsan a ngai dâwn si a. 11Ringtu, unau zînga tel si, inngaih hmang emaw, duhâm emaw, milem bia emaw, mi hau hmang emaw, zu heh emaw, rûk hmang emaw pâwl lo tûrin, an zîngah ei pawh ei lo tûrin ka ti zâwk che u a nih kha. 12,13Pâwn lam mite thu chu keia rêl tûr em ni? Pathianin a rêlsak tûr a ni lâwm ni? Chutiang mi sual chu in zîng ata hnawt chhuak rawh u. #Deut. 13:5; 17:7 (LXX); 1 Kor. 5:2.

Currently Selected:

1 KORINTH 5: MIZCLBSI

Highlight

Copy