GALATIA 1
1
1Mee ae tanii vokhehkho mee ae ajaar tanii mahdehva, changvakonchu Jesu Khrista re atakchu ithii tanii amanring Apa Thangnang tungsiihna chongthang ivi Pol ki ing, 2vokhehkho havane ong ae kauw kanae aangkheng ing Galatia ruwrthiing neningna salaam kenjepeehsahnahchuw:
3Apa Thangnang vokhehkho Jesu Khrista tanii tungsiih re idaechu neningna om ynsuwhrasiing.
4Apa Thangnang ing amanden inuwzii ing laaruw paam apha ichamah tanii inuwchu ikarpeehnii khaena Jesu ataksahrap ing isii icher inuw yngkhaenache ympidehsa; 5Apa Thangnang ningnache ichen naemah alaar isachu om ynsuwhrasiing. Amen.
Isa Chong Yngkheh vatah
6Khrista tungsiih ing yngeen vasah nenuw ing, reentaang isa chong tingche nengaangheer tahnache ki inempak ngikning. 7Atatak chuve reentaang isa chong omah, changva-konchu mee topoh ae ing nenuwchu imanja aeka vokhehkho isa chongchu manraarnii khaena entuvatah. 8Chu-khaenache neningna isa chong kentong vasah taklinakhe, reentaang isa chong yngkheh nening nache kenuwrap ingkho changmahka thangbaen tanii vaarmee ing tongnave, ama siraap pharasiing. 9Kenuw ing mamaenna kenriir vasah vaangkhe, ataraenkho athar kariirnareeh, achuw yngkheh ing nengaraang vasah taklina reentaang isa chong tongnave, ama siraap pharasiing.
10Ataraene mee ing aru changmahka Thangnang ing aruchu kajongva? Changmahka meengae chiiniichu kajongva? Ki ing meengae chiinii ing katu vanave, Khrista meenae yngkheh ynsuwhmahva kachiiva.
Pol ing Chongthang Hungansuwh
11Kauw kanae ae, ki ing neningna kamanthangsahnah, amachuve ki ing katong isa chong havi laaruw mee ae tanii mahva. 12Akhaechuve laaruw mee ningtanii iraangmahdeh ing vokhehkho achuw yngkheh ingkho imanchuwmah, changvakonchu Jesu Khrista ing kaningna ymmandangpeeh ajaarnava. 13#Nong 8.3; 22.4,5; 26.9-11Ajaenche Jehudi ae ing ening inuwzii ing ki isi ingchu nenuw ing nensiipa, amachuve Thangnang ruwrthiing ae taklina uurnii isamah ing kamanja ae vokhehkho amaangnii katu. 14#Nong 22.3Ki ing kafhuw kapa ae purah nache kabarungriir manruwhdeh ingka, kalipah mee ae kaarna Jehudi aeng ening nache isi maensa yngkheh-ping.
15 #
Nong 9.3-6; 22.6-10; 26.13-18 Changvakonchu Thangnang ningchuwhna kanuw ven ruwpum tanii kajungom mahrirae eeteerka vokheh-kho anong tunii khaena a-eenka, 16reentaang mee ae ningna Jesu Khrista thaminchu itongnii khaena kaning nache asapa chu amandangpa. Ki ing achuw mee yngkheh ningnakho chong yntahpeehnii khaena simah ing, 17changmahka Jerusalem na ong kamana chongthang ivi vasah ae ningtingkho simah ing; changvakon-chu Arabia ting si ingka athar hunganrireeh ingka Damaskas ting huungsing. 18#Nong 9.26-30Amana kumthum aanuwna Jerusalem ting Pitar yntuwhnii khaena vasi ingka amathoh inii nisuum arii runga onghak ung. 19Amana Khrista anaepa Jems mahna-ka reentaang chongthang achuw tikho mumah ing.
20Ki ing neningna kavebaziih vakhae havi ichumva, Thangnang maekungna mee ynchae mee mah-ping. 21Aanuwnache Sairia re Sisilia paam tingche sising. 22Amana Khrista enthacha Jehudi ruwrthiing aenche kichu imanghuwmah ae. 23Changvakonchu isi vasahna inuwchu ymmanja mee ingkhe, amamaang vasah thachachu atarae atakrap ing atongreehna ichii chupang ensiisah ae; 24amana enuw ing kakhaena Thangnang chu emanpahsah.
Currently Selected:
GALATIA 1: MOYO
Highlight
Copy
Compare
Share
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
