Romu 3
3
1Debɛi, aranfãani yoomai Zuifu ku jɛ í nɛ. Riba yoomai bango ku ce í nɛ. 2Ntɔ ntɔ aranfãaniɛ í la si mii fei. Sinte, Zuifu ŋai Ilaaɔ̃ í daa ideɛ si awɔ. 3Bii inɛ gɔ ŋa a kù dasi naanɛ, naanɛ hai dasi nŋau á jɔ̀ Ilaaɔ̃ mɔ kú jɛ hai nɛ naanɛi? 4Aawo, kù jɛ bɛɛbɛ. Baa bii inɛ fei í jɛ ilu ibo ka mà iyi Ilaaɔ̃ í jɛ ntɔ. Si bɛi kukɔi ideɛ wa fɔ na iriɛ í ni,
amanɛ ŋa à nɛ a mà iyi ì jɛ dee dee si ide ku fɔɛ,
nɔ ì ya ba ntɔ bii à kiitiɛ.#3:4 Cɔ Iri ku kɔ̃ 51:6.
5-6Amma bii laalɔ ku ce nwa í jɔ̀ à mà iyi Ilaaɔ̃i í jɛ dee dee, bɛirei aa ka ni. Aa ka yɛ taalei Ilaaɔ̃ bii wa kpã wa iju? Aawo, kù jɛ bɛɛbɛ. Ǹ wa n fɔ dei si bɛi amanɛ ŋa à ya dɔ̃. Bii Ilaaɔ̃ kù jɛ dee dee, debɛi bɛirei á ce ku kiiti andunyau.
7Bii ibom í teese í jɔ̀ inɛ ŋa à waa yɛ ntɔi Ilaaɔ̃, nɔ do yaase bɛɛbɛ Ilaaɔ̃ wa baò amboe, na mii í ce á maa yɛ taalem má bɛi ilu dulum. 8Na mii í ce a kaa ka ni, ka ce laalɔ ku ba Ilaaɔ̃ ku nɛ bɛɛrɛ. Inɛ gɔ ŋa à ya ni bɛɛbɛi ǹ wa n fɔ ku ba a bɛjɛ irim. Inɛ dimiɛ ŋa aa nɔ a yɛ ijuukpãɛ si bɛi í jɔ.
Inɛ kãma kù jɛ dee dee
9Debɛi, awa Zuifu ŋa mɔ à tia inɛ gɔ ŋa mɛɛ. Aawo, baa keeke, domi à nyisi tã iyi Zuifu ŋa do dimi mmu ŋa aŋa fei à wa si awɔ gbugbãi dulum. 10Kukɔi idei Ilaaɔ̃ wa fɔ í ni,
inɛ kãma kù jɛ dee dee, baa akã.
11Inɛ gɔ kù wɛɛ iyi í nɛ bisi.
Inɛ gɔ kù nɔ kù wɛɛ iyi wa dɛ Ilaaɔ̃.
12Inɛ fei í nyɔi,
inɛ fei í bɛjɛi.
Inɛ kãma kù wɛɛ iyi wa ce jiida baa akã.#3:12 Cɔ Iri ku kɔ̃ 14:1-3; 53:2-4; Woo lasabu 7:20.
13Idei gɛlɛ nŋa í sãmi bɛi balɛ foo.
Do idei gɛlɛ nŋaui à ya takiiò inɛ ŋa.
Gɛlɛ nŋau í nɛ acĩ bɛi njo.#3:13 Cɔ Iri ku kɔ̃ 5:10; 140:4.
14À nɛ inɔ kuro nɔ ikpei wa kɔ̃ si gɛlɛ nŋa.#3:14 Cɔ Iri ku kɔ̃ 10:7.
15Kutɛ gbãa ku kpa inɛi à nɛ.
16Bii à bɔ fei idei ku kpa do inɔ kufɔi à ya jɔ̀ bɛ.
17A kù mà kpãai laakai ku sũ.#3:17 Cɔ Ezai 59:7-8.
18A kù nɛ njoi Ilaaɔ̃.#3:18 Cɔ Iri ku kɔ̃ 36:2.
19Amma awa à mà iyi mii iyi wooda wa fɔ fei, inɛ ŋa iyi woodau í kãi wa fãa. Wooda í wɛɛi ku ba gɛlɛ kãma ku maà nɛ iyi á fɔ, nɔ inɛ fei ku mà iyi Ilaaɔ̃ wa yɛ taaleɛ. 20Ntɔ ntɔ inɛ kãma kù wɛɛ iyi á yɔkɔ ku jirima wooda hee koo jɛò dee dee si wajui Ilaaɔ̃. Wooda í wɛɛi ku ba ku jɔ̀ amanɛ ku mà iyi nŋu í jɛ ilu dulum.
Yaase bɛi Ilaaɔ̃ í ya ce inɛ dee dee
21Amma nsɛi, Ilaaɔ̃ í nyisi wa yaase bɛi nŋu í ya ce amanɛ dee dee, kù jɛ do idei wooda. Woodai Moizi do waliii Ilaaɔ̃ ŋau à jɛ sɛɛdaɛ. 22Inɛ ŋa iyi à dasi Jesu Kirisi naanɛ fei, Ilaaɔ̃ í ce ŋa dee dee na naanɛ iyi à dasiu. Inɛ gɔ kù jɛ ikã, 23domi inɛ fei í ce dulum nɔ à kua amboei Ilaaɔ̃. 24Amma Ilaaɔ̃ í ce ŋa dee dee hai nɛ ngɔgɔ ku sã na didɔ̃ɛ do saabui Jesu Kirisi iyi í ya ŋa. 25Nŋui Ilaaɔ̃ í jilɛ ku jɛ kuwee. Njɛɛ iyi í nikã í kpa dulum dii inɛ ŋa iyi à dasiɛ naanɛ. Ilaaɔ̃ í ce bɛɛbɛi ku nyisiò iyi nŋu í jɛ dee dee. Tako wo si suuruɛ í temua do dulum dii amanɛ ŋa, kù kpã ŋa iju. 26Amma si dee dee ku jɛɛ wa nyisi wa si waatii nsɛiu ihɛ̃ iyi nŋu inɛ dee deei, nɔ nŋu wa ce inɛ ŋa dee dee na naanɛ iyi à dasi Jesu.
27Debɛi, à nɛ kpãa iyi aa ka tɔɔ fufu má? Aawo, kaa ce. Na mii. Si na iyi í jɔ̀ kù jɛ wooda ku jirimai à waa ka, bii kù jɛ naanɛ ku dasi. 28À nɔ à yɛ iyi amanɛ á jɛ dee deei na naanɛ iyi í dasi nŋu akã, kù jɛ na wooda ku jirima. 29Mà Ilaaɔ̃ í jɛ ti Zuifu ŋa aŋa akãi. Kù jɛ ti dimi mmu ŋa má? Ntɔ ntɔ í jɛ ti dimi mmu ŋa mɔ, 30domi Ilaaɔ̃ akãi í wɛɛ. Nŋui á ce inɛ ŋa dee dee na naanɛ ku dasi nŋa, hai Zuifu ŋa hee do dimi mmu ŋa. 31Si bɛɛbɛ à waa kpa wooda na idei naanɛ ku dasiui? Aawo. À kɔ̃ɔsi gbugbãɛ mɔm nii.
2021, SIM International et UEEB