Matie 5

Inɔ didɔ̃ ntɔ ntɔ

(Cɔ Luku 6:20-23)

1Iyi Jesu í yɛ zamaau ŋɔi í koo í gũ iri kuta gɔ í buba. Nɔ mɔcɔɛ ŋa à koo à tɔtɔɔ siɛ. 2Nɔ í lɔsi cio ku kɔ ŋa si.

Si cioɛu í ni,

3ilu inɔ didɔ̃ ŋai inɛ ŋa iyi à waa tɔɔ Ilaaɔ̃ do ara kukaye,

domi aŋai à jɛ inɛi bommai Ilaaɔ̃ ŋa.

4Ilu inɔ didɔ̃ ŋai inɛ ŋa iyi à waa kpata,

domi Ilaaɔ̃i á tũ idɔ nŋa.

5Ilu inɔ didɔ̃ ŋai inɛ ŋa iyi daa nŋa í sĩa

domi aŋai aa nɛ ilɛu fei.

6Ilu inɔ didɔ̃ ŋai inɛ ŋa iyi à waa gbɔ ari do agbɛi mii iyi Ilaaɔ̃ wa bi a ce,

domi Ilaaɔ̃ á jɔ̀ a yo.

7Ilu inɔ didɔ̃ ŋai inɛ ŋa iyi à ya nɛ araarei inɛ ŋa,

domi Ilaaɔ̃ mɔ á nɛ araare nŋa.

8Ilu inɔ didɔ̃ ŋai inɛ ŋa iyi idɔ nŋa í má,

domi aa yɛ Ilaaɔ̃.

9Ilu inɔ didɔ̃ ŋai inɛ ŋa iyi à waa ce icɛi laakai ku sũ,

domi Ilaaɔ̃ á kpe ŋa amaɛ ŋa.

10Ilu inɔ didɔ̃ ŋai inɛ ŋa iyi à kpã ŋa iju si na iyi í jɔ̀ à waa ce mii iyi Ilaaɔ̃ í bi,

domi aŋai à jɛ inɛi bommai Ilaaɔ̃ ŋa.

11Iŋɛ ilu inɔ didɔ̃ ŋai, bii à waa bu ŋɛ nɔ à waa kpã ŋɛ iju nɔ à waa má ŋɛ laalɔ baa yooma fei na irim. 12I jɔ̀ i nyaanyi i wɛɛò inɔ didɔ̃ nla nla ŋa si na iyi í jɔ̀ riba iyi à jilɛ nŋɛ lelei Aɔ̃ í la. Ntɔ ntɔ bɛɛbɛi à kpã walii ŋa iyi à cua nŋɛ ŋau mɔ iju.

Mɔndai imu do ti inya kumá

(Cɔ Maaku 9:50; Luku 14:34-35)

13Ŋɔi Jesu í sɔ̃ ŋa má í ni, iŋɛi ì jɛ imu si inɔi inɛi andunya ŋa. Bii didɔ̃i imu í ku, mii aa dasi a jɔ̀ ku dɔ̃ má. Í gbe de a nikãɛ, nɔ inɛ ŋa a tɛɛsɛɛ.

14Nɔ iŋɛi ì jɛ inya kumái andunya. Ilu iyi à ma si iri kuta kaa manji. 15A ci ya má fitila a biiɛ do caka. Amma à ya kɔaɛi tengi bii á má inya, inɛi kpasɛ̃ fei ku yɛò ilu. 16Bɛɛbɛ mɔi i jɔ̀ inya kumá nŋɛ ku má si wajui inɛ ŋa ku ba a yɛ kookoosu jiida nŋɛ ŋa nɔ irii Ilaaɔ̃ Baa nŋɛ iyi í wa lele ku nɛ amboe.

Idei wooda

17Jesu í ni má, i maà tamaa bɛi ǹ naa woodai Moizi do cioi walii ŋau ku kpai. Aawo, ǹ naa ku kɔ̃ɔi. 18Ntɔ ntɔ, hee lele do ilɛ koo tãò, baa wasalii wooda keeke akã kaa gaizia, í gbe fei ndɛɛ ku kɔ̃i. 19Na nŋu, inɛ iyi í kua wooda, baa bii í jɛ wooda keeke akã gɔi, nɔ í sɔ̃ inɛ gɔ ŋa mɔ í ni a ce bɛɛbɛ, aa kpe lafɛ̃ɛ inɛ iyi í kere í re si bommai Ilaaɔ̃. Amma inɛ iyi wa jirima wooda ŋau nɔ wa kɔ inɛ gɔ ŋa mɔ si, aa kpe lafɛ̃ɛ inɛ nla si bommai Ilaaɔ̃. 20Ǹ wa n sɔ̃ ŋɛi, i kaa jɛ inɛi bommai Ilaaɔ̃ ŋa bii kù jɛ ì waa ce mii iyi Ilaaɔ̃ í bi i ce ŋa ku re woo kɔ inɛ ŋa si wooda ŋa do Farisi ŋau.

Idei idɔɔkɔ̃

21Jesu í sɔ̃ ŋa má í ni, ì gbɔ ŋa iyi Moizi í sɔ̃ bala nŋɛ ŋa í ni, i maà kpa inɛ#5:21 Cɔ Kufita 20:13; Wooda ku kɔsi 5:17., nɔ inɛ iyi í kpa inɛ fei aa bɔòɛ si wajui woo kiiti ŋa a nyisiɛ bɔ̃nɛ. 22Amma amu, an sɔ̃ ŋɛ, inɛ iyi wa ce idɔɔkɔ̃ do kpaasiɛ aa bɔòɛ si wajui woo kiiti ŋa a kpãa iju, nɔ inɛ iyi wa cɔ kpaasiɛ nfe aa kiitiɛ si wajui inɛ ngbo ŋau, inɛ mɔ iyi wa cɔ kpaasiɛ nnyɛi á lɔ si ina iyi ci ya kuu. 23Na nŋu, bii ì naaò amuai Ilaaɔ̃ wa bi kuwee nɔ bɛi ì ye gigi iyi kpaasiɛ gɔ wa mu taaleɛ, 24jɔ̀ amuaɛu bi kuweeu bɛ titã, i koo i teese ideu gbakã, awɔ do kpaasiɛ. Si anyiɛ, i bɛi i nyi wa i cea Ilaaɔ̃ amuaɛ.

25Bii í jɛ inɛ gɔ wa bɔòɛ ile kiiti na idei gbese gɔ, ce kookaai hai kpãa awɔ do lafɛ̃ɛ i gbɔsi njɛ ŋa ku ba ku maà dasiɛ awɔi woo kiiti. Bii kù jɛ bɛɛbɛ, woo kiitiu á dasiɛ si awɔi polisi, nɔ polisiu mɔ ku dasiɛ ile piisɔ̃ɔ. 26Ntɔ ntɔ ǹ wa n sɔ̃ɛi, bii à dasiɛ piisɔ̃ɔ, bii i kù sã gbeseu fei i kaa fita. Nkãma kaa gaizia si.

Idei sakara

27Jesu í ni má, ì gbɔ ŋa iyi Moizi í ni, i maà ce sakara.#5:27 Cɔ Kufita 20:14; Wooda ku kɔsi 5:18. 28Amma amu, an sɔ̃ ŋɛ, awɔ inɛmɔkɔ iyi í cɔ inaabo hee binɛɛ í dede, ì ce sakara mbɛ tã si idɔɛ. 29Na nŋu, bii iju njɛɛi wa dasiɛ dulum, nyaa i nyɔɔ ku jĩiɛ. Á tiaɛ i nyɔ ikɔ̃ akãi araɛ gɔ do iyi aa sɔsi araɛ fei si ina iyi ci ya ku. 30Bii í jɛ awɔ njɛɛi wa dasiɛ dulum, buu i nyɔɔ ku jĩiɛ. Á tiaɛ i nyɔ ikɔ̃ akãi araɛ gɔ do iyi aa sɔsi araɛ fei si ina iyi ci ya ku.

Idei abo ku kɔ̀si

(Cɔ Matie 19:9; Maaku 10:11-12; Luku 16:18)

31Nɔ Jesu í sɔ̃ ŋa má í ni, Moizi í ni, inɛ iyi wa kɔ̀si aboɛ á náa tiai njɛ kukɔ̀sii.#5:31 Cɔ Wooda ku kɔsi 24:1. 32Amma amu, ǹ wa n sɔ̃ ŋɛ, inɛ iyi í kɔ̀si aboɛ nɔ kù jɛ na sakara, mɔkɔu í dasiɛ sakarai. Nɔ mɔkɔ mɔ iyi í so abo iyi à kɔ̀siu, í ce sakarai.

I maà ya gbasi do ngɔgɔ

33Jesu í sɔ̃ ŋa má í ni, ì nɔ ì gbɔ iyi Moizi í sɔ̃ bala nŋɛ ŋau í ni, ide iyi ì gbasi si wajui Aɔ̃ Lafɛ̃ɛ ì ni aa ce, jɔ̀ i coo.#5:33 Cɔ Kuwee 19:12. 34Amma amu, ǹ wa n sɔ̃ ŋɛi, i maà ya ce kugbasi ŋa pai. I maà ya gbasi do lele ŋa domi batai bommai Ilaaɔ̃i. 35Nɔ i maà ya gbasi do ilɛ ŋa, domi bi ku lesi isɛɛi. Nɔ i maà ya gbasi do Zeruzalɛmu ŋa domi ilui Ilaaɔ̃ amanlu nlaui. 36Nɔ i maà ya gbasi do iri nŋɛ ŋa si na iyi í jɔ̀ i kaa yɔkɔ i fũuta baa ntoi iri akã nŋɛ hee má jɛ i jɔ̀ ku dũ ŋa. 37I jɔ̀ ide ku fɔ nŋɛ ku jɛ ntɔ. Bii ì ni ooi ku jɛ oo do ntɔ, bii aawo mɔi, ku jɛ aawo. Iyi aa lesi antaiɛ bɛbɛi fei ŋa, hai bi Seetam inɛ laalɔui wa naa.

Idei laalɔ ku sã

(Cɔ Luku 6:29-30)

38Jesu í sɔ̃ ŋa má í ni, ì gbɔ ŋa iyi Moizi í fɔ wo í ni, inɛ iyi í nya ijui inɛ gɔ, aa nya ti nŋu mɔ. Inɛ mɔ iyi í cɛ inyíi inɛ gɔ, aa cɛ ti nŋu mɔi.#5:38 Cɔ Kufita 21:24. 39Amma amu, ǹ wa n sɔ̃ ŋɛi, i maà ya sãa inɛ laalɔ iyi í ce nŋɛ. Bii inɛ í sambalaɛ si njɛ, toaa cangau má. 40Bii inɛ gɔ í bɔòɛ kiiti ku ba ku gba danzigiɛ, naa kumbooɛ mɔ má. 41Bii inɛ gɔ í tilasiɛ i soa nŋu aso#5:41 Bii inɛ gɔ í tilasiɛ i soa nŋu aso Waati bɛɛbɛ, inɛi Romu ŋai à waa jɛ inɛ ngboi ilɛu. Nɔ akawe nŋa ŋa do sooge nŋa ŋa à nɛ kpãa a tilasiò inɛ gɔ ku so nŋa aso. i nɛò zakai kiloo akã, so i nɛaa ku to kiloo minji gbakã. 42Bii inɛ gɔ í tɔɔɛ mii gɔ, muaa. Bii inɛ gɔ í naa mii gɔ ku kãaye bi tɛɛ, maà kɔ̀.

Idei mbɛɛ ŋa ku bi

(Cɔ Luku 6:27-28, 32-36)

43Jesu í ni má, ì gbɔ ŋa iyi à fɔ wo à ni, bi kpaasiɛ#5:43 Cɔ Kuwee 19:18., nɔ i cé mbɛɛɛ. 44Amma amu, ǹ wa n sɔ̃ ŋɛi, i ya bi mbɛɛ nŋɛ ŋa, nɔ i ya cea inɛ ŋa iyi à waa kpã ŋɛ iju kutɔɔ ŋa. 45Bii ì waa ce bɛɛbɛ ŋa ì waa nyisi inɛ ŋa iyi ì jɛ amai Ilaaɔ̃ Baa nŋɛ iyi í wa lelei, domi Ilaaɔ̃ í jɔ̀ inunuɛ wa má inya si inɛ jiida do si inɛ laalɔ ŋa. Nɔ í jɔ̀ ijĩ wa wɔa inɛ ŋa iyi à waa ce idɔɔbiɛ hee do bi inɛ ŋa iyi a kù waa coo fei. 46Bii inɛ ŋa iyi à bi ŋɛ aŋa akãi iŋɛ mɔ ì bi ŋa, to, riba yoomai aa ba ŋa. Baa woo gba fiai lɛmpoo ŋa mɔ à ya ce dimiɛ. 47Bii kpaasi nŋɛ ŋa aŋa akãi ì ya ce fɔɔ ŋa, to, iŋɛ mɔ yooi ì tia ŋa. Baa hai dasi Ilaaɔ̃ naanɛ ŋa mɔ à ya ce bɛɛbɛ. 48Na nŋu, i jɔ̀ jiida ku jɛ nŋɛ ku kɔ̃ bɛi ti Ilaaɔ̃ Baa nŋɛ iyi í wa lele í kɔ̃.

Currently Selected:

Matie 5: MKL

Highlight

Compare

Copy