Woo bɛ ŋa 26

Pɔlu wa kɔò araɛ si wajui Agiripa

1Ŋɔi Agiripa í sɔ̃ Pɔlu í ni, ì nɛ kpãa i fɔ ide i kɔò araɛ. Ŋɔi Pɔlu í wu awɔ lele nɔ í lɔsi ku kɔò araɛ í ni, 2awɔ ilaalu Agiripa, inɔm í dɔ̃ do bɛi an fɔ ide nnyi n kɔò aram si wajuɛ si ide ŋa iyi Zuifu ŋau à waa mám nɔu fei. 3Ǹ mà iyi ì mà dedembai Zuifu ŋa sãa sãa do idei kakɔɔ nŋa. Na ŋɔi í jɔ̀ ǹ wa n tɔɔɛ i gbɔ idem do laakai.

4Zuifu ŋau fei à mà kuwɛɛm hai waati iyi ǹ wɛɛ awaasũ. À mà iyi Zeruzalɛmu bɛi ǹ jɛ ama bi dimii inɛm ŋa. 5À màm hai ku kpɛ. Na nŋu, bii à bi aa yɔkɔ a jɛɛm sɛɛda iyi si kpãai Farisi ŋai ǹ la, aŋa iyi à re inɛ fei si kpãai Ilaaɔ̃ ku tɔɔ nwa. 6Nɔ nsɛi à waa kiitim si na iyi í jɔ̀ ǹ wa n cɔ kpãai kuwã iyi Ilaaɔ̃ í cea bala nwa ŋa. 7Kuwãui dimi maateeji nwa ŋau mɔ fei à waa cɔ kpãaɛ. Na ŋɔi í jɔ̀ à waa cea Ilaaɔ̃ icɛ do himma alɛò daakɔ. Ilaalu, kpãau bɛ iyi ǹ wa n cɔ nŋui í jɔ̀ Zuifu ŋau à waa mám ide. 8Bɛirei í ce iŋɛ Zuifu ŋa i ci ya yɔkɔ i dasi naanɛ ŋa iyi Ilaaɔ̃ á jĩ iku ŋa.

9Amu takam ǹ tamaa í sĩai wo n dɛdɛ kpãa baa yooma fei bɛi an ce n ganjiò idei Jesu inɛi Nazarɛtiu. 10Bɛɛbɛi ǹ ce Zeruzalɛmu. Inɛ ngboi woo weei Ilaaɔ̃ ŋa à nam gbugbã n muò woo dasi Jesu naanɛ nkpɔ n dasi ŋa piisɔ̃ɔ. Bii à bi a kpa inɛ gɔ mɔm amu takam ǹ ya n wa sii. 11Tuuba nkpɔ nkpɔ ǹ ya n maa n kpã ŋa ijui ile bii Zuifu ŋa à ya ce kutɔtɔɔ ŋa fei ku ba n tilasi ŋa a kɔ̀si idei Jesu. Ǹ ya n maa n mu ŋa do idɔɔkɔ̃ hee kaa kaa, ǹ ya n bɔ hee do si ilu mmu ŋa fei n koo n kpã ŋa iju.

Pɔlu wa fɔ idei idɔ ku kpaasiɛ

(Cɔ Woo bɛ ŋa 9:1-19; 22:6-16)

12Ŋɔi Pɔlu í ni má, bɛɛbɛi inɛ ngboi woo weei Ilaaɔ̃ ŋa à yɔɔdaam n bɔ Damasi do yiiko nŋa. 13Ilaalu, zakai dasã si kpãau ǹ yɛ inya kumá í naa hai lele í bii wa, amu do inɛ ŋa iyi à waa sim. Inya kumáu í re baa inya kumái inunu. 14Ŋɔi awa fei à cuku ilɛ, nɔ ǹ gbɔ imu gɔ wa bam ide ku fɔ do feei Ebɛɛ wa ni, Sɔlu, Sɔlu, na mii í ce ì ya maa kpãm iju. Á gaabuɛ i kɔ̀sim bɛi í ya gaabua kɛtɛ kombo iyi wa jabu na goloi lafɛ̃ɛɛ. 15Nɔ ǹ bee ǹ ni, awɔi yoo Lafɛ̃ɛ. Nɔ í ni, amui Jesu iyi ì ya maa kpã ijuu. 16Nsɛi, dede i leekĩ. Ǹ naa siɛi n cicaɛ i jɛ woo ce icɛm, nɔ i jɛ sɛɛdai mii ŋa iyi ì yɛ tã do iyi an nyi n jɔ̀ i yɛ má. 17An degbeɛ si gãmɛi inɛi Izirɛli ŋa do si gãmɛi dimi mmu ŋa nɔ ǹ wa n bɛɛ bi tu ŋa 18i cĩ iju nŋa. An bɛɛ bi tu ŋai ku ba a sinda hai si ilu kuku a lɔ si inya kumá, nɔ a sinda hai si gbugbãi Seetam a naa bi Ilaaɔ̃. An bɛɛ bi tu ŋai ku ba a dasim naanɛ nɔ Ilaaɔ̃ ku kpa dulum du ŋa nɔ a na a jɛ tubu do inɛ ŋa iyi í cica à jɛ tɛɛ.

Pɔlu wa fɔ idei icɛɛ

19Ŋɔi Pɔlu í ni má, ilaalu Agiripa, na ŋɔi í ce ǹ wa n jirima kuyɛ iyi í naa hai bi Ilaaɔ̃u. 20Sinte titã ǹ ce waazo Damasi, si anyiɛ nɔ ǹ ce Zeruzalɛmu do si ilɛi Zudee fei do bi dimi mmu ŋa. Ǹ sɔ̃ ŋa ǹ ni a kpaasi idɔ a sinda si Ilaaɔ̃, nɔ a ce icɛ iyi á jɔ̀ a yɛ si ŋa iyi à kpaasi idɔ. 21Na ŋɔi í ce Zuifu ŋau à mum hai kpasɛ̃i Ilaaɔ̃ à waa dɛ ku kpam. 22Amma Ilaaɔ̃i í nyam hee do nnyi fei nɔ ǹ wa ihɛ̃ ǹ wa n jɛ sɛɛda si wajui amanɛ ŋa hai keeke do nla fei. N kù wa n fɔ ide gɔ bii kù jɛ iyi Moizi do walii ŋa à ni á na ku ceu baasi. 23Mii iyi à ni á na ku ceu nŋui í jɛ Kirisi á na ku yɛ ijuukpã nɔ kú jɛ inɛ sinte iyi á jĩ hai si balɛ nɔ ku sisi idei inya kumá bi Zuifu ŋa do bi dimi mmu ŋa.

Pɔlu í sɔ̃ Agiripa ku dasi Jesu naanɛ

24Si bɛi Pɔlu í sisi yaasei ideɛ bɛɛbɛ ŋɔi Fesitu í la hee lele í ni, Pɔlu, ì waa sũmui. Cio nla ku ceɛi í dasiɛ sũmu. 25Amma Pɔlu í ni, n kù jɛ sũmu Fesitu, awɔ ilu bɛɛrɛu. Ide iyi ǹ wa n fɔu dei í jɛ ntɔ, nɔ wa too kpãa. 26Ilaalu Agiripa í nɔ í mà yaasei ideu. Ŋɔi í ce ǹ wa n fɔ ideu do laakai ku sũ si wajuɛ si na iyi í jɔ̀ ǹ mà kãmaɛ kù manjiaa, domi ideu kù ce si asii. 27Awɔ ilaalu Agiripa, ì dasi idei walii ŋau naanɛ mbɛ? Ǹ mà sãa sãa iyi ì dasi naanɛ. 28Ŋɔi Agiripa í sɔ̃ Pɔlu í ni, debɛi, si waati keekeu ihɛ̃ ì waa tamaa aa cem inɛi Kirisi? 29Ŋɔi Pɔlu í jɛaa í ni, ǹ wa n tɔɔ Ilaaɔ̃ ku jɔ̀ i yɛ bɛi amu, bii á ce nsɛi, bii í nɔ í jɛ á kpɛ mɔi. Ku maà jɛ baa awɔ akã, amma hee do inɛ ŋa iyi à waa de itĩ si idem nnyiu ihɛ̃ fei. Ǹ bi iŋɛ mɔ i yɛ bɛi amu amma ku maà jɛ a da nŋɛ si kpɛmkpɛm bɛi à daam siu ihɛ̃.

30Iyi Pɔlu í fɔ bɛɛbɛ í tã ŋɔi ilaaluu do ilu ilɛu do Berenisi do inɛ ŋa iyi à wa bi tu ŋau fei à dede 31à fita hai inɔ ileu. Iyi à waa fita ŋɔi à sɔ̃ njɛ à waa ni, inɛɛu bɛ kù ce daa kãma iyi í to a muu piisɔ̃ɔ hee má jɛ a kpaa. 32Ŋɔi Agiripa í sɔ̃ Fesitu í ni, bii mɔkɔu kù so kiitiu ku daa ilaalu nlai Romu si awɔ wo aa ka yɔkɔ ka jɔ̀ɔ.

Currently Selected:

Woo bɛ ŋa 26: MKL

Highlight

Copy