Salmo 69
69
Nunmak-itogedba Bab-Dummadse-binnasur-goled
Namakmalad-e-iduedga soged: Igi dutu-lirioʼga-namaklege, deyob namaklemogoye.
David we-namaked narmaksad.
1Bab-Dummad be an-bendake,
ar dii an-gammu-nagagus-naid,
ar an didulenaid.
2Olli-mata-yaagi an dogmaid,
gwisguega annaed an sated.
Dii-wilasailad-abargi an naid,
e-dukeba an selemaid.
3Dule-baidse-bendakleged an budar egisgusad. An gammu dinnagusad.
An-Bab-Dummadse an-bendakleged-edarbediidba, ataked an yegusad.
4Dule-isdar-an-dakmalad, an-sailagiaba bur bule mergued.
Bukidar binsarsunna isdar an-dakmalad.
Isdar-an-dakmalad nue-gangued-nika gudmalad,
binsarsunna an-oburgwebimalad.
Ar an ei ibmar atursassulite,
¿ibu gannar ega an ukosunna?
5Bab-Dummad, an binsaedsuligudigusad be wisid,
an-isgued geg begi an odukued.
6Bab-Dummad-Jehová-Bela-Gangued-Nikad, dule-begi-bensurmaladi, melle an-nukad bingegued be imako.
Israel-e-Bab-Dummad, dule-be-amidimaladi melle an-nukad suli-suli-itoged be imako.
7Ar be-nug-ulale, dulemar sunnasur-angi sunmaksamalad.
An bingedba an-wagar gisii naded.
8An-gwenadgan dule-baidyobi an-daked,
an-nan-mimmigana akusunna an-dakmalad.
9An bese-goled-negbina-nue-soged-ular, egi nue-nobe an itoged.
Dulemar-begi-isdar-sunmaknanaid angi yolenonimogad.
10An bodele, mas-gunsuli an gudele,
angi dododedamalad.
11Bukib-itoged-mola an yosale,
angi dodoardamalad.
12Dulemar neggwebur-doged-yawagakgi-bukudamaladi, angi sunmakedibidamalad.
Mummugana angi namakedibidamalad.
13Bab-Jehová, andi an bese goledi, be-itolegedba be an-abin-imakdaed.
Sabed-dummarba-be-nikadba be an-abinsadaed.
Be sunna an-abonogedba be an-bendaked.
Bab-Dummadye, ¡emiskwaa be an-bendake!
14Olli-mata-dummadgi be an-onoge.
Melle olli-matagi-doged be an-imake.
Dule-isdar-an-dakmaladgi be an-onoge,
dii-wilasailadgi be an-onoge.
15Melle diiba-seleged be an-imake,
melle biryaba-bipirmakega be an-sae,
melle napa angi mured be imake.
16Bab-Jehová, be an-abin-imake,
ar bedi dule-nuedid, be-sabgued dummarba be nikad.
Be bela-bela dule-wiledakmaidba, gannar be anse dage.
17Bab-Dummad, be-mai-idu melle be dukue,
be an-abin-imake, ar an boni-abargi naid.
18Bab-Dummadye an-walikaa be dage, be an-bendakdage.
¡An-isdarmaladgi be an-onoge!
19Bab-Dummad, nue be wisid dulemar angi yoledimalad,
dulemar an-obingegsadimalad,
dulemar angi dododimalad.
Bab-Dummad, bela be wisid, doamar an-isdarmalad gumala.
20Dule-angi-dododimalad nue-nunmak an-imaksamalad.
Emide geg an barsagusad, an bendakleged sated.
Dule-wile-an-daked an amidiinad, gwen an amissurgusad.
Dule-wile-an-dakmalad satemalad.
21An-masgi ina-nusu obatismalad.
An uku-uku-itonaigua, ina-gagbid anga uksamalad.
22E-iba-onobukwadgi, e-masi egi-aibinega be imake.
E-nasgumaidi, egi-aibinega be imake.
23Melle-atakmalaga, amar-e-ibya mommoo be imake.
Nolloo namalaga, e-gangued ei be sue.
24Be-urwed egi gwichigued be imake.
Be-urwed amargi yoleged be imake.
25E-negmar ollo-ollo-siged be sae.
Amargi dulemar megsuli be imake.
26Ar be dule-naibi-imaksad balegichamalad,
ar be dule-naibi-imaksad-e-nunmakedgi dododmalad.
27Wemar ibmar-isgana-imaksadyob be imakmoga.
We-dulemar melle be wiledako.
28We-dulemar garda-burba-duladgi-e-nug-narmakar-naid be elie.
Melle dulemar-nueganba e-nug-narmakar be meso.
29Bab-Dummad, ar andi an uellediid, an nunmak-itodiid,
be an-ogwiche, be an-bendake.
30Bab-Dummad, namakedgi an be-nug ogannogoed,
dog-nuedye-sogedgi be-nug an odummogoed.
31We-ibmar-uklegedi, Bab-Jehováʼga moli-bebe-nikad-ukedba, moli-sapingwagwad-bebe-nikad-ukedba,
Bab-Jehová bur-yeer itodaed.
32Dule-wilegana weyob-dakdagogua, nue-yeer itodmaloed,
Bab-Dummad-amidimalad-e-gwage gannaledmaloed.
33Ar Bab-Jehová dule-wilegana-ese-goledi itodaed.
E-dulemar-galebukwad mesagwar daksulid.
34Nibnega, napnega, muu-billigan, bela-agi-ibmar-bukmalad,
Bab-Dummad-nug odummosun.
35Ar Bab-Dummad Sión-yala bendakoed,
Judá-neggweburmar gannar soboed.
Agine na e-dulemar degisadegu ambikuega imakoed.
36Be-dulamar-e-wagan, a-yala degisadegu egadga guoed.
Dule-be-sabmalad, a-yalagi bukwa gumaloed.
Currently Selected:
Salmo 69: cuk
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
