Salmo 62
62
Bab-Dummadginbi unnila obunnoleged
David namakmalad-e-iduedga namaked narmaksad. Jedutúnʼye-nugadga narmaksad.
1Bab-Dummadginbi an neg-bogidik amied,
Bab-Dummadgi an-bendakleged danikid.
2Bab-Dummadbi anga akwasailaga gued,
Bab-Dummadbi bela-bela-an-bendakedid.
An egi dukued amied,
agala, gege an galakued.
3¿Ar sanadse bemar dule-gwensakgi yolenanai gumaloe?
Galu-aimukudani-gwichiyobi, olaegala, egemaknanaiyobi,
emide, bemar dule-gwensak imaknanaid.
4Unnila a-dule-wiogega gunanaid,
e-nug-dummarba-nikad-oichogega gunanaid.
Surbinsa gakansaedbina itomalad,
ar e-sunmakeddi ibmar-nuedbi sogmalad,
e-gwagegindina, emar-ukabsaedginbi binsadimalad.
5An-gwage Bab-Dummadginbi neg-bogidikid amied,
Bab-Dummadginbi unnila an bensulid nikad.
6Bab-Dummadbi anga akwasailaga gued,
Bab-Dummadbi bela-bela-an-bendakedid.
An egi dukued amied,
agala, gege an galakued.
7Bab-Dummad bela-bela-an-bendakedid, egi an wergudiid.
Unnila Bab-Dummadgi an-gangued siid, an-odukuedbalid.
8¡Unnila Bab-Dummadginbi be bensuli gumalo!
¡Bab-Dummad-asabin be nadele, bela be-boni-nikad ega be sogo!
¡Ar Bab-Dummad, anmar-akwediidid!
9Dule-wilemalad baisursunna bergued,
dule-mani-nikamalad baisursunna bergumogad.
Ebogwad nibirgi oaidiksaele, amba ukugwaled.
10Ibmar-isganagi-mani-amilegedgi melle be binsaed galemalo,
ibmar-atursalegedgi mer be binsamala.
Amba ibmar-nue-bukidar-bega-mergude be dakele,
mer we-ibmarginbi be binsadii gumalo.
11Bab-Dummad weyob-ilagwen-sunmaksagusadi, ilabo an itosgusad:
Bab-Dummadgi gangued daniye.
12Bab-Dummad, bede bela-bela emar-wile dakmaiye,
bede dule-e-ibmar-imakedba, sogedba be naboye.
Currently Selected:
Salmo 62: cuk
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
