ROMIA 10
10
1Ku u knaorek, nei kuplung ngi bin chnu ungta Isowr hin kdo ṭhil pik nlamki mlei ava mdo ktlan pik nlam rangki kurthuwk. 2Isowr tummi mmaanni plung muplut chaak in, pdainu dei kat chlamme tdit neiji sakhhi kuhur pik lamma. 3Mleija Isowr hinki kurjung rinkindit ava deipandi chlamme, ungta mmaan dobin chaak ava thlaam lamda, Isowr rinkindit hin kirpii lamme. 4Mleija Khrista ngi Nowlam ki mdonna mkurthut leiji, krin kcha miipum ktai ava kpindit pik chra.
Kirliinna ava Mii Mkheng tum
5Mousi ngi kjit da, mleija Nowlam dil kṭoiji rinkindit ktlo miia kring chra. 6Pdainu krin cha thu rinkindit rekki theda, “Parwaan tha ku kakal rangda?” dida plung thu thema. (Ditta Khrista mdo arjun pṭum nrang lei kthe kurthuwk) 7Mata “Kungi dulti ril tha jungklut rangda?” (Ditta Khrista ava kdiyou thungki mdo hunṭhi nrang lei). 8Pdainu ava ngi tak mtheda? pauna ava naan ner leen leh plung thung ngi knai tekka, (Ditta krin chaki pauna karyaam); 9mleija naan nerri Jisua Mukpu ungta Isowr ri kdiyou thungki mdo prin pinlet dida the thuwda plung thu arin chaak inbi, akaktlan pik chraan. 10Mleija plung ngi mdobin chaak leiji mii ava mdo pindit pik, ungta nerri mdo the thut chaak leiji mdo ktlan pik. 11Laaika ngi theda, “Mma krin kcha miipum ktaiva ningkja duni me.” 12Mleija Jihudia rek leh Grik rek arlakki mkar thlei nra ame; Mukpu ava katta mkheng inki Mukpu, ungu Mma ku own kcha mii mkheng hin msuwanthuw kpii kcha kurthuwk. 13Mleija, “Mukpu miing ku own kcha miipum ktaija kaktlan pik chra.”
14Pdainu mmaanni Mhin krin cha kma pava tak heppi ku own lamrangda? Ungta mmaanni mdo aryaak liit maan Mma hin tak heppi krin cha lam rangda? Ungu kparyaam ktaak daattu mmaanva tak heppi karyaa lam rang da? 15Mdosi kma donle miirek va tak heppi kparyaam rang da? mdo kjit dok lulu, “Kṭha paumin kparyaam rek khu ava tija thu mrungchen kṭha chdaat ta!” 16Pdainu mmaan mkheng inni kṭha paumin pṭoi lamme; mleija Isaijah ngi theda, “Mukpu, neen mkaryaak pik in ku ngi mrin chaak da?” 17Ava leiji krin cha ava karyaa thungki, ungu karyaa ava Khrista doparyaam thungki.
18Pdainu neiji kikhewlla,
mmaanva aryaa memo? mdo aryaak kat in;
mleija mmaan krowl ava dultipaam mkheng thu,
ungta mmaan pauna rekka dultipaam mdonna dekki kchet dok.”
19Neiji kikhewl nowlla, Isreel miiva dei pindi liit memo?
Rukringi Mousi ngi theda,
“Chati khat kurthuwk kma rek hin khei apthe nikdi;
ka aak chati leen plung apthit nik di.”
20Ava dilli Isaijah ngi plung ktangarri theda,
“Nei makthlaam kma rekki Neia mpha chlamda;
Nei mkikhewl kma rek hin kdaksaa ktardet nu.”
21Pdainu Isreel hin Mma ngi theda, “Kupṭoi kma leh paukleek rek hin niiluwnni kukhut khiing tlit daak nikdi.”
Currently Selected:
ROMIA 10: LAMKBSI
Highlight
Copy
Compare
Share
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.
