JOHON 1
1
Rinkhu Pauna
1Mupṭhun daat le pauna ava amda, ungta pauna ava Isowr tu kilṭhida, ungu pauna ava Isowr kurthuwk da. 2Mma mupṭhun daat le Isowr tu kilṭhida; 3Mma thu do mkheng nga seemda, ungta mdo seem thung ngi Mma ktaakki mdo seem do khat lee ame. 4Mma thu rinkhu amda, ungu rinkhu ava dultimii tummi mar awng kurthuwk da. 5Mar awng ava kjiingnu thu lengda, ungta kjiingnu ngi do khat lee pchaang me.
6Isowr do arjun sii mmiing Johon tdit miilai khat amda. 7Mma ngi mar awng hin sakhi piida, mleija Mma thu mii mkheng ngi mdo rin chaak nra, rinpaumin ava tummi arjungda. 8Mma mar awng ava pme, pdainu mar awng ava sakhi kpiira kurjung.
9Mii pum ktai leenni kleng rangki kindit mar awng ava dultipaam thu arjungda. 10Mma dultipaam thu am dokda, ungta dultipaamma Mma thung ngi seemda, anto daat joso dultipaamva Mma dei me. 11Mma ngi mdak kat ki inn thu arjungda, ungta Mma ava mmii rek kat va arlaang chme. 12Pdainu Mma karlaang kcha, Mma miing krin kcha mii mkheng nga, Isowr naole mkurthut nraan rutan pii chlam da. 13kṭou mii rek ava hii lei pme, mdit mata daksaa lei pme, mdit mata miilai do ngei lei pme, pdainu Isowr thung ngi kṭou.
14Ungta pauna ava dulti miilai khat kurthuwk da, ungu nen narlak inni amda, plungnee leh kindit ti dim chda; nenni Mma laarnee dei chaan minnu, laarnee ava Mpah hinki Mchapa khdaat chrel ava. 15Johon na Mma sakhi kurthuwk da, ungta owngda, “ ‘Nei kdil tha kurjung Mii ava nei kihinva klin langlang, mleija Mma nei kdu ngi ka am dok,’ dinu neiji kdo the ava hava.” 16Ungta nen nkheng inna Mma plungnee thu, plungnee tunni plungnee tarlaan chaak in. 17Mleija Mousi mpha thung ngi Nowlam piida; ungta plungnee leh kindit ava Jisu Khrista mpha thu kurjung. 18Mpah awng ngi ka am Mchapa khat chrel ava hinni mdo tdet kma donle, Mpah kdei ku khat lee ame.
Baptis Kuptlot Johon Doparyaam
19Ungta Jihudia rek ava ngi Jerusalem ki thiimpu rek leh Levi rek mhin vasii lamda, paukhewl lamda, “Nah ku ptida?” dida mtheen mpha thungki Johon rinpauminna hava. 20Mma ngi karthe thuwda, mmava mat me, pdainu, “Neia Khrista pmaang,” dida. 21Ungbi mmaanni mhin khewl lamda, “Ava mkurthuttu nah ku ptida? Nah Elijah pti mo?” Mma ngi theda, “Neia mma pmaang.” “Nah khulpu khat pti mo?” Ungbi mma ngi arthawngda, “Eme.” 22Mmaanni mhin theda, “Ava mkurthuttu nah ku pti da? Neen mhai ksii rek hin kdo arthaan chaak nraan, nah mlei thu ku ping ngi kardi ptida?” 23Mma ngi theda “‘Mukpu lamṭoira arjii,’ dida khulpu Isaijah ngi mdo the lulu ngi, neia kbowklaiji ko owng krowl khat ava ping.”
24Tunva Pharisi rek do haisii mmaanni, 25mhin khewl lamda, “Khrista akurthut ma, mdit mata Elijah ruk akurthut ma, mdit mata khulpu akurthut mau, talu leiji nangva baptis ado ptlot da?” 26Johon ni mhin inni arthawngda, “Neiva dii tu kilṭhi ngi baptis kuptlot, pdainu naan arlakki krip rek thungki Khat ava naanni dei maan ti. 27Nei kdil ṭoida kurjung Mma ava mkhukok rii daat mak klua kparthle pik ra nea kurhui chmaang.” 28Hava nong nga Johon ni baptis muptlot lamthu, Jordon raalpha ngi mmun Bethania thu kthuwk.
Isowr Jao
29Ungta mupduk nii ngi mhin Jisu karva slii deida, ungu theda, “Dultipaam thungki pnu klou pthii ra Isowr ki Jaonao ava asuwn! 30‘Nei kdil ṭoida kurjung Mma ava klin langlang, mleija Mma nei kdu ngi ka am dok,’ dinu kdo the Mma ava hava. 31Nei kdak kat daat rukva Mma dei chmaang; pdainu Mma ngi Isreel mii rek hin mdo pandan nra, hava tummi neiva dii tu kilṭhi ngi baptis ado kuptlot in.” 32Ungta Johon ni sakhi piida, “Parwaan ki pthla uṭhuw heppi arjungda Mma leen kchu neiji deinu. 33Nei kdak kat rukva Mma dei chmaang; pdainu dii tu kilṭhi ngi baptis kdo ptlot rangki mju ksii Mma ngi kihin theda, ‘Pthla ngi arjungda mleen kchu ado dee hava Mma ngi pthla kchiir ri baptis ktlo ra.’ 34Ungta Isowr Chapa tdit neiji deinu ava sakhi kpiik chaakka.”
Rukri reepki Jisu Siikhu rek
35Ungta mupduk nii va Johon na msiikhu rek knii tu rip daat lamda; 36Ungta mma ngi mche slii chunni Jisu suwda, ungu theda, “Isowr Jaonao asuw in!” 37Msiikhu rek miilai knii ngi hava mdo the aryaa da, ungbi mmaanni Jisu dil ṭoi chlam da. 38Jisu ngi mdil mkinlet thungta, mmaanni mdil mdo ṭoi slii lam deida, ungbi mhin inni theda, “Talu da ado thlaam inna?” Ungta mmaanni Mhin the chlamda, “Rabbi,” (mleija Chukpu) “Tva tha ka am pti da?” 39Mma ngi mhin inni theda, “Arvaan, ungu asuwn,” ungta mmaanni arva lamda, ma amna dei lamda, ava nit va amṭhi lamda, mleija ṭhang sowm arveel kurthuwk da. 40Johon do the aryaa da Mma dil kṭoi cha miilai knii thungki khat ava Simon Pitor upa Andrija. 41Rukri ngi mma ngi mnaopa Simon pha da, ungu mhin theda, “Neenni (Khrista tdit) Masija kphaak chaak inna.” 42Mma ngi Jisu ṭhi paphaak da, Jisu ngi mma suw thida, theda, “Nah Johon chapa Simon pti mo? Nang nga Siphas di nikdi.” (Mleija Pitor)
Jisu ngi Philip leh Nathaniel mdo Own
43Mupduk niiva Jisua Galil tha vang nuwm da. Ungta Mma ngi Philip phada, ungu mhin theda, “Nei kdil aṭoi cha.” 44Tunva Philip ava Andrija leh Pitor khuwpii Bethsaida ki kurthuwk da. 45Philip pi Nathaniel phada, ungu mhin theda, “Mousi Nowlam thung ngi mdo the, ungta khulpu rek ruk va mdo kjit dok, Joseph chapa, Nasareth ki Jisu, neenni pha chaannu.”
46Nathaniel li mhin theda, “Nasareth thung ngi do kṭha khat kthuwk rang mo?” Philip pi mhin theda, “Arva ungu asuw!” 47Jisu ngi Mma hin Nathaniel karva slii deida, ungu mhin theda, “Isreel mii kat ava asuwn, mkarma nra ame!” 48Nathaniel li Mhin theda, “Tak heppi nea ado tdee da?” Jisu ngi mhin arthawngda, “Philip pi ato own du ngi, kduwt ding ti ngi a am daat mpha thu Neiva ado kdee.” 49Nathaniel li Mhin arthawngda, “Rabbi, Nah Isowr Chapa pti! Nah Isreel rek Kruwng ava pti!” 50Ungbi Jisu ngi mhin arthawngda, “Mleija Neiji kduwt ding ti ngi ado kdee dinu kdo the leiji arin chaak mo? Havale hinva klin klin nong nang ngi dei nadi.” 51Ungta Jisu ngi mhin theda, “Kindit, kinditti, Neiji ahin kthea, nang ngi parwaan kparvang, ungta Isowr Waantamsii rekki Mii Chapa leen kuhung kal ungu kurjung ṭum slii meek nang ngi dei nadi.”
Currently Selected:
JOHON 1: LAMKBSI
Highlight
Share
Copy
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.