MATIMANGOU KAPYII 21
21
Kasatai sating ninado kasatai sazyii
1Sateichii kasatai sating ninado kasatai sazyii tei Inii ngoutakle; kadapokii karei ninado karei sazyii tei maju aitakle sateichii dwijai tei gatutakle. 2Sateichii Saraa dato kamatei namdi, kasatai Jerosa- lem teinii, mpoupeimah naa jangpii natkai kai ka-mbi amyiipeipwi takumpiinii tiikada wosii, sating gamto humkalei tei Inii ngoutakle. 3Sateichii sagongbam kiteito rok kasagoi hangninanii aitiisii katam Inii shiitakle, “Julo, Saraamah kitei meinahgo kaswi leile, sateichii ahnii ahnyiigo kaswisii bampyii tangle, ahnyiinii ahmah mei hang tiitangle, sateichii Saraa sekpiinii ahnyiigo kaswido kaswipyii tangle. 4Sateichii ahnii ahnyiimah mik kiteito mikdwi hangtei piit toipyii tangle; kataido leikei lakle; sateichii madaksii magee katu ninado kahat tei leiloi lakle, sateichii katchii kanhii teido leiloi lakle, kadapokii kareimah hangtei maju aitakle.”
5Sateichii sagongbam kito bam kalei ah teinii tamle, “Julo, Inii mah- lyiihang tiisatai pyii takle.” Sateichii Ahnii tamle, “Ai ryii wolo; kadapokii samhang ai malum wokabui ninado kasangle.” 6Sateichii ahnii gudakii tamle, “Ai tiisangtakle, Inii karei ninado akat, kahou ninado kalui teile. Karingmah dwipok kiteito kasaryiimei hang go Inii matapii pyiisak tangle. 7Ngam kalumei hangteinii aihang ai doutangle, sateichii Inii ahmah Saraa ninado ahnii gunah sapfii mpou tei tiitangle. 8Nlenii raikaga, kamalum kaga, ngoukasaba ngam katiimei, meigo kagimei, sapwimei sapfiimei kashyii kahong tha katiimei, ashoi kapoimei, tingtu param hang go kamatamei, ninado kachuimei hang jangpiinii, hangna kashang tiisii katai, mi ninado sulphur piinii shong kalei jailung tei tangle.”
Kasatai Jerosalem
9Teito kalui sararahum sana teipiinii tokryii kalei kok sana poikalei sating gamlui sana kak kito hangninanii gong n-gu sam rashiisanii tamle, “Patlo, Inii n-go amyiipeipwi katunii, Jaonah mah noutei mangoule.” 10Sateichii ahnii n-gu rangii paikito kadi ninado kasagoi zang hangninii kikii pang- maasanii, Saraa dato, Saraamah pumtei kava kalei kamatei namdi, Jerosalem tei, sating gamto hum kalei tei gudakii mangou takle. 11Ahmah kava teinii dwi kamatei kamaleek takumpii mai kating jasper takum katu, hangkapiinii mai kating kuitu takumle. 12Teimah kadi ninado kasagoi mbaang, takam kamjao keariisiinakhii, sateichii takam kamjao hang kitei sating gamlui keariisiinakhii leile, sateichii takam kamjao hang phyiiryii tei Isrelmah nah sapfiimei mah sadung keariisiinakhii zei tei ryiikai bamle; 13Leimik kapat lamkii takam kamjao hangtum, longryii lamkii ta- kam kamjao hangtum, lamka lamkii takam kamjao hangtum, sateichii leimik kaliit lamkii takam kamjao hangtum leile. 14Sateichii namdi teimah mbaang tei bangmaa kearii- siinakhii, sateichii teimah aphyiiryii teikii Jaonah mah tiilamlwi kapyii- mei keariisiinakhiimah zei tei leile. 15Sateichii teimah namdigo, ninado takam kamjao go, ninado mbaang hang gotei tham jutang karam jangpii n-gu sam rashii katupii datei sonapii katii tham kajupii tei leile. 16Sateichii namdi tei saka madai mashamle, sateichii teimah ata adet kadi tei masamle, sateichii sating gamluinii namdi tei kilomitar 2,400 ai masak mpat takle; teimah ata adet ninado sagoi tei masamramle. 17Sateichii ahnii teimah mbaang tei meinah mah katunii, sating gam- luimah tham kaju taiswisii metar reksiirok kasagoi ai masak mpat takle. 18Sateichii teimah mbaang tei jasper kuitupiinii tiile sateichii namdi teinii sakhiibung takumpiinii matei kabi sonapiinii tiile. 19Teimah namdimah mbaangmah bangmaa tei maikateeng kuitu hang piinii tiigat bamle, bangmaa karei tei jasper, hangna kashang teinii Sapphire, hangtum kashang teinii Agate, madai kashang teinii Emerald, 20Mangii kashang teinii Onyx, siiruk kashang teinii Carnelian, sana kashang teinii Chrysolite, siisat kashang teinii Beryl, sokchyii kashang teinii Topaz, kearii kashang teinii Chrysoprase, keariisiikankhii kashang teinii Jacinth, Kearii- siinakhii kashang teinii Amethyst kuitule. 21Sateichii takam kamjao keariisiinakhii tei sanahkang keariisiinakhii teile; takam kamjao nsang tei sanahkang nsangpiinii tiile, sateichii namdimah pwidi kadi tei sakhiibung takumpiinii akhii kangou kamatei sona piinii tiile.
22Sateichii namdi lung teikii Inii Saraa kamaningki tei ngoumakle, kadapokii Bangpii Saraa kadi kathang ninado jaonah teinii teimah Saraa kamaningki teile. 23Sateichii teiki namdi kiteito vatang karam jangpii leimikdo sakhiido kabi tei gale, kadapokii Saraamah pumtei kava teinii teimah kava teile. Satei- chii teimah thaomi teinii Jaonah teile. 24Sateichii luihangnii teimah kava lungto roitat tangle; sateichii sazyii pouryiimah sagongmei hangnii ahnyiimah pumtei kava tei teilungkii poigong tangle. 25Sateichii teiki namdimah takam kamjao hangtei tingna majang laatbam tangle; ta- kamsang takam lakle; dapodinchiinii teiki tei tinghum katu tei gale. 26Sateichii ahnyiinii teilung teikii luihangmah pumtei kava ninado kani kahii hangtei poigong tangle. 27Nlenii Jaonah mah karingmah larekbung kikii zei ryiikai kabam mei tei supiinii, matei kasu, ka-nrou tha katiimei, mak-kii kachuimei hang- teinii teiki lungtei liitsang liitlakle.
Currently Selected:
MATIMANGOU KAPYII 21: NAG2
Highlight
Copy
Compare
Share
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
