MATIMANGOU KAPYII 16
16
Saraanii rakarhii mah kok
1Sateichii Saraa kamaning kilungto rok kasagoi hang- ninanii sating gamlui sana dateikii aitiisii katam Inii shiitakle, “Tat tulo, Saraanii rakarhii mah kok sana tei sazyii pouryiikii rui mpat ailo.”
2Teito karei sating gamlui teinii tatpatsii ahmah koktei sazyii pouryiikii rui mpat takle; sateichii saramkow mah siiti pungkalei ni- nado ah mah tingtu param go kamata mei hang phyiiryiito ngoukahing ninado katchiijam hang tei pat takle.
3Sateichii hangna kashang sating gamlui teinii ahmah kok tei dwijai lungkii rui mpat takle; sateichii teitei kataimeimah zai takum takle sateichii karing kounah hang, dwijai lungto kalei hangtei taitakle.
4Sateichii hangtum kashang sating gamlui teinii ahmah kok tei karyii hang kikii ninado dwipok hang kikii rui mpat takle, sateichii teitei zai ndat takle. 5Sateichii dwimah rangii teinii aitiisii katam Inii shiile, “Tingneishang ninado ndoushangto kalei, O kamateipii, nangnii samtak tiikatu ai majyiile. 6Kadapokii kamatei ninado lungkakalingmei hangmah zai tei ahnyiinii tii-mpatle, teipiinii zai tei sak matu tang karam jangpii nangnii ahnyiigo pyiitakle. Ahnyiinii doukamajyii tei ahnyiinii dou leile!” 7Teito Saraago pyiikatoibam kiteito aitiisii tam kalei rok hangninii Inii shiile, “Bangpii Saraa kadi! Gomah samtak katii hangteinii majyiile ninado kasangle!”
8Sateichii madai kashang sating gamlui teinii ahmah kok tei leimik gamkii rui mpat takle; sateichii meihang go ru matu takle, 9meihang gotei ngoukahing maga teipii maga takle, sateichii sararahum hang phyiiryiito teimaham kalei Saraa zei gotei sheeng takle sateichii ahnyiinii ahgo pumtei kava pyiitang karam jangpii tam matoimakle.
10Sateichii mangii kashang sating gamlui teinii ahmah kok tei saramkow mah sagongbam gamkii rui mpat takle; sateichii ahmah sagong sazyii tei myiimatu takle; ninado meihang teinii katchii jangpii ahnyiimah malyii tei makitu takle. 11Sateichii ahnyiinii sating gam mah Saraa gotei ahnyiimah katchii ninado chiilotlot katu jam hang jangteipiinii sheeng takle, sateichii ahnyiinii ahnyiimah tha hang kiteito lungkali makle.
12Sateichii siiruk kashang sating gamlui teinii ahmah kok tei Eu- phrates karyii kadi kiteikii rui mpat takle; sateichii leimik kapat lamto kagong sagongmei hang jangpii pwidi tiikada tang karam jangpii teimah dwitei tang matu takle. 13Sateichii mwigatpwi mah mwiki teito, saramkow mah mwiki teito kasang kasu lungkakaling meihang mah mwiki teito gownah takum katu matei kasu rangii hangtum kapat tei Inii ngou takle. 14Ahnyii teinii sung kaga tha hang tiisii kalei sara ka- shyiimah rangiihang teile. Ai rangii hangtum ainii ahnyiihang go Saraa kadimah leimik kadipiinei saryii tiitang karam jangpii poi nkom tang karam jangpii sazyii pouryiimah sagong hangda tatpatle.
15(“Julo, karagamei takumpii Inii gongtangle! Peimani haisupii makungpii ninado laat kabam tei ngoumatu lak tang karam jangpii peimani kaiwosii, mik raksii kalei ahtei sadoi bile!”)
16Teito rangii hangteinii sagong- mei hang go tei Hebrumei latpii “Armagedon” sii kalat kiteikii poi nkom wotakle.
17Sateichii sana kashang sating gamlui teinii ahmah koktei tingkai kikii rui mpat takle; sateichii Saraa kamaningki lungto rok kasagoi hang- ninanii sagongbam kiteito tatpatsii tamle, “Tei shang takle!” 18Sateichii sating kapeek katu, rok hang, sating katwi koi hang, sateichii meinahnii sazyii pouryii lung katuto ngoulei kasu kadi malyii kachyii tei pat takle, teimah malyii kachyii tei hang- kapiinii dile. 19Namdi kadi hangtei jaitum tiisii pak takle, sateichii luihang mah namdi hangtei tiimaga aitakle. Saraanii kadi Bebilon gotei maningloi takle, ninado ahmah ngoukahing rakarhiimah joutei ahmah peek kito mpoupeigo joutei sak matutakle. 20Dwipiinii magui kalei sazyii hangtei pakga takle, ninado zang hangtei gatu takle. 21Sateichii kadi kasiiti hang, kasiiti hangninii kg rekngiikii kamaswi tei; meinahnii kashii kakhiimah sarara- hum jangpiinii Saraago sheeng kasuta katangtei, sating gamto meihang phyiiryiikii takmang matu takle. Teimah sararahum tei hangkapiinii ngouhingle.
Currently Selected:
MATIMANGOU KAPYII 16: NAG2
Highlight
Copy
Compare
Share
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
